नेपालभाषाया म्यूजिक भिडियाे ख्यलय् अतिकं सकृय व क्रियाशील जुयाःच्वंम्ह माेहन शाक्यया हाकनं छपू न्हूगु म्यूजिक भिडियाे विश्वज्याेति सिनेप्लेक्सय् प्रिमियर जुल । मतिनाया डुंगा बाेलया थुगु म्यूजिक भिडियाेस माेहन शाक्ययात शर्मिला वर्देवां साथ बियाच्वंगु दु ।
थुगु म्येया शुटिंग अस्ट्रेलियाय् यानातःगु खःसा म्येया निर्देशन व काेरियाेग्राफी माेहन शाक्यया म्ह्याय् माेनिका शाक्यं यानातःगु खः । थुगु म्ये चण्डेश्वर महर्जनं च्वयातःगु खःसा म्येया संगीत मनराजा नकःमि तयातःगु खः । म्येया संगीत संयाेजन मनाेहर सुनामं यानातःगु दुसा थुगु म्ये आर्टाेम्यूज रेकर्डिंग स्टुडियाेस रेकर्ड यानातःगु खः ।
नांजाम्ह म्येहालामि जुजुकाजि रन्जित मूपाहाँ कथं झायादीगु उगु पितब्वज्या ज्याझ्वलय् मूपाहाँ रन्जितं नेपालभाषाया संगीतख्यः थौंकन्हे थहाँ वया च्वंगु व लोकंह्वाना वया च्वंगुलिं लसता प्वंकादिल तर नेवाः ख्यलय् आपालं संघसंस्था दुसां थ्व ख्यःया बिकास यायेत व तिबः बिइत छुं नं संघसंस्था पलाः ल्ह्वना च्वंगु मदु धका धयादिल ।
वरिष्ठ सिने पत्रकार विजयरत्न असंबरें म्युजिक भिडियोया समीक्षा यानादीगु उगु ज्याझ्वलय् लोकंह्वाम्ह गायिका संगीता शाक्य थापा, सन्चारकःमि व संकिपा निर्देशक राम कृष्ण खडगीं नं नुगःखँ तयादीगु खःसा जरिना शाक्यं लसकुस व मोहन शाक्यं सुभाय् न्वचु तयादीगु ज्याझ्वः संगीतकार मनराजा नकःमिया सभानायसुइ जूगु खः ।
थुगु म्येय् मोनिका शाक्य , प्रोजोल महर्जन , सुशील महर्जन व रोजिना महर्जन म्हिताच्वंगु दु । भिडियोया शुटिंग अष्ट्रेलियाया थीथी थासय् यानातःगु दु ।
