आख्यानकार मथुरा साय्मिया परिकल्पनाय् नःलि पत्रिकाया ग्वसालय् ‘त्रास’ चिबाखं कासाया लिच्वः च्यानल एस मार्फत सार्वजनिक जूगु दु । विद्यमान कोरोनाभाइरस ल्वय्या हुनिं थुगुसीया त्रास बाखंया टिभिच्यानल माध्यमं जूगु खः ।
मुक्कं ४८ म्ह भाजु बाखंच्वमि व २७ म्ह मय्जु बाखंच्वमिपिनिगु ब्वति दुगु उगु कासाय् उत्कृष्ट बाखंया मिजं च्वमिपाखे भाजु राश जोशी व हःपाः सिरपा संजीप प्रधानं त्याकूगु दु । मय्जु पुचःपाखें उत्कृष्ट बाखं दिब्या बज्राचार्य व व हःपाः सिरपा सुनिता मानन्धरं त्याकूगु दु ।
उत्कृष्ट सिरपा ३०००/– तका व हःपा सिरपा १५००/– लिसें हनापौ परिकल्पनाकार मथुरा साय्मिं एसीइ च्यानलया स्टुडियोलय् लःल्हानादीगु खः । ब्वतिकाःपिं सकसिनं थःपिनिगु हनापौ कायेत नःलि पत्रिकाया ज्याकुथि स्वापू तयादीत इनाप याना दील । उत्कृष्ट बाखंया ल्यज्या मिजं पुचःया निंतिं साहित्यकार भूषण प्रसाद श्रेष्ठ व मय्जु पुचःया निंतिं ल्यज्याः डा. रिना तुलाधरं यानादीगु खः । १२ म्ह अप्रतियोगि बाखं नाप यानाः मुक्कं ८७ म्ह बाखंच्वमिपिनिगु कृति ‘नःलि’ पत्रिकाय् प्रकाशित जूगु दु ।
ज्याझ्वया औपचारिकता बिइगु झ्वलय् त्रास चिबाखं कासाया संयोजक दर्शनवीर शाक्यं कोरोना भाइरसया ल्वचं कयाच्वंगु लकसयात साहित्यया माध्यमं पितबिइगु आज्जु सहित थुगु कासा न्ह्याकागु खँ तयादिगु खः ।
त्रास बाखं कासाया परिकल्पनाकार मथुरा साय्मिं थःम्हं नं सामाजिक संजालय् थीथी प्रतियोगिता यानाच्वनागु व व हे झ्वलय् न्हापा नं ‘हिरामोति’ व ‘घाः’ शिर्षकया कासा यायेधुनागु खँ तयादिइगु खः । थुगुसीया सिरपा त्याकुपिनिगु नां घोषणा यायेगु झ्वलय् परिक्षकपिंत च्वमिया नां मतःसे बाखँ जक छ्वयागु व उकिया बाखं लिच्वस मिजं पाखे राश जोशी उत्कृष्ट व संजीप प्रधान हःपाः सिरपा त्याकेत ताःलागु व अथे हे मय्जु च्वमिपिपाखें दिव्या वज्राचार्य उत्कृष्ट व सुनिता मानन्धरयात हःपाः सिरपा लाःगु खँ कनादील ।
चिबाखं निर्णायक पुचःया भूषण प्रसाद श्रेष्ठ व डा. रीना तुलाधरं थुकथं च्वमिपिनिगु नां न्ह्यमथनातःगु बाखंया निर्णय बाखंया लेखनया आधारय् निश्पक्षकथं जूगु खँय् बःबियादील ।
ज्याझ्वलय् सिरपाः त्याकादीपिं रास जोशी, दिव्या बज्राचार्य, सुनिता मानन्धरं बाखं ब्वना न्यंकादीगु खः । संजीप प्रधानं जूम पाखें ब्वति कयादीगु खः ।
ज्याझ्वया ग्वसा खलः लिसें नःलि पत्रिकाया सम्पादक नरेशवीर शाक्यं थुगु ज्याझ्वलं नेपालभासाया बाखं साहित्य विकासय् न्ह्याकाच्वंगु पलाःया मूल्यांङ्कन जुइगु विश्वास तयादिसें थुगु कासा तःजिक ताःलाकेत ब्वति कयादीपिं व ग्वहालि यानादीपिं सकसितं सुभाय् नं द्यछाना दिल ।
