नेपालभाषा–साहित्यिक आलोचनाया स्थिति थौंया सन्दर्भय् डा.चन्द्रमान वज्राचार्यया कार्यपत्र कार्तिक २७ गते शनिवाः नेपालभाषा एकेडेमिइ न्ह्यब्वल । लेक्चरल जीवन कुमार महर्जनं किपुया नेपालभाषा आकादेमिया भवन न्ह्याकादीगु उगु गोष्ठीस समालोचक पूर्णकाजी ताम्राकारं कार्यपत्रयात कयाः टिप्पणी यानादीगु खः ।
समालोचक पूर्णकाजी ताम्राकारं टिप्पणी यायेगु झ्वलय् नेपालभाषा साहित्यया विकासया नितिं पत्रपत्रिका नं पिदना च्वनेमाःगु खँ कनादीगु दु । थुकथंया गोष्ठीया अन्तरक्रिया मयायकं साहित्य विधाय् क्वातुक विकास जुइमखुगु खँय् नं बः बियादील ।
साहित्य दुने गुलि संगति व विसगयित दु व सीकेगु हे समालोचना जुया वयाच्वंगुलिं समालोचना साहित्यया आवश्यकता जूगु खँयात बः बिया सामालोचना साहित्यया विकासय् प्रेरणा जूवनेमा धकाः नं थुकथंया गोष्ठया आवश्यकता तायका हयाच्वंगु दु । साहित्य दुने च्वंगु गुण व अवगुणयात फया क्यनेगु हे समालोचना खः जुयाच्वंगुलिंन समालोचनाया विकास याय्माःगु खँय् नं बः विइगु ज्या जूगु दु ।
साहित्यकार डा. पुष्पराज राजकर्णिकारया सभापतित्वय् न्ह्याःगु थुगु गोष्ठीस ज्याझ्वःया मूपाहां योगेन्द्र प्रधान जुयादीगु खः ।
नेपालभाषा आकादेमिया दुजः विजय रत्न असंबरे लसकुस न्वचु बियादीगु खःसा आकादेमिया हे सदस्य सचिव मल्ल के सुन्दरं थौंया नेपालभाषा साहित्यया यथार्थताया स्थितियात कया थःगु नुगः खँ प्वंकादीगु खः ।
