नेपालभाषा म्यूजिक भिडियो व संकिपा ख्यलय् छगू स्थापित जुइ धुंकुम्ह आराध्या लक्ष्मी खड्गी आः खस् नेपाली भाय्या संकिपाः “आमा आज पनि रुन्छिन्” आवद्ध जुगु दु । थुगु संकिपाया निंतिं प्रोडक्सन म्यानेजर श्री बुढाथोकीलिसे सम्झाैता पत्रय् साइन याःगु दु । थुगु संकिपाः “आमा आज पनि रुन्छिन्”य् विशुद्ध पारिवारिक संकिपा व मांया चरित्रय् केन्द्रीत जूगु जानकारी बियादिसें उगु संकिपालय् वरिष्ठ कलाकार गाैरी मल्लया मू भुमिका दुगु खँ कंगु दु । लिसेें थुगु संकिपाया छायांकन इलामलिसें कोशी प्रदेश अन्तर्गतया थीथी जिल्लाय् जुइगु व फागुन महिनाया लिपांगु वाःनिसें जुइगु नं धाःगु दु ।
आशुँ अशेष गिरीया निर्देशनय् दयेकेत्यंगु “आमा आज पनि रुन्छिन्” संकिपाया निर्माता गिर्वाण विजय खड्का खः ।
सामाजिक बाखनय् आधारित थुगु प्याखनय् मुस्कान पौडेल व धिरेन शाक्यपिं नं दुथ्याः दु सा नांजाःपिं बरिष्ठ कलाकार सरोज खनाल, रविन्द्र झाः लिसें न्हूप्रतिभा कलाकार सुदीप शाह ठकुरी, रिदेन बानियाँ, खलकलाकारया भूमिकाय् आर.एन. पौडेल दु ।
संकिपाय् म्येच्वमि, पटकथा व संवाद गणेश सुवेदीया दुथ्याःगु दुसा संगीत सचिन गिरीया दुथ्याःगु दु । थुगु संकिपा २०८२ सालया मोहनी नखः ताकाय् प्रदर्शनय् हयेगु आज्जु निर्माण पुचलं तःगु दु ।
