न्ह्यः खँ
नेवाःतय्गु संस्कार व संस्कृति, नखः धुनेवं हे थःथितिपिं सःताः नकेगु नखत्याया स्वरूप थौं कन्हे छु जुयाच्वन धैगु तसकं मार्मिक विषय वस्तुइ निर्माण यानातःगु चिहाः संकिपाः खः, नखत्या । ज्योति म्यूजिकया युट्युब च्यानलय् अपलोड जूगु थुगु चिहाः संकिपा खः । न्हापांखुशी थुगु टिमं छगू शर्टफिल्म निर्माण याःगु दु । थ्वसिबें न्ह्यः आपलं हे नेवाः म्यूजिक भिडियो त निर्माण यानाच्वंगु खः । प्याखँया स्क्रीनप्ले, बाखं व निर्देशन विश्वास बज्राचार्यं यानतःगु दु । विश्वास बज्राचार्य थ्व सिबें न्ह्यः छम्ह म्यूजिक भिडियो निर्देशक व म्ये च्वमि कथं नं म्हसियाच्वंगु खः ।
नखत्या
नखत्या – चिहाः संकिपा, छगू परिवारया बाखँ कथं न्ह्यब्वयातःगु दु। तर थुगु परिवार स्वनिगःया हरेक परिवारया प्रतिनिधित्व यानाच्वंगु बाखं कथं न्ह्यब्वयातःगु दु । थौं कन्हे स्वनिगःया ल्याय्म्ह पुस्ता नेपाःगाः त्वताः वनाच्वंगु अवस्थाय् झीगु सभ्यता, झीगु संस्कार व संस्कृतिया अवस्था गुलि झिझांमझां दँ धकाः न्ह्यब्वयाच्वंगु दु । ओपनिंग शटय् प्याखँया मू कलाकारपिं रवि डंगोल व अर्णेश्वरी शिल्पकारया ख्वाः खिउँसे च्वं । कारण खः इमिगु छेँय्या जः, इमि काय् जात्राया इलय् विदेशय् । छेँय् नखःया माहौल दुसां काय् मदइगु इलय् नखःया माहौल तसकं हे निराश जुइ । पुलांगु खँ लुमंकाः मांम्हेसिया व छेँय् जःया नुगः तसकं हे ख्वः । थ्व हे निगु माहौलयात दानाः क्यनाः हे चिहाः संकिपाः क्वचाइ । प्याखनय् कलाकारकथं रवि डंगोल, अर्णेश्वरी शिल्पकार, भिषुमराज शाक्य, रविना तुलाधर, लक्ष्मीकुमार महर्जन थें जाःपिं नेपालभाषा ख्यलय् लोकंह्वाःपिं कलाकार दु । गेष्ट एपिरेन्सया रूपय् इभेन्जिला तुलाधर नं दु । वय्कः नेपालभाषा ख्यःया नांजाःम्ह निर्देशक सुरेन्द्र तुलाधरया म्ह्याय् नं खः । छगू कथंया मल्टीस्टार कास्ट थुगु चिहाः संकिपाय् दुथ्यानाच्वंगु दु ।
विश्लेषण
नखत्या चिहाः संकिपाःया बाखं झीगु हे समाजया बाखं कथं नाले माः । हरेक छेँय्या परिवेश थुगु चिहाः संकिपाः पाखें प्रतिनिधित्व यानाच्वंगु वाः चाइ । थौंकन्हे छेँय्खा पतिकं न्हू पुस्ता विदेशय् मवंपिं हे मदये धुंकल । थथे युवा जनशक्ति देशं हे पिहांवनेगु इलय् झीगु लकस हे तसकं म्हाइपुसे च्वने धुंकल धैगु सन्देश थुगु चीहाः संकिपा पाखें बिइगु कुतः यानाच्वंगु दु ।
थौंया युवा पुस्ताया मन हे थन मच्वंसे विदेशय् वनेगु आज्जुइ प्यपुने धुंकल धैगु सन्देश नं थुकी दु । नयेत्वने, छेँय्, सीप, थःगु मतिना व मां अबु सकतां पुवंक जीवन हनेगु लकस दुसां न्हू पुस्ताया मन विदेशय् वनेगु जुयाच्वंगु दु । तर थथे छाय् जुयाच्वन धैगु च्यूता झीसं तयेमफूनि । ल्याय्म्ह पुस्ता जात्रा, नखः चखलय् नं भ्यलय् पुनाच्वगु दु । तर थन हे ल्याय्म्हतय्त आकर्षक जुइगु कथंया योजना मदु धैगु चिन्तन थुगु चिहाःसंकिपा पाखें क्येनाच्वंगु दु ।
