न्ह्यखँ
नखःचखःया इलय् हे नेवाः मनोरंजन ख्यलं न्ह्याब्लें हे विशेष ध्यान तयाः हे छुं नं छुं रचनात्मक कृति न्ह्यब्वयेगु यानाच्वनेगु याः । इतिहासया पानाय् नं पुइकाः स्वल धाःसा न्हापा न्हूदँया इलय् नेवाः म्यूजिक भिडियो, नेवाः म्ये, नेवाः संकिपाया सिडि, डिभिडि मिइगु ज्याखँ जुयाच्वं । थुगुसी नेपाल संवत् ११४५या लसताय् छगू शर्ट मुभी ‘किजापुजा’ पिदंगु खः गुगु झीगु हे नखःया महत्वयात च्वन्ह्याकाः न्ह्यब्वयातःगु शर्ट भुभी खः ।
किजापुजा
किजापुजा शर्ट मूभीया नां कथं हे थ्व मात्र छगू हे विषयलय् केन्द्रित जुयाच्वंगु प्याखँ खः । दाजु व केहेँया स्वापु क्यनाच्वंगु थुगु शर्ट मुभीइ किजापुजाया विशेष दिंया महत्व न्ह्यब्वयातःगु दु । छगू परिवारय् अबु, काय् व म्ह्याय् दइ । तर थुगु परिवारय् छगु विड्म्बना पूर्वक घटनां यानां परिवार कुचा जुयावनिं । समाजय् काय्म्हं मखुगु ज्या यात धकाः सजाँय् बिइवं परिवार कुचा जुइ । काय्म्हं थथे छुं मखुगु ज्याखँ मयाना धकाः बारम्बार धाःसां थः हे अबुम्हं तकं पत्याः याइ मखु । केवल वयाः हे केहेँम्हेसिनं जक हे पत्याः याइ । अले किजापुजाया हे दिन लाका केहेँम्हेस्यां थः दाजु निर्दोष खः धकाः प्रमाणीत यानाः हाकनं व परिवार मिले जुइ ।
तसकं हे सामान्य खँयात कयाः झीगु संवेदनशीलता यात प्याखँ मार्फत न्ह्यब्वयेगु ज्या जूगु दु । झीगु हे समाजय् जुइगु थें जाःगु वा झीसं हे खनाच्वनाःगु थें जाःगु घटना थुकी न्ह्यब्वयातःगु दु ।
कलाकार
कलाकार कथं थुकी स्वम्ह मूख्य पात्र दु । काय्म्हेसिया भुमिकाय् सामाजिक संजालय् लोकंह्वाःम्ह पुजल बज्राचार्य दु । यक्वस्यां वय्कःयात ग्वाज्यः चा धकाः नं म्हस्यु । अबुया भुमिकाय् मेम्ह लोकंह्वाःम्ह कलाकार सन्देश शाक्य दु । सन्देशयात आपलं हे टिभि कमर्सियल् झीसं खनाच्वनागु दु सा आपलं नेपाली संकिपाय् हास्य भुमिकाय् म्हिताच्वंगु नं खनेदु । अले केहेँया भुमिकाय् सदिक्षा महर्जन दु । स्वम्हं कलाकरं थःगु भुमिकायात न्याय यायेगु कुतः याःगु खनेदु । प्याखनय् अन्य कलाकर कथं अनिल महर्जन, रूपेश डंगोल, राजीव थापा व पुष्प महर्जन दु ।
थुगु शर्ट फिल्मया परिकल्पना व च्वमि पुजल बज्राचार्य हे खः । अकसर हास्य भुमिकाय् अभिनय जक यानाच्वनिम्ह कलाकार जक मखुसे छम्ह बाखंच्वमि नं खः । प्याखँया डिओपि कथं कर्मेश श्रेष्ठ, नुर्बिन राजभण्डारी व दिनेश महर्जन दु । थुगु शर्ट मुभीया सशक्त पक्ष मध्य थुकीया छायाँकन नं खः । छायाँकनय् तसकं हे मेहनत याना तःगु थुकी खंके फइ । प्याखँया सम्पादन दिनेश महर्जन व नुर्बिन राजभण्डारीं यानातःगु दु ।
