न्ह्यः खँ
यल १६ वडा कलाकार समितिं नेपालभाषाया कला ख्यलय् समर्पित यल वडाया छगू कवः खः गुकी नेपालभाषाया कला क्षेत्रय् थी थी कथंया गतिविधि यानाः वयाच्वंगु दु । थुगु पुचः दुने आपलं हे प्रतिभावान कलाकःमि दुथ्याः गुपिंसं म्ये हालेगु, सांगीतिक ज्याझ्वः यायेगु, कार्यशाला लिसें आः वयाः छगू म्यूजिक भिडियो नं निर्माण याःगु दु गुकियात ध्येबा फुत बाबाः नामं पिथंगु दु ।
अडियो
नेपलभाषा ख्यलय् आपाः धैथे मतिनाया म्ये जुइगु याःसां हास्य रसया म्ये नं आपलं हे दु । ख्यालः विधाय् नेपालभाषाया म्ये छुं कम मजू । थज्योगु हे छगू हास्य रसं जाःगु म्ये खः ध्येबा फुत बा बा । भुपेन्द्र बज्राचार्यया च्वसा, संगीत व संगीत संयोजनय् तयार जूगु थुगु म्येय् गायन कथं भुपेन्द्र बज्राचार्य, अमोघवीर बज्राचार्य, अमर चित्रकार, निल शाक्य, सु्रजवीर बज्राचार्य व अनुप शाक्यया मंकाः सः दुथ्यानाः च्वंगु दु । थौंकन्हेया परिवेशय् मनूतय् ध्येबा गथे यानाः फुनाच्वंगु दु धैगु छगू बःचा धंगु अनुभव कथं न्हिंया न्हिथं जुयाःच्वंगु ज्याखँ म्येग्वलं धयाच्वंगु दु । म्येया संगीत नं छगू कथंया फ्युजन जुयाःच्वंगु दु । पारम्परिक नेवाः बाजं लिसे टेक्नो बिट्स ल्वाकाछ्यानाः तयाःतःगु लिं म्येय् न्हूगु सवाः दुसा म्ये नं न्यनेबलय् न्हाय्पंयात याउँसे च्वं । संगीत संयोजनय् नं हास्य रसय् दुबिनाच्वंगु कारण म्ये न्येने मात्र नं मनोरंजन बियाच्वंगु आभाष जुइ । म्येया मिक्सिंग व मास्टरिंग फिरोज बज्राचार्यं यानातःगु दु ।
भिडियो
ध्येबा फुत बा बा भिडियो नेपालभाषा ख्यःया छगू हास्य भिडियो कथं निर्माण यानातःगु दु । कलाकार कथं थुकी यल १६ वडा कलाकार समितिया हे दुजः व शुभचिन्तकपिं दुथ्यानाच्वंगु दु । तसकं हे बिस्कं कन्सेप्ट बियाः नेपालभाषाया थुगु म्ये दयेकातःगु दुसा थुकी कलाकार कथं भुपेन्द्र बज्राचार्य, अमोघवीर बज्राचार्य, अमर चित्रकार, निल शाक्य, सुरजवीर बज्राचार्य, अनुप शाक्य, सलोना बज्राचार्य, मोइदिन खान आदि दुथ्यानाच्वंगु दु । भिडियोया निर्देशन नं भुपेन्द्र बज्राचार्यं हे यानातःगु दुसा छायाँकन अमर चित्रकारं यानातःगु दु । समाया भाला रूपा मानन्धर व सनम कुमार श्रेष्ठं यानातःगु दु । भिडियोया छायाँकन नं अमर चित्रकारं हे यानातःगु दु । तिरस महर्जनं हुलाप्याखं निर्देशन यानादीगु खः । भिडियोस पाहाँ कलाकार कथं निर्मलरत्न शाक्य, रामकृष्ण खड्गी, किशोरकुमार शाही, मंजिल शाक्य, कृष्णा श्रेष्ठ शाक्यया नं भूमिका दु ।
विश्लेषण
ध्येबा फुत बा बा छगू ख्यालि रसं जायाःच्वंगु म्ये जक मखुसे समाजया यथार्थयात न्ह्यब्वयाच्वंगु म्ये नं खः । ख्यालः विधा धैगु हे समाजय् जुयाःच्वंगु बिसंगति, विकृति व ब्यंग नकेगु निंतिं खः । थुगु हे खँय् थुगु म्येयात याउँक्क व न्ह्यइपुक्क न्ह्यब्वयातःगु दु । म्यूजिक भिडियोस मुक्कं खुम्ह चरित्रयात न्ह्यब्वयातःगु दुसा खुम्हं हे चरित्रयात बिस्कं सः बियातःगु दु अले खुम्हं हे चरित्रयात बिस्कं बिस्कं कलाकारं निर्वाहा यानातःगु दु । म्येय् न्ह्यब्वयातःपिं चारित्रिकरण स्वयेसातकं हे इपिं सु जुइ धकाः अःपुक्क हे म्हसिके फु । छम्ह सामान्य घरायसि मनू कथं भुपेन्द्र बज्राचार्य, मतिनाय् तक्यनाच्वंम्ह अमोघवीर बज्राचार्य, चुनाव त्याकाः नेता जुइत स्वःम्हेसिया भुमिकाय् अमर चित्रकार, कलाकार जुइत स्वयाच्वंम्हेसिया भुमिकाय् नील शाक्य, त्यासा लितकाये मफूम्हेसिया भुमिकाय् सुरजवीर बज्राचार्य व उसाँय् बमलाःम्हेसिया भुमिकाय् अनुप शाक्यं अभिनय यानाच्वंगु दु ।
