राष्ट्रिय समावेशी संगीत पुरस्कार (एनआईएम अवार्ड्स) २०२५ या च्याक्वःगु संस्करण भव्य रुपं क्वचाल । पावर इन्टरनेशनल मिडिया नेपाल (पिम नेपाल)या ग्वसालय् अवार्ड ज्याझ्वःयाःसें आपालं सर्जकपिंत सम्मान याःगु खः ।
नेपालय् ल्हाइगु सकतां हे भाय् राष्ट्रभाय् खः धैगु मुल्य व मान्यताय् थुगु अवार्डया आयोजक एवं पिम नेपालया अध्यक्ष माधवराज खरेलं वंगु च्यादँ निसें थुगु अवार्ड न्ह्याकाच्वंगु खः । थुगु संस्करणया नेपालभाषा विधाय् पेजथ्री बाःछिपाैया सम्पादक दर्शनवीर शाक्यया निर्देशनय् नाप च्वने मदुसां म्ये सर्वाेकृष्ट म्ये जुइत ताः लाःगु दु ।
ज्याझ्वलय् नेपालभाषाया उत्कृष्ट गीतकार सुरजवीर बज्राचार्यया नक्कलिम्ह मय्जु, नेपालभाषाया उत्कृष्ट संगीत संयोजक सानुबाबु महर्जनः मस्यू जित छुजुछुजु, नेपालभाषाया उत्कृष्ट म्येहालामि राजकुमार मानन्धरः दः पिनी द्यः ब्वयेकी, नेपालभाषाया उत्कृष्ट माेडल पाखे सुदीत श्रेष्ठया कतांमरिया रुप छंगु म्ये पाखें अवार्ड त्याकुगु खः ।
वन तथा वातावरण मन्त्री ऐनबहादुर शाही ठकुरी, पिम नेपालया सल्लाहकार व नेपाल चलचित्र कलाकार संघया नायः मोहन निरौला, अभिनेत्री चैत्यदेवी सिंह, बसुन्धरा भुसाल, गायिका देविका बन्दना, प्रहरीया अतिरिक्त महानिरीक्षक एवं गीतकार टेक तामाङ, डा. सुभाष घिमिरे, संगीतकार जुगल डंगाेल व बिजयरत्न असंबरे लिसें आपलं ब्यक्तित्वपिंसं अवार्ड लः ल्हानादीगु खः ।
बरिष्ठ संगीतकःमि सुरेश अधिकारीयात ‘संगीत रजत सिरपाः’ व पत्रकार करिष्मा केसीयात ‘संगीत पत्रकारिता सिरपाः’ लःल्हाःगु खः । पिम नेपाल विशिष्ट चलचित्रकर्मी अवार्ड कलाकार उत्तम केसी, टेलिभिजन मिडिया पर्सन अवार्ड राज श्रेष्ठ, संगीतकःमि केशव पौडेलयात डायस्पोरा अवार्ड, युवा प्रतिभा सिरपाः (गीतकार/पर्वतारोही) पुरुषोत्तम सानु, युवा उद्यमी अवार्ड सुरेश कार्कियात युवा उद्यमी अवार्ड, व लाेक गायक सुशील ज्ञवाली लिसें अनिता कुँवरयात नं सम्मान याःगु खः ।
वंगु ८ दँ न्ह्यःनिसें “नेपाली जुया गर्व यायेनु, कला संस्कृतिया संरक्षण यायेनु” धइगु मू नारा ज्वनाः न्ह्याका वयाच्वंगु थुगु सिरपाः ७ गू भाषालिसें मुक्कं ४० गू विधाय् ५३ म्हेसित लःल्हाःगु खः ।
नांजाःम्ह संगीतकःमि सन्तोष श्रेष्ठया संयोजकत्वय् जूगु निर्णायक समितिइ संगीतकःमि जुगल डंगोल, संचार व्यक्तित्व विजयरत्न असंबरे, तुलसी गिरी “भवुक”, साहास शाक्य, अमृत खाति, मोडलराज टाइगर, केशवराज भट्ट दुथ्याःगु खः ।
प्रतिस्पर्धा स्वयां नं फुक्क भाषाया कलाकारतय्त सामूहिक दबू दयेकेगु व आत्मीयता, भ्रातृत्व, एकताया सन्देश न्यंकेगु आज्जुं थुगु सिरपाःया ग्वसाः ग्वयाच्वनागु आयोजक पिम नेपालया नायः माधवराज खरेलं धयादीगु दु ।