विश्लेषण
नेवाः समाज व नेवाः मुल्य मान्यतायात कः घानाः क्यनेगु कुतः थुगु शर्ट मुभी यानातःगु दु। बौ काय् ल्वानाः ब्यागः हे च्वनाच्वंगु खःसां किजापुजाया दिन खुन्हु दाजु व केहेँया स्वापू व मन गथे चिइ थाकुइ धैगु सन्देश थुगु शर्ट मुभिं बियाःच्वंगु दु । झीगु समाजय् झीसं हनावयाच्वंगु नखःचखः हे अप्वः थें खनेदु तर नं दाजु केहेँया स्वापुतिं नं अबु काय्या स्वापू बांलाके फु धैगु छगू नाटकीय बाखँ थुकी दुथ्याकातःगु दु । बाखँया परिवेश तसकं हे सामान्य जुसां थुकी माःगु सिबें आपाः ड्रामाटाइज यायेत स्वयाच्वंगु वाः चाइ ।
शर्टमुभीया ओपनिश सीन प्रभावकारी जु । सामान्य सिबें नं छगू बिशेष प्याखँ स्वयाःच्वंगु अनुभव जुइ । कलाकारपिनिगु अभिनय नं प्रभावकारी जु । कलाकारीताया छाप थुकी बिइत पुजल ताः लाः । छम्ह हास्य कलाकर कथं थःगु छवि दयेकातःगु खःसां पुजल छम्ह सेल्लाम्ह कलाकर खः धकाः थुकी प्रमाणित यानाच्वंगु दु । सदिक्षाया अभिनय नं स्वभाविक यायेत स्वयाच्वंगु दु । तर थुकी सन्देश शाक्य गुलि वयस्क खने दयेमाःगु खः उलि खने दयाःच्वंगु मदु । वय्कःया रोल सिबें भचा ल्याम्ह हे खने दयाच्वंगु दु ।
छेँय् दुनेया कलहयात नं मार्मिक ढंगं न्ह्यब्वयातःगु दु ।
आलोचना
किजापुजा शर्ट मूभि आलोचनात्मक मिखां स्वल धाःसा मेकिंगय् अपाय्सकं कुँ खिनेथाय् मदु । प्याखँ बाखँ तसकं हे सामान्य ढंगं जक च्वयातःगुलिं स्क्रीनप्लेयात अझ भचा रोचक याये फइगु थाय् धाःसा अवश्यं दु । प्याखँ गुलि सल्ल न्ह्यां वने माःगुखः उकियात बिचय् बिचय् दृष्य ताः हाकः यायेगु व च्वमिं धाःथे हिइकाःतःगु अनुभव जुइ । प्याखँया क्लाइमेक्स तसकं हे नाटकीय खनेदु । गुलि टेंशन प्याखनं न्ह्यब्वयाच्वंगु ख उलि अन्तय् क्वातुके मफु। अबु व काय्या मिलनया दृष्य नं भचा ताः हाकः व नाटकीय खने दु। शर्ट फिल्म सिबें नं थुकी भचा भचा थियटरया पह खने दु ।
लिखँ
समग्रय् धायेमाल धाःसा थ्व तसकं हे सेल्लाःगु कुतः जूगु दु नेवाः प्याखँ ख्यःयात छगू नखःया देछाः कथं । किजापुजाया दिन खुन्हु थुगु प्याखँ स्वयेगुया मेगु हे छगू विशेष सवाः दइ । दाजु केँहे तापानाः च्वंपिनि थज्योगु प्याखँ स्वयेगु इलय् मिखा प्यानाः नं वइ । थ्व छगू तसकं बांलाःगु कुतः खः । प्याखँ स्वयेबह जु ।
