नेपालभाषाया निपू म्यूजिक भिडियो गुलि हिसि दुम्ह भाजु व पुलुक्क खनेवं बोलया निपू म्यूजिक भिडियोया प्रिमियर विश्वज्योति सिनेप्लेक्सय् जुल । थुपिं निपुं हे म्यूजिक भिडियोस श्रृजना श्रेष्ठं सः बियातःगु खःसा संगीत मनराजा नकःमिं तयातःगु खः । म्येया निर्देशन सुरज नापितं यानातःगु खः ।
गुलि हिसिदुम्ह मय्जु म्येया च्वमि प्रकाशदीप श्रेष्ठ खः । थ्व छपू पारम्परिक नेवाः म्ये कथं नेवाः बाजं संयोजन यानां दयेकातःगु म्ये खः । म्येया संगीत संयोजन जिवित् जल्मिं यानातःगु दु । थुगु भिडियोस अनुज शाक्य व श्रीजा अवालेया जोडी दु । पुलुक्क खनेवं म्येया च्वमि जनकवि दुर्गालाल श्रेष्ठ खः । थ्व छपू आधुनिक म्ये कथं संगीत संयोजन यानातःगु दु । थुगु म्येया संगीत संयोजन हरिशरण साय्मिं यानातःगु दु । भिडियोस रोजीना सुवाल व भिसुम राज शाक्यया जोडी दु । निपुं म्येया छायाँकन व सम्पादन सोहन मानन्धरं यानातःगु दु ।
ज्याझ्वलय् मू पाहां कथं झायादीम्ह वरिष्ठ संगीतकःमि एवं गायक प्रकाश गुरुङ्गं थौंकन्हे सकलें भाइरल म्ये दयेकेगु पाखे ब्वाँय् वनाच्वंगु दु व झीसं अज्योगु म्ये दयेकेगु पाखे ब्वाँय् जुइ मज्यु धकाः थःगु नुगः खँ प्वंकादिल ।
वरिष्ठ सिनेपत्रकार बिजय रत्न असंबरें निपुं म्येया समिक्षा यानादिल । वय्कलं नेवाः म्येत नेवाः युट्युब च्यानलय् तयेमाःगु इनाप यानादिल ।
संगीतकःमि मनराजा नकःमिं थुपिं म्येय् यक्वसिया हे मंकाः कुतः दयाः बांलाःगु खँ धयादिल । भिडियो दयेकबलय् अडियोया महत्व नं न्ह्यब्वयेफयेमाः धकाः बिचाः प्वंकादिल ।
वरिष्ठ म्येहालामि संगीता शाक्यं म्येया तारिफ याःसें श्रृजना श्रेष्ठं निरन्तर म्ये हालाः वनेमाःगु सुझाव बियादिल ।
वरिष्ठ आधुनिक व पप् गाय्क ओमविक्रम विष्टं निपू म्ये विपरित धारया म्ये जुसां तसकं मनमोहक जूगु खँ तयादिल ।
ज्याझ्वः वरिष्ठ म्येहालामि जुजुकाजी रंजितया सभापतित्वय् क्वचाःगु खः ।