थ्व सकतां हे कलाकारयात छगू सुत्रय् चिनातःगु कथं ध्येबा क्येनातःगु दु । घरायसि मनूयात बजाः भाः थहां वनां न्हिंया न्हिथं भूतु ज्वलं तकं न्यायेत ध्येबां सास्ति यानच्वंगु दु । ल्याम्ह मनूयात ल्यासे नाप चाःहिलेगु निंतिं दां मगानाःच्वंगु दु । नेताः जुइत छेँय् बुँ बरः तयाः नं खर्च यानाः नं भोट मवयाःच्वंगु, थःम्हं ध्येबाः खर्चयानां प्याखँ दयेकाः नं फिल्म फल्प जूगु, त्यासाः ब्यूम्हेसिके ध्येबा लित काये मफूगु व उसाँय् बाँमलाःगु कारण क्लिनिकय् यक्व टेष्ट व वासःलय् खर्च यायेमाःगु जुयाःच्वंगु दु । ध्येबां हे थुपिं फुक्कं चरित्रयात स्वानाःच्वंगु दु। गुलिं ध्येबाः थःगु आधारभूत खँय् मगानाः च्वंगु क्येनातःगु दुसा गुलिं ध्येबा धाःसा थःगु शौखय् खर्च यानाच्वंगु क्येनातःगु दु तर नं थ्व ध्येबा गन वन वा सुयाथाय् वन धकाः न्ह्यब्वयातःगु खने मदु ।
म्ये च्वयेगु झ्वलय् ध्येबा फुत बा बा धकाः छगू हुक लाइन नं च्वयातःगु दु । म्येया संगीत संयोजन नं थुगु हूक लाइनय् तसकं कर्ण प्रिय जुयाःच्वंगु दुसा म्येय् ल्वयेक हे कोरियोग्राफि नं तिरस महर्जनं यानातःगु दु । छगू हास्य रस व ख्यालिं जाःगु मनोरंजनात्मक भाव थुगु हुक लाइनं बियाच्वंगु दु ।
म्येय् लोकेशनया भेराइटी बियातःगु दु। माःगु कथंया लोकेशन ल्येयाः तःगु दु । गुकिंयानां चरित्र च तसकं हे प्रभावकारी जुयाःच्वंगु दु । थुकिया निंतिं म्येच्वमि, संगीत, संगीत संयोजक, कलाकार, गायक, परिकल्पनाकार, धकिंबाखं व निर्देशक भुपेन्द्र बज्राचार्यया न्ह्याक्व तारिफ याःसां मगाः । हरेक कलाकारयात माःगु कथंया वसः बियातःगु दु । समग्रय् धायेगु खःसा थुगु म्येयात छगू बांलाःगु मनोरंजन बिइत ताः लानाच्वंगु दु ।
रचनात्मक आलोचना
ध्येबायात मू पात्र यानां दयेकातःगु थुगु म्येय् ध्येया महत्व वा ध्येबाया कारणं ब्वलंगु ला क्येनातल तर थ्व ध्येबा खर्चयायेत छाय् म्हो जुल वा थःगु हे कारणं ध्येबाया सत्यानास जुयाःच्वन धकाः नं छगू कोणं क्येने माः । छेँय् खर्च यायेत ध्येबा म्हो जुगु खःसा व बजाः भाः व सरकारया करया नीतिं जुयाःच्वनिं । गर्ल फ्रेन्ड लिसे चाःह्युवनेगु खःसा न्हापां थःम्हं ध्येबा निं कमे याये सयेके माल । पासापिंसं ह्वानाःतुं चुनावय् दनेगु सिबें थःके समाज हिलेगु निंतिं छुं योजना दुम्ह वा सामाजिक ज्याय् सक्षम जूम्ह जुइ माल। कलाकारिताया बारे छुं मस्युपिं तर ध्येबा पानाः हिरो जुइ धकाः वःपिं सदां हे द्याइगु खः । ध्येबाया कारोबार यायेत छुं लिखित भ्वँ मदयेवं सुनानं ध्येबा लित बिइत आनाकानि याये फु । अले अय्ला त्वनाः ध्येबा फुके फुम्हेस्यां वासः यायेत ध्येबा फुत धकाः कुँखिनाच्वनेगु छगू ल्याखँ ध्येबायात ध्येबाया रूपय् स्वयेगु सिबें नं छगू मानवीय कमजोरी थें खने दु ।
ध्येबा फुसां ध्येबाया श्रोत गनं गुलि दु धैगु नं जुइ । अले ध्ये फुगु हे खःसा व ध्येबा गन वन धकाः नं क्येनेमाःगु आवश्यकता जुयाःच्वनिं छाय्की हुक लाइन हे ध्येबा फुत बा बा धकाः जुयाःच्वंगु दु । ध्येबायात म्हसिके मफूत धाःसा ध्येबां नं झीत म्हसिइ मखु ।
लिखँ
किपूया किर्तिपुर सिनेप्लेक्सय् थुगु म्येया डबल प्रिमियर जूगु दु । थ्व सिबें न्ह्यः नं फेब्रुअरी १४खुन्हु यलया मंगल बजारय् कुमाः सागरया कन्सर्ट जूगु इलय् थुगु् म्ये प्रिमियर जूगु खः । भिडियोया अन्तय् यलया १६ वडा अध्यक्ष भाजु निर्मल रत्न शाक्यया गेष्ट अपिरियन्स नं जुयाःच्वंगु दु । थुगु म्यें झीगु समाजय् झीसं गथे गथे यानाः ध्येबाः फुकाच्वंगु दु धैगु छगू न्ह्यइपुसे च्वंगु मनोरंजनात्मक सन्देश जुयाःच्वंगु दु । गुकियात सकस्यां मनन याये माः ।
