नेवाःतय् आराध्य जनबहाः द्यः रथ सालेत हथाय्पथाय्सं भोटाहितिया लँ वंगु दँय् दयेकुगु बुखँ मालास्वःसा आः नं लुइतिनि । स्थानीय सरकारं हे रथ जात्रा यानाः सालेत लँ सम्म याकूगु खः । आः थुगु दँ हाकनं जनबाहा द्यः न्हवं ई थ्यंगु दु । तर न्हापा दयेकातःगु लँ अज्ञान कारणं स्यंकाः लँ दयेकेगु नामय् लँ हे पनाब्यूगु दु । लांलां बिइ धुंकानं दयेके ज्याः क्वचाःगु खनेमदु । निर्माण गति सुस्त ।
थौंकन्हे येँया मू बजाः जुयाच्वंगु असं बजारया स्थिति अति हे दयनीय अवस्थाय् थ्यनाच्वंगु दु । स्थानीय सरकारया सुस्त नीतिया कारण थौं असं थें जाःगु व्यस्त बजारय् लँय् वये वनेगु हे हे समस्या जुयाच्वंगु दु । स्वनिगःया दुने बस्तीया लँ, दँय्दसं हे भिंकेगु नामय् ज्या जुइगु याः । तर छत्वाः लँ हे गतिलाक्क दयेकेगु ज्या मजू । लांलां बिक्क दयेकेगु याःसां थ्व स्थायी जुइ फयाच्वंगु मदु । उकिसनं येँया जात्रा धकाः जनबहा द्यःया रथ सालेत वा येँया इन्द्रजात्राया इलय् रथ सालेत थी थी संघ संस्था जाना लँया स्थिति स्ववनेगु धकाः फेसबुकय् जायेक किपा तयातइ, थुपिं फुक्कं खलः पुचः न्ह्याकेत धेबा मुनेगु त्वहः जक खःला धयाथें नं शंका ब्वलना च्वनी ।
न्हय्का लँपु दुगु असं बजारय् दुहाँवनेगु लँया समस्या न्ह्याथासं जुयाच्वंगु दु । भोताहितिं असं वनेगु लँ स्यं, कमलाछिं ला दुहां हे वने मज्यू बार तयाः ज्या न्ह्याकाच्वंगु दु । छेत्रपाटी नं ल्वहँ लानातःगु दु, ज्याथाय् लँ दयेकाच्वंगु दु । किलागलय् लँ दयेकाच्वंगु दु । छचाखेरं हे थथे घेरेयानाः लँ दयेकाच्वंगु नगर योजनाया कारण बजार विस्थापित जुयाच्वंगु वास्तविकता खः । थनया पसः थुवाःत न्हिले ला ख्वयेला धयागु स्थिति दु । ज्या पने धाःसा विकास विरोधी धाइ, ज्या जुयाच्वंगु स्थिति स्वयेगु खःसा छक्वलं नाकाबन्दि यानाः ब्यापार बजाःयात हे सून्य यानाब्यूगु खंकेफइ । थ्व गज्याःगु विकासया मोडल खः ? सकसिनं वाःचायेकेमाः स्थानीय सरकारयाके न्ह्यसः थनेमाःगु ई वःगु तायेकेमा ।
लँया निर्माण धयागु यातायात प्रणालीयात अपुकेगु निंतिं खः । दुनेया मू बजारय् गाडी दुत मछ्वयेगु हे ग्वसाः दयेकातःगु दु । थुगु योजनाय् नं विवाद हे दनि तर थौं गुगु नाकाबन्दीया मोडल छ्यलाः यातायात प्रणाली विकास यानाच्वंगु दु थुकी येँया दकलय् पुलांगु बजार मध्ये छगू बजाः सुना वनाच्वंगु अवस्थाय् दु । यातायात अवस्था कठिन जुइ सातकं हे मनूतय थुगु बजाः त्वताः मेगु वजाः माःवनेमाःगु वाध्यात्मक परिस्थीति ब्वलंगु दु । विकास नामय् असं बजाः प्रभावित जुइगु ज्या जुइमज्यू ।
थौंकन्हे लँ निर्माण यानाः दकलय् समस्याः जुयाच्वंगु थाय् हे असं बजाः खः । लाभा निसें लुँ तक्क न्यायेगु दइगु विश्वास जुयाच्वंगु ऐतिहासिक व पौराणिक असं बजारय् दुहाँ वनेगु लांलां तक्क हे लँ स्यंका नं क्वचायेके ध्यान स्थानीय सरकारं यानाच्वंगु मदु । आःया इलय् ब्यापार व्यवसाय थप्प थें हे जुयाच्वंगु लां लां दये धुंकूगु दु । तर थुकीया अःखः छुं ई न्ह्यः तिनि सामाजिक संजालय् बय्बय् जूगु न्युरोडया फुटपाथ विकास धाःसा लच्छिं हे क्वचायेका धकाः फुंइ याइगु स्थानीय सरकारं गनं थनया रैथाने ब्वापारीतय्त हैरान याना वैकल्पिक बजाःया विकासया षडयन्त्र जक न्ह्याकाच्वंगु खः कि ? चिन्तनया आवश्यक जुयावःगु दु ।
स्थानीय सरकारं न्ह्याल धाःसा ला याये फु खनिं । तर थ्व हे नीति वा रवैया दुनेया ‘इनर कोर सिटीइ’ धाःसा लागू मजू । स्थानीय सरकारया मनस्थीति छु खः ? येँया स्थानीय बजारयात सुख्खा यायेगु जकं मखुला धकाः छगू ‘कन्सपीरेसी थ्योरी’ नं वाः चायेके माःगु अवस्थाय् दु । छाय्की ल्वहँ लायाः दयेकातःगु थासय् मोटर छ्वयेगु यायेवं उकिं हाकनं मेगु समस्या ब्वलंनीगु स्वाभाविक खः । नघःया लँय् मोटरया चाप अप्वयेवं हे ल्वहँ लानातःगु थाय् धमाःधम स्यनाच्वंगु नं दु ।
गुब्लें लानातःगु ल्वहँ चिफी जुल धकाः प्वलाः तफीगु ल्वहँ लाइगु, गुब्लें ल्वहँ लानातःथाय् अप्पा लायेमाल धकाः, गब्लें आपा लाना तःथाय् पिच याये माल धकाः अनेकौं बाहाना तयाः लँ दयेकाच्वंगु खंकाच्वना । छु कारणं छत्वाः लँ दयेकेत थथे लां लां बिइकीगु खः? थुकी छु नियती दु ? स्वनिगःया नेवाःतय्गु बस्तिइ थथे लां लां लँ बन्द यानाः तइबलय् गज्योगु असर लानाच्वंगु दु धयागु खँय् आः विश्लेषण यायेगु आवश्यक जुइ धुंकल । थुकीं जुइगु नकारात्क असरयात गथे यानां न्यूनीकरण यानाः यंकेगु धकाः नं स्थानीय निकायया विज्ञपिन्सं थःथःगु योजना व क्षमता न्ह्यब्वयेगु ई वये धुंकल ।
