नेपालभाषाया वृहत अनलाइन शव्दकोश www.nepalbhasa.org जूम एप्लिकेशन मार्फत सार्वजनिक जुल । शव्दकोश निर्माण पुचःलं फेसबुक लाइभ नं याःगु खः । निर्माण पुचःया ज्ञान महर्जनं लसकुस यासें शव्दकोषया परिचय नं बियादीइगु खः । दुजः राजेश तण्डुकारं निर्माण प्रक्रिया व पुचःया जानकारी व अस्मित मल्लं वेबसाइटय् उपलव्ध थी थी सुविधा बारे कनादीगु खः । सफ्टवेयर डेभेलोपरपिं चेतना शाक्य व सुजन जोशीं वेबसाइटया प्राविधिक पक्ष व वेबसाइट गथे याना छ्यलेगु धकाः कनादिल । ज्याझवलय् अनुसन्धानकर्ता काशीनाथ तमोटं नेपालभाषा शव्दकोशया विगत व वर्तमानया लिसेलिसें न्हूगु अनलाइन शव्दकोषया विश्लेषणनं यानादिल । थुगु परियोजनाया निर्देशक डा. सुभाषराम प्रजापतिं शव्दकोष लिसें नेपालभाषायात डिजिटाइज यानायंकेगु ग्वसाः बारे कनादीगु खः ।
जूम मिटिंगय् दबुलि नेपालया अध्यक्ष सन्तोष प्रजापति, वर्ड नेवाः अर्गनाइजेसन (डब्लुएनओ)या पूर्व अध्यक्ष डा. बालगोपाल श्रेष्ठ, श्रीलक्ष्मी श्रेष्ठ, नेपालभाषा एकेडेमीया भाइस चान्सलर यज्ञरत्न धाख्वाः, नेपालभाषा एकेडेमीका प्राज्ञ डा.पुष्पराज कर्णिकार व लोकसाहित्य परिषदया सचिव राजितबहादुर श्रेष्ठ, नेपालभाषा टाइम्सया सम्पादक सुरेश मानन्धर लिसें मेमेपिनिगु नं सहभागीता दुगु खः ।
थुगु शव्दकोषय् नेपालभाषां प्रकाशित थी थी शव्दकोश मुंकाः दयेकातःगु व थुकी २९ हजार सिबें आपा नेपालभाषाया शव्द व अर्थ दुथ्यानाच्वंगु दु ।आ तक्क झिगू सफू डिजिटाइज याना वेबसाइटय् नेपालभाषाया खँत्वाः खँभाय्, मस्तय्गु नां, जानकारीमूलक क्वीज नं तयातःगु दु । थुगु शव्दकोशया निर्माण दबुलि नांया संस्थां याःगु खः ।
