निपा ख्वापाः व न्हिला न्हिला हुँ

दिलिप शाही

थनिं सुइस्वदँ न्ह्यः सिलु प्याखँ पिहां वयेकेधुंकाः नेवाः भासं नं प्याखँ दयेके फइगु कल्पना यानाः दयेकूगु छगू फिल्म खः – ‘निपाः ख्वाःपाः’ । थ्व फिल्म स्वम्ह ल्याय्म्हपिनिगु कल्पना खः । गुपिं मचांनिसें नापं ब्वलंपिं खः । वय्कःपिं खः श्यामकृष्ण श्रेष्ठ, किरणलाल श्रेष्ठ अले तुलसी डंगोल ।
नेपालभाष एस. के. टि ब्यानरय् वय्कःपिंसं नेपालभाषाया निगू फिल्म दयेकादीगु दु । छगू ‘निपाः ख्वाःपाः’ अले मेगु ‘न्हिला न्हिला हुँ’ ।

निपाः ख्वाःपाः दयेकेगु कल्पना यायेधुंकाः उकिया स्क्रिप्ट च्वयेगु ज्या नं वय्कःपिं स्वम्ह हे जानाः यानादीगु खः । थुकीया निर्देशकया भूमिका धाःसा श्यामलालं म्हितादीगु खः । अले अभियन यायेगु ज्यां नं स्वम्हेस्यां यानादीगु दु । तर निपाः ख्वाःपाः फिल्म न्हिला न्हिला हुँ थें चर्चित धाःसा जुइ मफुत । उकिया कारण खः उगु इलय् भिडियो फिल्म क्यनेत सरकारं तयातःगु प्रतिबन्ध खःसा आः थें सञ्चारया उलि विकास मजूगु मेगु कारण खः ।

अथे खःसां नं निपाः ख्वाःपाः फिल्मं थःगु लागत धाःसा उठे यायेत ताः लाःगु खँ नं फिल्मया हिरोया भुमिकाय् म्हितादीम्ह तुलसी डंगोलं कनादी ।

निपाः ख्वाःपाःया हिरोइनया भुमिकाय् म्हितूपिं निम्ह कलाकार सुलोचना मानन्धर व शवनम रन्जित खः। थुगु प्याखँया पाश्र्व संगीत प्रकाश गुरुङया खः । प्याखँया द्वन्द्व निर्देशक विनोद शाही खःसा क्यामरा राजभाई सुवाल ।

उकथं हे उगु हे व्यानर दयेकूगु मेगु फिल्म खः – न्हिला न्हिला हुँ । न्हिला न्हिला हुँ धाःसा भृकुटी मण्डपय् लछि स्वयां अप्वः क्यनेगु ज्या जूगु खः । उगु इलय् अञ्चलाधीश कार्यालयपाखें स्वीकृत कयाः जक भृकुटी मण्डपय् भिडियो फिल्म क्यनेमाःगु नियम दुगु खः ।

तर न्हिला न्हिला हुँ फिल्म धाःसा तत्कालीन रानी ऐश्वर्य राज्यलक्ष्मी शाहया स्वीकृति कयाः क्यनेगु ज्या जूगु खँ फिल्म कलाकार लिसें मू रोल म्हितादिम्ह तुलसी डंगोलं लुमंकादी । उगु इलय् टेकुइ च्वंगु बुद्धवारी कम्प्लेक्स दयेकेगु तयारी जुयाच्वंगु खः । उगु कम्प्लेक्स उलेज्या यायेत झाम्ह शाहयात चक्रमान डंगोल सिफारिस यानादीगु जुयाच्वन । डंगोल शाहयात थ्व किजापिसं दयेकूगु नेपालभाषाया किपाः तसकं बांलाः भृकुटी मण्डपय् क्यनेत स्वीकृति बीत इनाप याःगु खःसा शाह उकियात स्वीकृत बियादीगु खः । थ्व स्वीकृति लिपा फिल्म न्हिं निगू सो कथं लछि तक क्यंगु खः । थुगु फिल्मं धाःसा थःपिंत लवः दुगु खँ फिल्मय् मू रोलय् म्हितादीम्ह डंगोल कनादिल ।

