नेपालमण्डल टेलिभिजनया म्युजिक लन्चप्याड ज्याझ्वलय् छन्त जिगु माया मदुला म्येया एपिसोडय् म्ये हालामि धर्म महर्जनं थःगु अनुभव कनेगु झ्वलय् धयादिल – की जब वय्कः म्ये सुतिंग स्थलय् थ्यन वय्कया बिचाः कथं नेवाः म्येया सुटिंग ला खः छगः क्यामरा व मोडल निम्ह दइ धकाः बिचाः वनाच्वंगु जुयाच्वन । तर सुतिंग स्थलय् सुतिंग सेट खंगु इलय् थ्व ला मेगु हे कथं जुल धैगु खँय् वय्कया मनय् वन । नेपालभासाया न्हापांगु म्युजिक भिडियोया डाइरेक्टर धकाः बयबय् जुयाच्वनादिम्ह बिजयरत्न असंबरें नं शुरुया म्युजिक भिडियो धैगु हे क्यामरा छगः व म्ये हालिम्हेसित न्ह्योने तयाः भिडियो खिचेयायेगु खँ थाय्थासय् मन्चय् न्ववानाच्वना दी ।
थ्व निता खँ नेपालभासाया म्युजिक भिडियो ख्यलय् वयाच्वंगु ह्युपाःयात संकेत यानाच्वंगु दु । थुगु निताःजि खँ आः धयाच्वंगु दु कि नेपालभासाया म्युजिक भिडियो ख्यलय् छुं छुं कथं ह्युपाः वयाच्वंगु दु । गुगु ह्युपाःया कारण आः नेपालभासाया मनोरंजन ख्यः चकना वनाच्वंगु दु ।
म्युजिक भिडियोया निर्माणय् थौंकन्हे बयबय जुयाच्वंगु स्वम्हेसिया छगू पुचः दु । राजन शाही, मनोजरत्न शाही व दर्शनवीर शाक्य । थुगु पुचः जानाः हे लकडाउन शुरु जूगु ई निसें हे छन्त जिगु माया मदुला, छु जुल रे, मयो जितः, ओ मैंचा व गुलि न्ह्यइपुसे च्वं याना न्यापू म्युजिक भिडियो दयेके धुंकुगु दु । लकडाउनं नेपालभासाया मनोरंजन ख्यःयात ब्युगु थुगु अतिकं हे मनमोहक उपहार खः । छाय्की थुपिं न्यागुलिं हे भिडियो छगू सिबें मेगु बिस्कं बिस्कं सवाःया दु । म्ये विविधता दु । थ्व न्यापू म्युजिक भिडियोया आधारय् छुं छुं खँ थन न्ह्यथने बहःगु दु ।
लोकेशन हन्ट
थुगु पुचलं लोकेशन हन्ट धकाः सुटिंग न्ह्यो थाय् स्वः वनेगु यानाच्वंगु दु । लोकेशनयात गु कथं न्हूगु हे सवाः बिइगु धैगु खँयात बांलाक्क हे ध्यान बियातःगु दु । छु जुल रे म्ये थेच्वःया छगू खुल्ला थाय्यात बजार दयेका सुटिंग यानातःगु अतिकं हे च्वछाये बहःगु खँ खः सा, मयो जितः म्ये चिंलिंच्वःया सौन्दर्ययात मेगु हे कथं न्ह्यब्वयातःगु । चिलिंच्वयात लोकेशन हे खःसा प्रोप्सया कथं यक्व हे थाय् बियाः छ्यलातःगु दु । छन्त जिगु माया मदुला व ओ मैंचाया सुटिंग स्थल छगू हे खःसां गननं भिडियो स्वइगु इलय् छगू हे लोकेशनय् सुतिंग यानातःगु थें खने मदु । गुलि न्ह्यइपुसे च्वं म्येया लोकेशन नेपालभासाया म्युजिक भिडियोया नितिं फ्रेश लोकेशन कथं मनमोहक जुयाच्वंगु दु ।
कन्सेप्ट
म्युजिक भिडियोयात ल्वःगु कन्सेप्ट बिइफुगु थुगु पुचःया मेगु बिशेषता खः । कन्सेप्टय् दर्शनवीर शाक्यया दुसा वय्कलं म्येया टाइमलाइन बारे यक्व कुलादिइ । म्येया संगीत व बोल कथं म्येया कन्सेप्ट तयार जुइगु खँय् वय्कलं धयादी । आनन्द बज्राचार्यया च्वसाय् मयो जितः म्यय् थनेया थँ हिति व क्वनेया क्वहिति धैगु शब्द वये सातकं हे थुगु म्येया टाइमलाइन टे«डिशनल जुइमाः धकाः धयादि छाय्की थौंकन्हे थःने क्वने धैगु चलनचल्तिइ मदु । बिशेष परिस्थीतिइ जक हे छ्यलिइ । छन्त जिगु माया मदुलाया अन्तवार्ताया दौरानय् छम्ह च्वमिं थः अडियन्सयात स्तब्ध वा छुं सोचनीय विषय बस्तु बिइ माः धैगु वय्कया धारणा दु । गुलि न्ह्यइपुसे च्वं म्ये न्हापा हे लोकं ह्वाःगु कारण थुगु म्येयात आधुनिक रंग बी मफइगु खँ नं वय्कलं कुलादिल छाय्की थुगु म्येया सवाः नं सन् ९०या संगीतं प्रभावित जुयाच्वंगु दु ।
