मगन इन्टरटेन्मेन्टया न्हूगु शर्ट मूभी उच्च शिक्षाया प्रिमियर किर्तिपुर सिनेप्लेक्सय् जुल । विदेशय् वनां आखः ब्वंवनेगु म्हगस ज्वनातःपिं थौंया पुस्ता व छगू मध्यम वर्गया नेवाः परिवारया पुलांगु पुस्ताया वैचारिक द्वन्दयात कयाः दयेकातःगु थुगु प्याखँया निर्देशक रजिन महर्जन खः ।
विशिष्ट पाहांपिनिगु उपस्थीतिइ प्याखँया प्रिमियर भव्य रुपं जूगु खः । नेपालभाषाया कलाकार एवं थी थी समाजसेवी व राजनैतिक व्यक्तित्वपिनिगु नं उपस्थीति दुगु खः ।
प्रिमियरय् प्याखँया कलाकारपिनिगु म्हसीका लिपा प्याखँ स्वयाः प्रतिकृया बिइगु झ्वलय् किपू नगरपालिकाया उपमेयर शुभलक्ष्मी शाक्यं नेवाः समाजय् जुयाःच्वंगु घटनायात बांलाक्क व ध्वाथुइक प्याखँ दयेकादीगुलिं प्रशंशा याना दिल । किपूया प्रतिनिधित्व यानाः प्याखँ दयेका विश्व न्ह्योने ब्वयेत आह्वाननं यानादील ।
प्याखँया बारे प्रतिकृया बिइगु झ्वलय् किपूया पूर्व मेयर रमेश महर्जनं किपूया स्थानीय कलाकारपिन्त किपू नगरपालिकां हःपाः बियाःच्वनेमाःगु खँय् सः तयाःदिल । किपूया स्थानीय कलाकारया प्रशंसा याःसें समाजया निंतिं कलाकारपिंसं छुं यानाच्वंगु खँ नं कुलादिल ।
प्रतिकृया बिइगु हे भ्mवलय् थिमिया पूर्व मेयर मदन सुन्दर श्रेष्ठं प्याखँ तसकं हे बांलाःगु धाःसें प्याखँ दयेकीपिंसं जक मखु सकल नेवाः तय्सं हे नेवाः प्याखँ युट्युबय् स्वयेगु, लाइक यायेगु, सेयर व नेवाः च्यानलत सब्सक्राइब यायेत इनाप यानादिल ।
किपूया पूर्व उपमेयर सरस्वती खड्का न्हापा थःगु कार्यकालय् नेवाः शर्ट मूभी धेंधेंबल्ला कासा यानागु खँ नं लुमंका दिल ।
प्याखं स्वयाः यक्व हे स्वकुमि भावुक नं जूगु खः । थांैया बिषय वस्तुयात ध्वाथुक्क न्ह्यब्वयातःगु खँय् सकस्यां हे प्रशंसा याःगु खः ।
प्याखनय् लक्ष्मीकुमार महर्जन, कृष्णभक्त महर्जन, क्रिसल श्रेष्ठया मू भुमिका दुगु खः ।
थुगु प्याखँ माघ १२ गते निसें मगन इन्टरटेन्मेन्टया युट्युब च्यानलय् स्वये खनिं ।