पारिवारिक द्वन्द्वं जाःगु थ्व फिल्मय् नं वय्कःपिं स्वम्हेस्या थःथःगु भूमिका म्हितादीगु दुसा मू रोल धाःसा डंगोलं म्हितादीगु खः । थुगु फिल्मया हिरोइन कथं रजनी श्रेष्ठ व तिमिला श्रेष्ठ म्हितादीगु खः । गोविन्द ह्युमतया संगीत दुगु थ्व फिल्मया आपालं म्येँ उगु इलय् चर्चित जूगु खः । थुगु फिल्मया म्ये तत्कालीन नेपालभाषाया म्येँ वयाच्वंगु संगीतया पहःयात बिस्कं कथं स्वाद बिउगु खः । थुगु फिल्मया फुक्कं म्येँ बद्री बेदनां च्वयादीगु खःसा द्वन्द्व निर्देशक राजेन्द्र खड्गी खः । अथे हे थुगु फिल्मया छायाँकार राजभाई सुवाल खः ।

उगु इलय् छगू फिल्म दयेकेत ५० निसें ६० हजार तका खर्च जूगु खँ नं डंगोलं कनादी । थुकथं म्हो खर्च जूगु कारण धाःसा उगु इलय् आः थें पारिश्रमिक बीगु चलन मदु । सुटिङया झ्वलय् माःगु ट्रान्सपोटेसन खर्च व नयेत्वनेगु निंतिं माःगु खर्च बाहेक मेगु खर्च यायेम्वाःगुलिं यानाः नं म्हो ध्यबां फिल्म दयेकेत ताः लाःगु खः ।

उगु इलय् चर्चित जूगु थुगु फिल्मया न्ह्यथने बहःगु छगू खँ खः उकिया भिलेन जुयाः म्हितादीम्ह श्यामकृष्ण श्रेष्ठया भूमिका । उगु इलय् थीथी भिडियो फिल्मयात कयाः प्रतिस्पर्धा नं जूगु जुयाच्वन । न्हिलान्हिला हुँ फिल्मया भिलेन श्यामकृष्ण अबलय् दकलय् बांलाम्ह भिलेन कथं न्हापा लाःगु खः ।
निगू फिल्म लिपा धाःसा वय्कःपिं थःथःगु लजगाय् तनेमाल । श्यामकृष्ण विदेशय् वनेवं फिल्म दयेकेगु ज्या नं दित । तर नं डंगोल धाःसा आः तक नं अभियन क्षेत्रय् सक्रिय जुयाच्वंगु दु । डंगोलया कथं श्यामकृष्ण न्हिला न्हिला हुँ फिल्मयात खस नेपाली भासं दबिङ यायेगु आज्जु तयातःगु खः । तर थौं तक उगु आज्जु धाःसा पूवंगु मदुनि ।

फिल्म दयेके न्ह्यःया बाखँ मेगु हे दु । वय्कःपिं स्वम्हं छगू हे त्वाःया झ्वली छेँय् मचांनिसें ख्याः यायेगु बानी दु । अझ स्कुल नं छगू हे लिसें क्याम्पस ब्वंबलय् तकं नं छगू हे क्याम्पसय् अथे जुयाः वय्कःपिं उगु इलय् त्रिदेव धकाः तकं धाइगु ।

उगु इलय् भोटेबहाः त्वालय् आपालं कलाकारपिं बालं च्वनीगु । कलाकारपिनि ज्याझ्वः जुइबलय् वय्कःपिं स्वम्ह स्वयेत वनेगु । अथे थीथी ज्याझ्वः स्वयेगु झ्वलय् हास्य कलाकार मदनकृष्ण श्रेष्ठं छिमिसं नं यानाः स्वयेमाः धकाः धायेधुंकाः वय्कपिं स्वम्ह अभिनय क्षेत्रय् न्ह्याःगु खः । तर तुलसी डंगोल बाहेक मेपिसं धाःसा थःगु अभिनययात निरन्तरता बीगु ज्या मजू ।

अथे ला थ्व निगू नेपालभाषाया फिल्म लिपा मेमेगु नं भिडियो फिल्म दयेकेगु क्रम न्ह्यायेगु शुरु जूगु खः । उगु इलय् चिपनिप लिसे आपालं नेवाः फिल्म दयेकेगु ज्या जुल । थौं कन्हय् थें प्रविधिया विकास मजूगु उगु इलय् न्हिला न्हिला हुँ फिल्म नेपालय् दबिङ जूगु न्हापांगु फिल्म नं खः ।

न्हापा फिल्म सुटिङ याइबलय् हे तप्यंक उकिया रेकर्ड याइगु खः । अथेजुयाः अभिनय यायेबलय् डाइलग न्ववायेगु आदि ज्या छक्वल यायेमाः । लिपा फिल्स सुटिङ लिपा अलग्ग हे दबिङ यायेगु प्रविधि वयेवं धाःसा दबिङ यायेगु ज्या जूगु खः ।