निर्देशन
लोकंह्वाःम्ह निर्देशक राजन शाही छम्ह मेहनति निर्देशक खः धैगु खँय् सकस्यां हे समर्थन याइ । थुगु पुचः न्ह्यः नं राजन शाहीं यक्वं हे म्युजिक भिडियो दयेके धुंगु दु । तर थुगु न्हूगु टिम दुने तसकं हे च्वछाय्बहगु म्युजिक भिडियो त पिदंगु दु । छन्त जिगु माया मदुला थें जाःगु मार्मिक म्ये नेपालभासा ख्यलय् आः तक्क पिदंगु मदु धाःसां छुं पाइ मखु । छु जुल रे .. म्ये पुरा बजारयात मोबिलाइज याना हरेक कलाकारयात छुं नं छुं ज्याखँय् संकातयेगु अःपुगु खँ मखु । मयो जितः म्येय् प्यम्ह चरित्रयात छक्वलं न्ह्यब्वयाः ४ ५ मिनेटय् स्टाय्बिलस यायेगु छगू प्रसंशनीय ज्याखँ खः । ओ मैंचा थें फ्युजन व फाय्न्टासि दुथ्यासां नेवाः पह व्यवयेफुगु व गुलि न्ह्यइपुसे च्वं थें जाःगु अतिकं हे सरल रोमान्सयात न्ह्यब्वयेगु निर्देशनया विविधता व क्षमता राजन शाहीया खने दु ।
छायाँकन
छायाँकनय् थःगु निगु दशक ज्या यायेधुंकुम्ह मनोजरत्न शाहिया अनुभव न्यापू म्युजिक भिडियोस ल्वयेक जुयाच्वंगु दु । छन्त जिगु माया मदुला म्युजिक भिडियोस सिनेम्याटिक शट्स, छु जुल रे म्युजिक भिडियोलय् बजारया चहलपहलयात जिवन्त यायेगु नितिं के्रन शट, मयो जितःलय् चिलिंन्च्वयात छगू न्हूगु लोकेशन कथं न्ह्यब्वयेगु एंगल, ओ मैंचा व गुलि न्ह्यइपुसेच्वं म्येया म्युजिक कथं क्यामरा मुभमेन्टस् तसकं हे सशक्त ढंगं खनेदु । छगू अन्तरवार्ताया दौरान मनोजरत्न शाहीं क्यामराम्यान याके क्यामरा न्ह्याकेगु निंतिं संगीतया ज्ञान नं तसकं हे आवश्यक दु धैगु खँ कुलादिगु दु ।
सम्पादन
सम्पादनया ल्याखँ छायाँकन हे न्याकाच्वनादीम्ह मनोजरत्न शाहीया भुमिका तसकं हे महत्वपूर्ण खनेदु । छन्त जिगु माया मदुला म्येय् ट्राय्जिक दृष्यय् खिउँकेगु व मतिनाया दृष्ययात झःझः धयाच्वंगु जक मखुसे छगु दृष्यं मेगुु दृष्य अतिकं हे सरल ढंगं यानातःगु खनेदु । छगू दृष्यं मेगु दृष्ययात गुलि सामान्य व सरल ढंगं स्वाके फइ लिसें स्वकुमियात गुलि सहज ताइ उलि हे म्येया सम्पादन पक्ष बांला जुइ । छु जुल रे म्य् बजारया जीवन्तता गनं नं असमान्य वा असहज खने मदु। मयो जितः व ओ मैंचा म्ये यात माःगु कथं बिटय् सम्पादन यायेगु निसें गुलि न्ह्यइपुसे च्वं म्येयात म्याजिक शटय् सम्पादन यानातःगु खनिबलय् छम्ह कुशल सम्पादकया गुण अपुक्क हे खने दु ।
म्युजिक भिडियोया थुगु पक्ष लिपा नं म्युजिक भिडियो निर्माणयात छगू व्यवसायिक व सरलिकरण यायेगु खँय् थुगु पुचः न्ह्योेने लानाच्वंगु दु । म्युजिक भिडियोया निमार्णया झ्वलय् श्रृंगार, प्रोडक्शन युनिट, किचेन युनिट लिसें हरेक पक्षय् छगू बिस्कं बिस्कं डिपार्ट दयेकातःगु दु गुकिं नेपालभसाया म्युजिक भिडियो निर्माण थौं कन्हे ख्याः याथें मखुथे प्याखँ निर्माणयाया हे छगू ब्व कथं न्ह्याकाच्वंगु दु ।
छुं दिं न्ह्यो तिनि हे संसार अनलाइन पाखें छगू ज्याझ्वः याःसें थुगु टिमयात हंगु दु । वइगु दिनय् थुगु टिमं अझं प्रगति यानावने फयेमाः धकाः कामना यानाच्वना ।
