थःगु सांगितिक यात्राय् चर्चाया शिखरय् थ्यनाच्वंगु इलय् नं दिपाः काःम्ह जुनु श्रृष्ठं २५ वर्ष लिपा हाकनं पलाः न्ह्याकूगु दु । छुं ई न्ह्यः हे जक जुनु श्रेष्ठया जून नांया म्येचाः पिदंगु दु । थुगु म्येचालय् खुपु म्ये दु । खुपू मध्य निपू म्ये नेपाली भाय् व प्यपू नेपालभाषाया म्ये दुथ्यानाच्वंगु खः ।
छगू तःधंगु हे ज्याझ्वःयाना थुगु म्ये पितब्वज्या जूगु खः । येँया राइजिंग मलय् प्रिमियर जूगु थुगु ज्याझ्वलय् ख्यालि जुजु मदनकृष्ण श्रेष्ठ वयाः वय्कयात भिंतुना देछानादीगु खःसा अग्रज संचारकःमि प्रकाश साय्मि, संगीता राणा प्रधान, दिप श्रेष्ठलिसें वरिष्ठ सिनेपत्रकार बिजयरत्न असंबरेंनं जुनु श्रेष्ठया कुतःयात कयाः नुगः खँ प्वंकादिगु खः ।
थौंया इलय् उगु दिनय् पिदंगु म्ये युट्य्ुबय् स्वयेत दयेधुंकल । म्येय् छपू छपू यानाः युट्युबय् पिदनाच्वंगु जुल गुकि जी शाह, जनकवि दुर्गालाल श्रेष्ठ, बद्री बेदना, सरला श्रेष्ठ, गोविन्द ह्यु्मतया च्वसाय् दु ।
लुमंकाः जि च्वना बोलया म्ये सरला श्रेष्ठं च्वयातःगु म्ये खः । थुगु म्ये गोविन्द ह्यूमतं लसय् हनातःगु खः । मन जिगु उइँ जुल बद्री बेदनां च्वयातःगु म्ये खः । थुगु म्ये गोविन्द ह्यूमतं लसय् हनातःगु खः । जिगु नुगलय् घाः यानां छन्त छु दत बोलया म्ये गोविन्द ह्यूमतं च्वयाः लसय् हनातःगु खः । समाः याना सुयात क्यने म्ये जनकवि दुर्गालाल श्रेष्ठं च्वयातःगु म्ये खः । गुगु म्ये दिपेन्द्र मान सिंहं लसय् हनातःगु खः ।
पछ्याउँदै मेरा दिनहरू म्ये सरला श्रेष्ठं च्वयातःगु खःसा मेरो चुपचापको अर्थ म्ये जि शाहं च्वयातःगु खः । थुगु निपुं हे म्ये अनिल शाहीं लसय् हनातःगु खः ।
थुगु म्ये फुक्कं हे छगू स्टूडियो सेटअप यानां भिजुअल निर्माण यानातःगु दु । म्येया भिजुअलय् थी थी वाद्यवादकपिंसं बाजं थानाच्वंगु दुसा जुनु श्रेष्ठं म्ये हाला तःंगु दु ।
जुनु श्रेष्ठ थ्यंमथ्यं २५ वर्षया अन्तराल लिपा संगीत क्षत्रय् पलाः तःवःगु खः । २०४५ पाखे म्ये हालेगु शुरुयाना मेगु छुं वर्ष लिपा चर्चाया शिखरय् थ्यनाच्वंगु इलय् हे वय्कलं संगीत क्षेत्र त्वताः सामाजिक जीवनय् पलाः न्ह्याकादिल । वय्कलं दकलय् न्हापां न्हायकं जक स्वयाः बोलया नेवाः म्ये हालादीगु खः तर थौं २५ बर्ष लिपा हाकनं सांगितिक ख्यलय् पलाः न्ह्याकःवःगु इलय् जुनु श्रेष्ठ उलि हे रिफ्रेशिंग खनेदुसा वय्कया सलय् अझ निखार दुगु ताइ । जुनु श्रेष्ठया सलय् छगू मिठास लिसें छगू स्याःचाः नं तायेदु । हरेक कथं हरेक म्येयात सलं उतिकं हे न्याय् यानाच्वंगु महसुस जुइ । जुनु श्रेष्ठया रूप स्वसां नं अझं नं छगु ताजगी लुयाच्वं । सामान्य मेकअपय् नं जुनु श्रेष्ठया स्क्रीन प्रिजेन्स म्यूजिक भिडियोस तसकं हे मिखायात सिचुसे च्वनिगु कथं जुयाच्वंगु दु । हरेक म्येय् माःगु कथंया भाव बियाच्वंगु दु । शायद उकिं हे थुगु म्येत फुक्कं हे मोडल हे तये म्वायेक जुनु श्रेष्ठया हे हाउभाउलं गानाच्वंगु दु ।
संगीतय् अनिल शाहीया न्हूगु संयोजन अतिकं हे ताजगी दु । म्ये न्यंसां पुलांगु म्ये मखसे थौंया ईया हे म्ये थें ताये दु । अनिल शाहीया संगीत संयोजनं म्येयात झन कर्णप्रिय यानाब्यूगु दु ।
म्यूजिक भिडियोयात आकर्षक यायेगु झ्वलय् छायाँकार सोहन मानन्धरया नं यक्व हे मेहनत खने दु । छगू हे लोकेशनयात खुपू म्येय् छगू सुटिंग यायेगु नं अःपुगु खँ पक्कां हे मखु । म्येया सम्पादन नं सोहन मानन्धरं याःगु दु । फुक्कं हे म्ये अनिल शाहीं व ब्लुबेरी स्टुडियो टिमं निर्देशन याःगु खःसा सह निर्देशन आराध्यालक्ष्मी खड्गीं यानातःगु दु ।
