गुलिखे साहित्यकारत जीवंकाछि हे थ्व ख्यलय् च्वना सेवा याना मदया वन, गुलिखे साहित्यकारत छगू झाका खने दयाः लिपा दुसुना वंपिं नं दु । अथे खनेमदया वंपिं साहित्यकारतय्गु बारे आपाः खँ पिदनेगु मयाः । तर नं वय्कःपिन्सं छिनातःगु पलाः ख्वाँय् वास्तविकरूपं हे नेपालभाषा साहित्य विकासया निंतिं लिइमाःगु पलाः जुयाच्वनी । म्हो जक साहित्य च्वया नं थःपिनिगु पलाः ख्वाँय् ल्यंकेत ताःलाःपिं साहित्यकारमध्ये छम्ह नेपालभाषा साहित्य ह्यमि रामहरि जोशी नं खः ।
रामहरी जोशीया नां साहित्यिक ख्यलय् स्वया नं राजनीतिक ख्यलय् बय्बय् जू । राणा शासनया अन्त्यया निंतिं छम्ह योद्धाकथं खनेदुम्ह वय्कःलिपा नेपाल सरकारया मन्त्री नं जुया दिल । तर वय्कःया साहित्य प्रेमं थी थी कृति रचना नं याके बिल ।
रामहरी जोशीया जन्म यल, बखुबहालय् जुगु खःसां थः बाज्या जिमिदार सत्यमानलिसे तराईया सर्लाही जिल्लाया वय्कःया वाल्यकाल न्ह्यात । फुक्कं शिक्षा दिक्षा भारतय् जुल । भारतया स्वतन्त्रता संग्रामया प्रभावं नेपालय् नं राणा शासनपाखे स्वतन्त्र जुइमाःगु मान्यताय् वय्क राजनीतिक गतिविधि संलग्न जुया दिइगु खः।
रामहरी जोशी नेपालभाषा साहित्यिक ख्यलय् न्हू पहःया बाखं व समालोचना च्वयाः पलाः न्ह्याका दिइगु खः । वय्कःया न्हापांगु बाखं ने.सं. १०७२ प्रेम समाधाी पिदंगु खः । साहित्यपाखे हे लगाव दुगु कारणं वय्कःया हिन्दीभाषं छगू कविता सफू पिदंगु दु । खँय्भाषं थःगु आत्मकथा पिदंगु दु ।
नेपालभाषां वय्कलं थी थी पत्रिकाय् सिमित बाखं व समालोचना जक च्वया दिइगु दु । नेपालभाषाय् वय्कःया सफू पिमदंगु खँया वाःचाये का च्वसापासापाखें वय्कःया पिदंगु कृति फुक्कं मुंकाः ‘पलाः ख्वाँय्’ सफू पिथंगु दु । नेपालभाषा ख्यलय् न्हूपहःया बाखं लेखनया शुरुवाट इलय् हे वय्कलं स्तरिय बाखं च्वया दिइगु खः । उकथं हे साहित्यिक कृतिया समालोचनाया शुरुवाट जुयाच्वंगु इलय् वय्कलं नं समालोचनात्भक लेख च्वयाः नेपालभाषा साहित्यया सेवा याना दिइगु दु ।
वय्कःया जीवनकालय् नेपालभाषाया भजन विधाय् मैथली साहित्यया प्रभावयात कयाः नं छगू अनुसन्धान न्ह्याका दिइगु खः तर उकिया प्रकाशन जुइ फूगु मदुनी । नेपालभाषा साहित्य विकासया ख्यलय् वय्कःया योगदान महत्वपूर्ण खनेदु । वय्कःया लेखन विधायात अनुशरण याना नं नेपालभाषा साहित्यया अनेक कृतित पलाख्वाँय्कथं नाले फइगु वासतविकता खः । वय्कःया थुगु योगदानयात सफूया स्वरूप बिया च्वसापासापाखें न्ह्यथनेबहःगु पलाः छिउगु दु ।
