कुचुकुचु नकःवल, मगनं !

न्ह्यः खँ
मद्दिक्क हे मगन इन्टरटेन्मेन्टं नेपालभाषा ख्यलय न्हू न्हूगु म्ये निर्माण यानाः हयाः च्वंगु दु । न्हूगु म्ये थ्व संख्यात्मक रूपं हे जक निर्माण यानाच्वंगु मखुसे गुणात्मक रूपं नं ब्वयेबहःगु म्येया रूपय् हयाः च्वंगु दु । मगन इन्टरटेन्मेन्टया छुं नं न्हूगु भिडियो छगू आश ज्वनाः हे वयाःच्वंगु दइ कि न्हापा सिबें थुगु भिडियोस न्हूगु पह छु दइ ? छु बिशेष खँ मगनया भिडियोलय् वल जुइ धकाः पिदने न्ह्यः हे स्वकुमि पिंसं आंकलन यानाच्वंगु दइ । कुचुकुचुया न्हपांगु पोष्टर लुकय् भेट्रान कलाकार सुर्यमाला खनालया दुगु किपातं हे म्ये छुं न्हूगु सवाः बिइ धकाः बचंबियाःच्वंगु हे खने दु ।

कुचुकुचु
कुचुकुचु म्ये विशेषरूपं किपूया हे छगू मौलिक सवाः जुयाः पिदनाच्वंगु दु । थुगु म्येया च्वमि कुलबहादुर महर्जन खः । वय्कया थ्व न्हापांगु पिदंगु म्ये खः । थुगु म्येय् किपूया हे नांजाम्ह म्ये हालामि सतिश महर्जनं संगीत बियातःगु दु अले किपूया हे सुमधुर सःया धनी मय्जु रत्न शोभा महर्जनं हालातःगु दु । सतिश महर्जनया छम्ह गायक जक धकाः यक्वस्यां स्युसां आः छम्ह संगीतकार नं खः धकाः यक्वस्यां म्हसिइ । लोक बाजंया समायोजन यानाः सुन्दर कुमार महर्जनं आधुनिक सवाःया संगीत न्ह्यब्वयातःगु दु । म्येया भाव कथं छगू पारम्परिक खँग्वलय् छम्ह मिसा मचाया मनया भावयात न्ह्यबवयातःगु दु । संगीतय् नं पारम्परिक वाद्यवादन छ्यलातःगु दुसां सवाः आधुनिकया जुयाःच्वंगु दु ।

भिडियो
मगन इन्टरटेन्मेन्टया लुखां रजीन महर्जनया निर्देशनय् कुचुकुचु म्येया भिडियो तयार जुयाःच्वंगु दु । भिडियोस भेट्रान कलाकार सुर्यमाला खनाल म्हिताच्वंगु दु । न्हू प्रतिभा अमिता महर्जनया मनमोहक हाउभाउ थुकी दुथ्यानाच्वंगु दु । मेकअप आर्टिष्ट अन्नु महर्जन खःसा म्येया कोरियोग्राफी नं अमि डान्स स्टुडियोया अमिता महर्जन हे खः । भिडियोस छायाँकन व सम्पादन नं रजीन महर्जनया हे दु । म्येया लोकेशन कथं नं थेच्व व किपूया थी थी थाय् छ्यलातःगु दु ।

विश्लेषण
कुचुकुचु म्ये छम्ह ल्यासेया मिसाया मनय् लुयाःवःगु भाव खः । कुचुकुचु मिना वल जिगु म्हय् ला, वैंशया चुलि जकं जाःगु खः ला ! धकाः न्ह्यसः छुनाच्वंगु दु । अन थन गन गन गन धाये हे मफूत, अथें अथें हे मन चं चं मिना वल रे तसकं हे सरल भावं यइपुक्क व अपुक्क अले सकस्यां थुइगु कथंया म्ये च्वयातःगु दु । थुगु म्ये न्यनेवं मात्र हे नेपालभाषाया नांजाम्ह म्ये च्वमिं एवं मुक्तक च्वमि नातिबज्रयात लुमंसे वइ । वयकःया च्वयेगु शैली व म्येया भाव थथे हे सरल जुइगु याः । थुगु म्येयात ल्वयेक संगीत सतिश महर्जनं तयातःगु दु अले न्यासिपहलं जाःगु सः रत्नशोभा महर्जनं बियातःगु दु । तसकं हे यइपुक्क म्ये हालातःगु दु । रत्नशोभाया न्यासिचाः सःयात ल्वयेक कलाकार अमिता महर्जनं प्याखँ हुलाच्वंगु दु ।

