नेवाः नसा छु खः धयागु खँ झीसं गुबलें बिचाः हे मयाः । मौसम कथं थी थी नसा दयेका नल । उकिं झीत छु फाइदा जुल वा मजुल धयागु विषय तकं अध्ययन अनुसन्धान यायेगु बिचाः तकं मवं । नेवाः सभ्यताय् पुरातात्विक महत्वया स्थल, सफू वा मेमेगु यक्वं विषय गथेकी साहित्य, सहित्यकार विषयलय् नं अनुसन्धान हे जुइगु याः तर थथे खः सां नेवाः नसा छु खः धयागु विषयलय् आधाकारिक रूपं अनुसन्धान म्हो हे जक जू ।
नसाया स्वापू भूगोल व मौसम लिसे दइ । गन गज्यागु मौसम दइ अन अज्यागु हे खाना दइ । व हे खानां झीत उर्जा बिइगु खः । तर थथे हे खःसां झीगु खानाया माध्यामं हे विश्वय् नेवाः खानाया परिचय बिइफइ धयागु खँ नकतिनि हे मास्टर्स सेफ प्रोफेशनल्स २०२०या छम्ह कन्टेष्टेन्ट सन्तोष शाहं क्यनाबिल । नेवाःतय्गु मौलिक नसा योमरिया कारण विश्वय् नेपाःया हे नांया छगू बिस्कं म्हसीका ब्वलंगु दु ।
नेवाःतय्सं नयाच्वंगु खानाया प्रभावं थौंया इलय् छगू बिस्कं कथंया सवाःया विविधता जक मखु आः आर्थिक रूपं नं झी न्ह्याः वनेफइगु स्थीति दु धयागु अवसर सामाजिक संजालय् खंके फइ ।
कोभिडया कारणं जूगु लकडाउनं मनूत दकलय् आकर्षित जूगु छगू ख्यः वा क्षत्र नसा वा खाना खः । लकडाउनया शुरुया इलय् ला मनूत न्हिं न्हिं धयाथे भ्वये, पिकनिक थें ज्वरेयाना नल तर लकडाउन ताः ई तक्क बढेजुइवं अनेकौं कथंया होमडिलिभरी सहित मितव्यीय खाना ज्वलंया विज्ञापन वयेगु यानाच्वंगु दु । गुलिं विज्ञापन ला छेँ ज्वरेयाना नयेगु सिबय् पिनें अर्डर याना नयेगु कतिलाइगु खने दु । थ्व हे कारण लकडाउन लिपा आः नेवाःतय्सं यायेफइगु छगू लजगाः धयागु हे नसाया व्यापार खः । योमरि, चटांमरि, वह, बारा, समय बजि लिसें आः मौसम अनुसार तःखा व सन्याँखुन्याया उत्पादनं नेवाःत आत्मनिर्भर जुइफइगु यक्व हे संभावना दु । छगू पुचः निस्वना वा छेँय् जहानपिं मुनाः हे थुकथंया नेवाः खानायात व्यवसायिक रूपं गुकथं वने फइ धयागु खँय् झी आः न्ह्यचिलेफयेमाः ।
व्यवसायिक रूपं वनेत थुकी थौंकन्हेया खाना डेलिभरी याइगु व्यवसाय लिसे नं सहकार्य याये फइसा, थःगु हे सहकार्यं न्हूगु हे संजाल नं दयेका वनेफइगु स्थीति दु ।
थौंया स्थीति तःखा वा सन्याखुन्याया छुं मापदण्ड सरकारं बियातःगु मदु । तर छगू स्तरीयता ब्वलंकेगु निंतिं तःखा दयेकुगु तिथिमिति, तौल इत्यादि तया विश्वसनीयताया वातारवण नं दयेके फइ । लकडाउनया कारण लजगाय् यक्व हे ह्यूपाः वःगु दु । गनं नोक्सान जुयाच्वगु दुसा गनं अवसर नं ब्वलनाच्वंगु दु । ईकथं न्ह्यायेगु हे थौंया ईया माग खः ।
