दच्छिइ छक्वः आर. आर. क्याम्पसय् नेपालभाषा ब्वनिपिं म्हो जुयाः पढाइ बन्द जुइगु बुखँ सामाजिक संजालय् खनेदयाच्वंगु दइ । थज्वःगु बुखँ पिदंनाच्वंगु नं आः स्वदँ प्यदँ दये धुंकल । नेपालभाषाया अध्यापनय् नेवाःत उदासीन जुयाच्वंगु संकेतया कारणं हे थुज्वःगु बुखँ पिदनाच्वंगु खः । नेवाःत थथे थःगु भाय्या अध्ययन यायेगु पाखें तापानाच्वंगु कारण छु खः धैगु खँय् सकसियां छता हे जक बिचाः दु की नेवाः भाय् ब्वनां लजगा चुलाइ मखु । थौंया स्थीतिइ आः नेपालभाषा ब्वना लजगा चुमलाइगु खँ मदये धुंकल । येँ महानगरपालिकाया पूर्व मेयर विद्यासुन्दर शाक्यया पालय् हे येँ स्थानीय तहलय् नेपालभाषा ब्वंकेगु अनिवार्य याये धुंकाः छक्वलं १७२म्हेसित स्थानीय भाषा प्रशिक्षण सहायक नियुक्ति बिइ धुंकाः येँ महानगर दुनेया नीजि स्कुलय् नं स्थानीय विषय अनिवार्य याये धुंकुगु दु ।
स्थानीय विषय अन्तर्गत नं येँ दुने बसोवास यायेधुंकाः थनया भाषा, संस्कृति, रितिरिवाज व मूल्यमान्यता बारे ब्वंकेगु थुइकेगु खः । थुकीया निंतिं नेपालभाषां न्ववाये सःपिं, ब्वने सःपिं अले मुख्य खँ ब्वंके सःपिनिगु दक्ष जनशक्तिया आवश्यकता दु । येँ महानगर दुने जक ६५०गू मल्याक्क नीजि स्कुल दु । हरेक नीजि स्कुलय् स्थानीय विषय अन्तर्गत नेपालभाषा अध्यापन याकेगु अनिवार्य खः । थुगु ल्याखँ ला नेवाःतय्गु नितिं थ्व तसकं हे तःधंगु अवसर खः । तर स्थानीय विषय ब्वंकेगु खँ नं उलि अःपुगु खँ मखु । स्थानीय विषय बारे ज्ञानलिसें स्थानीय भाषाया बारे नं दक्खल आवश्यक जू । थःज्योगु जनशक्ति गन गुलि दु धैगु खँय् झीके तथ्यांक नं मदु । जनशक्तिया माग गन गुलि जुयाच्वन धैगु खँया आधिकारीक श्रोत नं मदु । थौं थज्योगु हे जनशक्तिया उत्पादन यायेगु निंतिं छुं नं संघसंस्था न्ह्यचिलाच्वंगु मदुसा पुलांगु नेवाः संघसंस्थातय्सं नं थज्योगु खँय् छुं वास्ता यानाच्वंगु मदु ।
छगू समन्वय्या अभावय् दक्ष जनशक्तिया माग व पूर्तिया समिकरण पूवनेमाः धैगु मानसिकता झीसं विकास याये मफूनिं । लिसें स्थानीय विषय अध्यापन याकेगु निंतिं स्थानीय सरकार व शिक्षा विभागया जक जिम्मा खः धकाः लिचिलेगु मनस्थीति नं झीसं हयाच्वने मज्यू । उकिं हरेक वडां थःगु क्षत्र दुने दुगु नीजि स्कुल व सरकारी स्कुलय् स्थानीय विषयया नियमित पढाइ जुयाःच्वंगु दु मदु व छुं समस्या वयाच्वंगु खःसा समन्वय्पाखें समाधान यायेफइ धैगु खँय् विश्वास ब्वलंके माः ।
नेपालभाषाया थी थी भाषिक संघसंस्थां, स्थानीय क्लबं आः थःगु उद्देश्य थुगु रुपं हिइके माःगु खनेदु । त्वालय् हरेक स्कुलं स्थानीयभाषाया कक्षा संचालनय् हयाच्वंगु दु मदु स्वयाः फुगु सहयोग याना माःगु जनशक्तिया निंतिं त्वाःबाहायापिन्त नेपालभाषाया अध्यापन याकेगु निंतिं हःपाः बियाः वनेमाः ।
