गणेशदेवी मानन्धर स्मृति प्रतिष्ठानया ग्वसालय् नेपालभाषा ख्यलय् याेगदान यानाच्वंपिं स्वम्ह व्यक्तित्वपिं जन गायक भृगुराम श्रेष्ठ, वरिष्ठ सिनेपत्रकार बिजयरत्न असंवरे व न्हूगु प्रतिभा कथं सिद्धार्थ बज्राचार्ययात छगू समाराेह दथुइ तःजिक सम्मान एवं सिरपाः शनिवार मरूहिति ब्यांक्वेटय् लःल्हात । प्रतिष्ठानया नायः बिजय कुमार मानन्धरया सभानायसुइ न्ह्याःगु ज्याझ्वःस बागमति प्रदेशया सभासद माननीय शैलेन्द्रमान बज्राचार्य, नेवाः देय् दबूया नायः पवित्र बज्राचार्य पाहां कथं व वरिष्ठ शिक्षाविद् हितकर वीर सिंह कंसाकार मू पाहांकथं झायादीगु खः ।
ज्याझ्वलय् सिद्धार्थ बज्राचार्ययात हनापाै लिसें न्याद्वः तका, बिजयरत्न असंबरेयात हनापाैलिसें झिंन्याद्वः तका व जनगायक भृगुराम श्रेष्ठयात हनापाै लिसें निंन्याद्वः तका लःल्हाःगु खः ।
दिवंगत गणेश देवि मानन्धर – येँ महानगरपालिका १३ वडाया समाजसेवी दिलबहादुर मानन्धरया जहान खःसा वय्कःया काय्पिं प्रा. डा. राजु मानन्धर (अस्ट्रेलिया), राजु मानन्धर, राजेश मानन्धर व सज्जु मानन्धर खः । दिवंगत् गणेशदेवी मानन्धरया लुन्तिइ वय्कःया परिवारपाखें गणेश देवी मानन्धर स्मृती प्रतिष्ठान गठन याःगु खः ।
प्रतिष्ठानया ज्यासना परामर्श समिति नं गठन याःगु खः। निर्देशक, च्वमिलिसें कलाकार पवन जोशीया संयोजकत्वय् थुगु परामर्श समितिइ उप संयोजक वरिष्ठ कलाकार नगिना जोशी, दुजः संगीतकार सुरेन्द्र श्रेष्ठ, म्येहालामि निशा देशार व पेजथ्री बाःछिपौया सम्पादक दर्शनवीर शाक्ययात नं मतिनाया चिं लःल्हाःगु खः ।
अथेहे सांगीतिक ज्याझ्वनं याःसें वरिष्ठ म्ये हालामि जुजुकाजी रंजित, निशा देशार व सज्जु मानन्धर, सिरपा कयाःदिम्ह सिद्धार्थ बज्राचार्य व आपलं कलाकारपिन्सं नं सांगितिक प्रस्तुति न्ह्यब्वयाः दिगु खःसा सुरेन्द्र श्रेष्ठ व पुचः पाखें जनगायक भृगुराम श्रेष्ठयात विशेष सांगितिक देछाः न्ह्यब्वःगु खः । ज्याझ्वःलय् जनगायक भृगुराम श्रेष्ठं नं छपू म्ये न्ह्यब्वयादीगु खः ।
