सामाजिक संजाल फेसबुक थौं कन्हे नेशनल स्टार म्युजिक भिडियो अवार्डस् या नोमिनेशन लिच्वलं हलचल जुयाच्वंगु दु अले मुख्य ज्याझ्वःयात कयाः नं सकलें नेवाः कलाकारपिं उत्साहित जुयाःच्वंगु दु । नेपालभाषा ख्यलय् सकृय रूपं नेपालभाषाया कलाकारपिंत सम्मान यायेमाः धकाः न्ह्यचिलाच्वंगु थुगु अवार्डया थ्व स्वंगूगु संस्करण खः । थुगु अवार्डं नेवाः कलाकारपिंत नं छगू उत्साह ब्वलंकूगु दु ।
निन्हु स्वन्हुया अन्तरालय् थुगु अवार्डया निगू स्वंगू नामांकन सामाजिक संजालय् लिच्वः पिदनाच्वनेवं हे सामाजिक संजालय् भिंतुनाया माहौल ब्वलनाच्वंगु खः । नेपालभाषा ख्यलय् थुलि जुयाच्वंगु नं छगू कथंया सकारात्मक उर्जा ब्वलनाच्वंगु हे तायेके माः ।
छगू निश्चित श्रोत साधनं थुलि न्ह्याकाच्वंगु कुतः नेपालभाषाया मनोरंजन ख्यःया निंतिं अतुलनीय योगदान हे खः तर नं आपलं हे कलाकारपिं थज्योगु गतिविधिइ धाःसा समान रूपं ब्वति कया मच्वंपिं नं दु । नेपालभाषा ख्यलय् थःपिंसं याना वयाच्वनागु ज्याखँया योगदानया मूल्यांकन छखें प्रतिस्पर्धात्मक रूपं जुइ वा यायेमाः धैगु खँय् सकलें हे सचेत जुया मच्वंगु नं वाः चायेकेमाः । गुलिं गैर नेवाः भाषाया अवार्ड ज्याझ्वःया मूल्यांकन विधिइ वयाच्वंगु विकृतिया तालाजुइ नं सकतां हे ज्याझ्वःयात लनेगु मानसिकता नं झीके दयाच्वंगु खनेदु ।
नेपालभाषा मनोरंजन ख्यःयात कःघानाः ज्याझ्वः यायेगु वा जुइगु ला तसकं हे म्हो । ज्याझ्वः हे जुल धाःसां छगू निश्चित घेरा दुने हे जक जुइ तर थज्योगु अवार्ड ज्याखनय् धाःसा सार्वजनिक रूपं हे आह्वान जुइ । सायद आपलं नेपालभाषाया कलाकारपिंसं व्यवसायिक रूपं थःगु लजगा न्ह्याके मफूगु, मसःगु वा चाहे मजूगु कारणं नं थुकथंया ज्याखँया महत्वयात थुइके मफुयाच्वंगु जुइफु उकिं आपलं कलाकारपिं गम्भीर जुयाः थज्योगु गतिविधिया सार्वजनिक ज्याखनय् औपचारिकता जक पुवंकेगु कुतः याइ । तर थुकीया आयोजक खलकं धाःसा न्हिं चा मधाःसे ज्याखँ यानाच्वंगु दइ । छखे जक मखुसे प्यख्यरं हे स्वयाः पलाः न्ह्योक मालाच्वंगु दइ ।
नेपालभाषा ख्यलय् स्वयेगु हे खःसा थुगु स्टार म्यूजिक अवार्ड न्ह्यो पेज थ्री पिपल्स च्वइस अवार्ड नं नेपालभाषाया उत्थानया निंतिं हे यानावयाच्वंगु खः । यदि थज्योगु अवार्ड कथं पेजथ्री व स्टार म्यूजिक भिडियो अवार्ड मजूगु खःसा शायद मेपिंसं यानाच्वंगु अवार्ड ज्याझ्वलय् छगू तँसा अवार्ड कथं छपू निपू म्येय् झी सिमित जुयाच्वने मालिगु खइ । तर पेजथ्री पिपल्स च्वइस अवार्ड व नेशनल स्टार म्युजिक भिडियो अवार्डस् या ज्याझ्वलं यानाः थौं नेपालभाषा ख्यः शान यानाः हे मेमेगु भाय् या अवार्डय् थें नेवाः कलाकारपिं नं दबुलिइ दने खनेदयाच्वंगु दु । थज्योगु गौरव याये बहःगु खँयात नेवाः कलाकरपिं, ब्वति काःपिं व ब्वति मकाःपिं, नोमिनेशनय् लाःपिं वा मलाःपिं अले अवार्ड हे त्यापिं व अवार्ड मत्याःपिंसं सदां साथ बियाः हे च्वनेमाः । हरेक ज्याखँय् ब्वति कायेमाः । थःगु म्हसीका न्ह्यब्वयेमाः ।
नेपालभाषा ख्यलय् सुयांगु योगदानया मूल्यांकन यायेगु हे खःसां सुं छम्ह मनुखं याःगु ज्याखँ यदि हुयाःछ्वत धाःसां उकिं झीगु ख्यलय् छुं असर याइ वा याइ मखु धैगु मूल्यांकन याना स्वयेगु खः । यदि नेपालभाषा ख्यलय् सुनां थथे अवार्ड हे याना मब्यूगु जुसा छु जुइगुया विश्लेषण सहि रूपं यायेमाः । नेपालभाषा मनोरंजन ख्यःलिसे स्वानाच्वंगु हरेक ज्याखँय् झीसं स्वच्छ मनं ब्वति काये हे माः । नेवाः ख्यलय् न्ह्यानाच्वंपिं कलाकारतय्सं वाः चायेके फयेमाः ।