म्येया बाखं कथं छम्ह बाज्यः वंम्ह मिसा न्हाय्कं स्वस्वं ह्याउँस्वांया क्लिप छ्यनय् तइ । अले न्हाय्कं स्वस्वं हे थःगु वैंश जाःगु ई लुमंसे वइ । न्हाय्कंया लिजलय् थःगु ल्यासे रूप खनी अले व हे लुमन्तिइ थः नं तनिं । म्ये ज्वःछि व हे लुमन्तिइ तक्यनां म्ये क्वचायेकाः हाकनं आःया इलय् थ्यनिं । थुगु लुमन्तिइ दुहाँवनेगु इलय् छगू ट्रान्जेक्शन कथं न्हापाया थःम्हं हे न्हाय्कनं ल्हाः बियाः दुने साला यंकी । थुगु कथंया ट्रान्जेक्शन नेपालभाषाया निंतिं छगू न्हूगु हे कथंया प्रयोग खनेदु । म्येया बोल कथं छथाय् चंचल मन जिगु चिइ हे मफूत बैसया चुलि जकं जाःगु खः ला धैगु बोलय् बुरीपिं अजिं पिंसं ज्वनातःगु खिपः चफुनाः अमिता प्याखँ हुलिगु छगू विशेष संकेत खनेदु । थुगु संकेत वा मेटाफोरं उम्ह चरित्र धाःसा समाजया बन्धनं चिइकाः मच्वनिगु कथं न्ह्यब्वयातःगु दु ।

वास्तवय् थुगु म्येया आशय् यौन मनोविज्ञानय् आधारीत जुयाःच्वंगु दु । म्येया बोलय् छुं कथंया सुलाच्वंगु भाव मदु । तप्यंक हे छम्ह मिसा मचां कुचुकुचु मिना वल जिगु म्हय् ला.. धकाः म्ये हालाच्वंगु दु । तर नं म्येय् गथे याना मनय् कुचुकुचु मिना वल, वा सुं मिजं प्रति आशक्त जुयाःच्वंगु दु ला धैगु नं छुं धयाःनं च्वंगु मदु अले क्येना नं तःगु मदु । म्ये गननं टाइमलाइन समयावधि नं ध्वाथुइकेगु कथंया खँग्वः दुथ्यानाच्वंगु मदु । थुकींयानां थुगु म्येयात छगू सामान्य परिवेशया म्ये कथं नाले ज्यु ।

थुगु म्येय् गुलि नं मोड बियातःगु दु, व फुक्कं हे भिजुअलया माध्यमं हे जक जुयाःच्वंगु दु । छम्ह बाज्यःम्ह मिसा न्हाय्कं स्वस्वं थःगु यौवनं जाःगु ई लुमंकेगु व थी थी मोड भिजुअलया कारणं हे जक जुयाःच्वंगु दु ।

आलोचना
थुगु म्येय् आलोचनात्मक पक्ष स्वयेगु खःसा भिडियोया पक्षय् छुं छुं धायेबहगु खँ त दु । छम्ह बाज्यःम्ह मिसा न्हाय्कं स्वस्वं हे थःगु वैसं जाःयाःवःगु ई लुमंके माःगु कारण छु खः धकाः न्ह्यागुसां छगू त्वहः क्येने ज्यूगु खः । तर अज्योगु कथंया छुं कारण मक्यंसें तप्यंक हे न्हायकं स्वयाः थःगु वैश लुमंकेगु दृष्यं यानाः छुं कथंया क्यारेक्टराइजेशनय् कमी जूगु महसूस जुइ । म्येया टेम्पो सिबें नं कोरियोग्राफी भचा आपाः गतिशील जूगु नं वाःचाइ । माःगु सिबें आपाः उर्जा दुगु भाव कलाकार अमिताया खनेदु । उर्जायात सन्तुलनय् हयेगु कुतः यायेमाःगु खनेदु । मोशन शटय् नं कलाकार ब्वाँय् वनाच्वंगु थासय् ख्वाःया भाव बांलाक्क कायेमफूगु नं वाः चाइ । थुगु म्येय् विशेषरूपं छता छुं लुमंके माः धाःसां थुकी छम्ह बाज्यः वंम्ह मिसां थःगु वैंशं जाःगु ईयात लुमंकाः च्वंगु कारण फ्लायश ब्याकय् छुं मखुसां ५०, ६० बर्ष न्ह्यःया ई जुइमाः। तर फ्लायश ब्याकय् दुपिं चरित्रया मेकअप व प्रोप्स (चश्मा, धडी, वसः) पुवंक पुलांगु थें मजूगुलिं फ्लायशब्याक यक्व पुलांगु थें खने मदु ।

लिखँ
मगन इन्टरटेन्मेन्टं नेपालभाषा ख्यःया निंतिं आपलं हे मौलिक लिसें अर्गानिक ज्या यानाच्वंगु दु । थुगु म्ये नं छपू अग्र्यानिक म्येखःसां थुगु रिभ्यू च्वत्तले हे १००k पार याये धुंकुगु दु । थुगु म्ये तसकं हे ययेकुगु म्ये कथं कायेमाः । छाय्धाःसां न्हूगु हे कम्पोज, अले न्हूगु हे भिडियोयात थुलि मतिना यायेगु धैगु थुगु म्ये लोकंह्वाये धुंकुगु धैगु दसि खः ।