नेपालभासा ख्यः क्षत्रगत रूपं तसकं चिधं। चिधंगु क्षत्र जूगु कारण हे थन अर्थिक, सामाजिक लिसें जीवन लिसे स्वानाच्वंगु थीथी पक्षत स्वात्तुमत्तु स्वानाच्वंगु दु । छम्ह हे मनू कलाकार धाइ तर व हे मनू छम्ह व्यवसायी जुयाच्वनी । व हे मनू पत्रकार नं जुयाच्वनी । व हे मनू सामाजिक कार्यकर्ता नं जुयाच्वनी । व हे मनू साहित्यकार नं जुयाच्वनी । थज्योगु चिकूगु क्षत्रया कारण छम्ह हे मनू वा कलाकार बहुआयामिक जुयाच्वनी । गुबलें थुगु बहुआयामिक पक्ष तसकं हे सरल व तसकं हे गौरवया खँ जुयाच्वनी अले गुबलें थ्व हे खँ यानां छगू मछिंगु वातावरण नं ब्वलनाच्वनी । थज्योगु वहुआयामिक व्यक्तित्व व बहुआयामिक परिवेशया कारण गन निम्ह मनू मुन कि हे प्रसंग हे मवःगु खँ नं सप्रसंग व्याख्या जुयाच्वनी । न्हूदँया भिंतुना धाःसा गाः थाय् राज्यंयाना च्वंगु विभेद, जातिगत विभेद, विद्रोह यायेमाल धयागु सन्देश निसें राजनैतिक एजण्डाया चर्चा जुयाच्वनी । छु ज्याझ्वलय् छु आज्जुं वक्ता सःता तःगु दइ व वक्तां ज्याझ्वःया उद्देश्य बाहेक फुक्कं हे खँया चर्चा यानाच्वंगु दइ ।
च्वसं गुलिनं सन्दर्भ व भूमिका दु थौंया परिवेशय् नेपालभासाया मनोरंजन ख्यः लिसे नं स्वानाच्वंगु दु । बहुआयामिक ब्यक्तित्वया कारण नेवाः राजनीतिक ख्यः नेवाः मनोरंजन ख्यलय् प्रभाव लानाच्वंगु दइ । गनं छुं ज्याझ्वः जुसां पाहां वा मू पाहांनं बहुआयामिक जुयाच्वंगु हे दइ ।
थुकीं याना नेपालभासाया मनोरंजन ख्यलय् छुं कथंया असर लानाच्वनी । छुं दिं न्ह्यः संसार कृयशन व संसार अनलाइन टिभिया ग्वसालय् सामाजिक संजालय् मूपाहांकथं राज्यमन्त्री रामवीर मानन्धर झायादिल । मन्त्री रामवीर मानन्धरयात कयाः बालाजुया सडक विस्तारया खँय् नेवाःतय्सं हे विरोध यानाच्वंगु दु । थज्योगु परिस्थीतिइ नेवाः मनोरंजन ख्यलं गुकथं थुकीयात नालाकायेगु धैगु खँ वाःचायेकेमाः । छम्ह मन्त्री नेवाःतय्गु ज्याझ्वलय् मू पाहाँ जुयाः वल धकाः स्वयेगु खः वाः छम्ह सडकविस्तार यानायां नेवाःतय्गु परिवारयात विस्थापित याःम्ह मनू सःतल धकाः धायेगु खः व नं बिचाः यायेमाःगु पक्ष जुल । उकथं हे सुरेन्द्र तुलाधरया न्हूगु नेपालभासाया संकिपा लुँयागु तक्माया मूहर्त विवादास्पद भवन छायाँदेवी कम्प्लेक्सय् यागु जुल । गुथिया सार्वजनिक पुखूया जग्गाय् छायाँदेवी कम्प्लेक्सया संरचनायात कयाः विरोध यानाच्वंपिंसं थुगु निणर्ययात कयाः आक्र्रोश प्वंकुगु दु । कारण खः नेवाःतय्गु भावनायात प्रत्यक्ष रूपं आहत याःगु कारण थुगु खँय् सामाजिक संजालय् विरोध नं यानाच्वंगु दु ।
प्रसंग अप्रसंग न्ह्याक्व हे जुसां नेवाः गतिविधिइ धाःसा राज्यया स्वापू दयां तुं हे च्वनीं । झी राज्य सिबय् पिने वनां ज्या यायेफइ मखु । गुलि ज्याखँ राज्यया स्थानीय तह पाखें स्वापू कथं जिर्णोद्वार, पुनरनिर्माण, अक्षयकोष दयेका बियाच्वंगु दइ । उकथं हे नेवाः मनोरंजन ख्यःनं राज्यया नीति बिना न्ह्यांवनेफइगु स्थीति मदु । स्थीति विभिन्न जुयाच्वनी तर स्वापूया केन्द्र छम्ह हे बहुआयामिक व्यक्ति जुयाच्वनी थुकीया कारण झीगु समाजया संरचना खः । उकीं कलाकार वा कला क्षत्र स्वतन्त्र जुइ हे माः । कला क्षत्रनं सुयांगु अधीनय् वा प्रभावय् जुइमज्यु ।
