नेपालभाषा साहित्य ख्यलय् ताःइलंनिसें हे बजारय् अप्राय जुइधुंकूगु ‘फूस्वां’ कविता मुना हाकनं पिदंगु दु । साहित्य रत्न सिद्धिचरण श्रेष्ठया प्रतिनिधिमूलक थुगु कविता सफूयात स्वयं च्वमिं हे ‘थःगु म्हसीका’या संज्ञा विया दिइगु दु । थुकथं कविरत्न सिद्धिचरणया काब्य व्यक्तित्व म्हसीकेत थुगु सफू मब्वसें मगाःगु सपूm जुयाबिइ ।
कविरत्न सिद्धिचरण श्रेष्ठया काब्य रचना साहित्यिक ख्यलय् तःधंगु योगदान जक मखु थुकिया माध्यमं मुलुकया राजनीतिक परिस्थिति हे हिलेत सफल जूम्ह कविकथं म्हसीके फइ । काब्य रचनाय्थःगु मांभाषं च्वःगु वर्षा कविताय् ‘थन क्रान्ति बिना दइमखु स्वच्छ शान्ति’या अभिब्यक्ति प्वंका उगु ई या राणा शासकतय्गु मिखाय् कँ जूम्ह कविवर सिद्धिचरणयात मांभाषं साहित्य रचना याःगु दोपनाय् जेल नेलया सजाँय् जक मखु, सर्वश्व हरण तकं जुल । थः अबु दिवंगत जूगु इलय् नं अन्तिम काजक्रियाय् तकं ब्वति कायेके मबियाः मानव धर्म व संस्कृतिया उपाहास तकं यात । अज्यागु दुःखद इलय् छम्ह मनूयात जुइगु वेदना, चोटया मर्मस्पशी अभिब्यक्तिया मुना खः थुगु ‘फूस्वां’ कविता मुना सफू ।
कविवर सिद्धिचरण श्रेष्ठ जेल जीवनं मुक्त जुइधुंकाः थुखे उखें लानाच्वंगु जेलकालिन रचना सहितया कविता थुकि दुथ्याना च्वंगु दु । कविकेशरी चित्तधर ‘हृदय’या कुतलं व सम्पादनं तयार जूगु थुगु ‘फूस्वां’ सफुतिइ दुथ्याःगु फुक्क कविताया परिचयत्माक भूमिका नं दुथ्याना च्वंगु दु । थःगु सफू ‘सीस्वां’या भूमिकाय् कविवर सिद्धिचरणं ‘थुकिया प्रत्येक पक्तिं जिगु परिचय’ धकाः धया दिइथें थुगु सफुतिंनं वय्कःया परिचय बिल धाःसा थुकिया कवितां जक नेपालभाषा साहित्यया क्यबः छगुलिं नस्वाइगु विश्वास चित्तधरं ‘हृदय’नं याना दिइगु दु ।
फूस्वां कविता मुनाय् सिद्धिचरणया जेलकालीन व लिपा च्वयातःगु ताहाः चिहाः ३२ पू कविता दुथ्याना च्वंगु दु । जीवनया अनुभूति दुने मतिना, आवेश, आवेग, क्रोध्र, धर्म, संस्कृति, संस्कारया कवितात दुथ्यानाच्वंगु दु । न्हापा ‘सीस्वां’ सफुतिइ राज्य प्रशासन खनाः ग्याना पिमकाःगु कवितायात नं पूर्णता बियातःगु दु ।
कविरत्न सिद्धिचरणयात नेपालभाषा काब्य ख्यःया स्वच्छन्दवादी काव्यया प्रणेताकथं नं न्ह्यब्वयेगु याः । वय्कःया स्वच्छन्दबादी कविताया धाः थुकि मुनाच्वंगु कवितां यच्चुक न्ह्यब्वइ ।
कविरत्न सिद्धिचरणया मेमेगु विधाया सप्mत नं आः स्वये न्याये मदयेधुंकूगु परिपेक्षय् थुकथं हे हाकनं पिथनेमाः । थुकिं नेपालभाषा साहित्यया गरिमा च्वन्ह्याकेत अझं ग्वहालि याइगु खँय् धुक्क च्वनेफइ । न्हू पुलां पुस्ताया च्वमिपिनिगु निंतिं कविरत्न सिद्धिचरण श्रेष्ठया कृति ‘पथ प्रदर्शक’ जुइगु खँय् शंका मदु ।