शर्टफिल्मया फर्माय्टय् थुगु प्याखँ न्ह्यानाच्वंगु दु । अमूर्त सन्देश लिसें खनेदुगु ब्व सिबें खने मदुगु खँ थुगु शर्ट मूभिइ आपलं हे दुथ्यानाच्वंगु दु । छम्ह मांया ख्वयाच्वंगु नुगः, बौपिनिगु मतिना, छेँया लकस व छम्ह ल्याय्म्हया उद्देश्य थुकी थौंया परिवेशकथं न्ह्यब्वयातःगु दु ।
थुगु चिहाःसंकिपाया मेगु दकलय् सशक्त पक्ष कथं प्याखँया अन्तय् न्ह्यब्वयातःगु म्ये खः । प्याखँया निश्कर्ष हे जि हेरा बोलया म्ये जुयाच्वंगु दु । थुगु म्ये थौं कन्हेया दकलय् लोकंह्वानाच्वंम्ह म्ये हालामि रोजमान महर्जनया सलय् दु । थुकीया म्ये च्वमि नं विश्वास बज्राचार्य हे खः । म्येया संगीत कान्छा बुद्ध अकेलाया खः । म्येया मार्मिकतां थुगु चिहाः संकिपायात अझ नं जीवन्त यानाब्यूगु दु ।
रचनात्मक आलोचना
नखत्या छगू परिवारया बाखं थें खने दुसां वास्तवय् थ्व झीगु देय्या हे बाखं खः । प्याखँया मू कलकार भिशुमराज शाक्यया विदेश वनेगु मोहया कारण छु धैगु खँ क्यनेफुगु जुसा अझं थुगु चिबाखँ सशक्त जुइगु खः । राजनैतिक कारण वा देशया हे व्यवस्थाय् छुं समस्या दुगु खः धकाः नं क्यने मागु खः । छाय्धाःसां भिशुमया छेँय् दु, शिप दु, परिवार दु, समाज दु, अझ थः योम्ह मतिनामि नं दु । सकतां सकतां दयाः नं छाय् विदेश वनेमाःगु जुइ वा वयाः उद्देश्य छु खः धैगु क्यंसा अझ ध्वाथुइगु खः । थ्व सकतां पनेगु निंतिं केवल मांया ख्वःगु नुगः न्ह्यब्वयातःगु दुु । विशुमयात लुमंकीम्ह धैम्ह वयाः हे मां छम्ह हे जक थें खने दयाच्वंगु दु ।
बाखंच्वमिं थुगु बाखँयात पुवंक न्याये यायेमफूगु खँ वाः चाइ । छाय्धाःसां न्हूगु पुस्ता यदि विदेश वनां आखः ब्वं वंगु खंसा वं थःगु सुरक्षित भविष्यया निंतिं छुं कुतः यानाच्वंगु दु धैगु नं सन्देश वनिं । थन केवल नखःचख व जात्रा जक हे दु धैगु नं सन्देश वनाच्वनिं । तर व सिबें नं तःधंगु खँ धैगु थौंया परिवेशय् नखः चखः वा छुं छगू खँ जुसां परिवार व न्हू पुस्ता भिडियो कल याना खँल्हाबल्हा यानाच्वंगु नं जुइ । थुगु प्लट जक दुसा नं प्याखँ अझं जीवन्त जुया वनी तर छक्व विदेश वंम्ह काय् खः वा गनं दुर्घटनाय् लानाः मदुम्ह काय् थें हे मांम्हेसिया नुगः ख्वयाःच्वं गुकिं प्याखँयात माःगु सिबें ओभर ड्राम्याटिक दयेकेत स्वयाच्वंगु वाः चाइ ।
थुगु प्याखँया मेगु दकलय् तःधंगु समस्या धैगु थुकीं टाइमलाइनयात स्टाय्ब्लिश याये मफू । नन् लिनियर तरिकां प्याखँ न्ह्यानाच्वंगु दु तर गन रियल टाइम व गन फ्लायश ब्याक धैगु स्टाय्ब्लिश याये मफू । थ्व हे कारण प्याखँ स्वःपिन्त तसकं अलमल जुइ ।
लिखँ
समग्रय् धायेगु खःसा थुगु चिहाः संकिपालं अज्योगु विषय वस्तु ज्वनाच्वंगु दु गुकिं हरेक नेपाःमि ग्रषित जुयाच्वंगु दु। थुगु बिषयवस्तुया कारणं हे स्वकुमिया मन खुल्ल मिनिगु स्वभाविक खँ खः । प्याखँया अन्तय् दुगु म्यें यानां प्याखँ सार्थक जुयाच्वंगु दु । थौंकन्हेया ज्वलन्त विषय बस्तुइ प्याखँ निर्माण जुयाच्वंगु छगू बांलाःगु खँ खः । प्याखँ अझं लोकंह्वाइगु खँय् शंकाः मदु ।
