म्यानमारं छगू डान्स ग्रुप नेपालय् कल्चर एक्सचेन्जया निंतिं वयाः छगू नेवाः म्यूजिक भिडियो म्हिताः वंगु दु । मछाः मछाः बोलया म्येय् म्यानमारं वःपिं मध्य निम्ह कलाकार अम्बिका मगर व सह कलकार कथं दिपा पौडेलया मनमोहक प्याखं न्ह्यब्वयातःगु दुसा थुगु म्येय् नेपालभाषाया मेम्ह उदीयमान मोडल अनुज शाक्यं साथ बियाच्वंगु दु ।
थुगु म्ये पुर्णकाजी ज्यापुया च्वसाय्, जुगल डंगोलया लसय् व संगीत संयोजनय् अले सुमन मानन्धरया सलय् दु । मछाः मछाः बोलया थुगु हे म्ये सिटिम्याक्स हलय् प्रिमियर जुल । म्येया कोरियोग्राफी रुबि लामां यानातःगु दु । दिपक कपालिं न्हापां खुशी निर्देशनय् पलाः न्ह्याकुगु दु । अले थुगु म्ये नांजाःम्ह छायाँकार व भिडियो सम्पादक सोहन मानन्धरं यानातःगु दु । मेकअप आर्टिष्ट कथं सनम कुमार श्रेष्ठ दु ।
प्रिमियर लिपाः छगू बःचाःहाकःगु ज्याझ्वः याःसें म्यूजिक भिडियोस ब्वति दुपिं सकसितं मतिनाया चिं लः ल्हाःगु खः । ज्याझ्वलय् पाहां कथं वरिष्ठ सिनेपत्रकार विजयरत्न असंवरें नेवाः म्ये थौंकन्हे आपलं पिदनाच्वंगु व थौंकन्हेया म्युजिक भिडियो थें याकनं हे लोकंह्वाइगु विश्वास प्वंकादिल। अथे हे आः झीसं नेवाः म्ये थी थी व्यवसायिक युट्युब च्यानल सिबें झीगु हे नेवाः युट्युबय् यंकाः प्रचार यायेमाःगु खँ नं न्ह्यथनादिल छाय्धाःसां नेवाः म्ये स्वइपिं सिमित वर्ग जूगु कारण नेवाः म्यूजिक भिडियोया औसत स्वकुमि न्ह्यागु नेवाः म्येय् नं उलि हे जुइगु याः ।
कल्चर एक्सप्लोर नेपाल व लुमधि अजिमा प्रोडक्शनया मंकाः ग्वसालय् जूगु थुगु ज्याझ्वलय् पाहां कथं पेजथ्री बाःछिपौया सम्पादक दर्शन वीर शाक्य, वरिष्ठ सिनेमेटोग्राफर रवि साय्मि, कल्चर डिपार्टमेन्ट अफ थाइ नेपाल एसाेसियशनपाखें राज कर्माचार्य व स्वस्ती श्री गुरूकुल आइ बि स्कुलया प्रबन्ध निर्देशक मीना महर्जन पाहां कथं ब्वनातःगु खः ।
ज्याझ्वलय् रूबी लामां थुगु म्यूजिक भिडियाे याये खनां तसकं हे गर्वान्वित महशुस जूगु खँ कनादिल । नेवाःतय्सं हे देय्या संस्कार व संस्कृति ल्यंकाःतःगु व थः नं थुकथं नेवाः ख्यलय् भ्यलय् पुनेत स्वयाःच्वनागु खँ न्ह्यथनादिल ।
म्यूजिक भिडियाेया निर्देशक दिपक कपालीं म्यानमारया कलाकारपिं कन्हे हे लिहांवनेत्यंगु लिं थाैं हे ज्याझ्वः तयाः स्वन्हुया दुने हे थुगु म्यूजिक भिडियाे तयार यानागु खँ पेजथ्रीयात जानकारी बियादिगु खः । याकनं हे थुगु म्ये युट्युबय् पिदनीगु नं जानकारी वय्कलं बियादिल ।
