एन्जेला कार्टर
चिकुलाया निभाः त्वयाः च्वन। थःगु हे पहलं स्वये हे यइपुसे च्वंक । छन्हु काउण्ट (युरोपियन देय्या सरकारी पद) तिपू सल गयाः आनन्द कायेगु मतिइ तयाः छेँय् नं पिहाँवल। भाजु काउण्टया सल हाकु व तुयु रंग ल्वाकज्यागु नौं रंग याम्ह खःसा मय्जु काउण्टया सल धाःसा हाकूम्ह। मय्जु काउण्टं ध्वंचिया छ््यँगुलिं दयेकातःगु वसतं पुना अले हाकूगु तिलिक्क तल्के जूगु लाकां न्ह्याना तल ।
छुं इलं निसें च्वापूवा गायाच्वंगु खः । पलख लिपा च्वापूवा वयेगु नं दित । उबलय् अन दक्व थाय् हे च्वापु थें तुयुसें खनाच्वंन । व हे लू स्वस्वं व निम्ह तिपु सलया टक्टक् सः थ्वयेका वनाच्वन । इपिं खँ ल्हाल्हां थःगु लँय् वनाच्वन । व हे इलय् म्हाइपु छयाय्थें थें याना थः तिरीमय्जुयात क्वय च्वापुं कय्कुं काउण्टं धाल “आः .. थ्व इलय्, थ्व हे च्वापु थें तुयुसें च्वम्ह मिसा न्ह्यने दुगु खसा ?”
थः भाःतया थःजागु इच्छा न्यनां काउण्टेसं मन पाँउका न्हिल ।
छुं ई लिइपा थथे हे खँ ल्हाल्हां लँय् वनाच्वंगु इलय् इपि च्वापुघिया दथुइ छगू तःधंगु प्वाःया न्हयःने थ्यन । व प्वाः ह्याउँगु हिं त्वपुना तःगु खः । थ्व खनाः भाजु काउण्टं हान ख्याः याये थें धाःल “जितः ला थ्व हे ह्याउँ हि थें छम्ह मिसा दुसा फुकु हे गात का ।”
व इलय् न काउण्टेसं वयागु भाःतया खँया लिसलय् “उफ” धासें थः भाःतया खँ फसय् ब्वयेका छ्वयाबिल ।
वया छु ई लिपा थःगु न्हयःने छगू सिमाया कचाय् हाकुम्ह क्वः खनेवं काउण्टं थःगु स्वंगु इच्छा न प्वंकुसें धाःल “जितः ला सिर्फ थ्व क्वःया पपूथें हाकुसें च्वंम्ह छम्ह मिसा दुसा फुक्क हे गात का ।”
थःयात परी थें तायेका च्वंम्ह मयजु काउण्टेसया न्ह्यःने थः हे भाःतं थथे मेपिं मिसातय्गु बारे इच्छा प्वंकुगु खनां वयात तसकं तं पिहाँ वइगु स्वभाविक हे खः । अय्न वं छुँ हे तं मप्वंकुसें सहयाना च्वन ।
अचानक भाजु काउण्ट थःगु स्वंगु इच्छा प्वंके धुँकाः लंय् वनेगु झ्वलय् लँय् सिथसं काउण्टं इच्छा याःथें मतिइ तःम्ह थें, तुयुसें च्वम्ह, ह्याउँसें म्हुतसि दुम्ह लिसें हाकु सँ दुम्ह अले म्हच्छिं पचि नांङ्गाम्ह छम्ह हिउँपरि दनाच्वगु खन ।
थथे च्वापुथें तुइसें च्वंम्ह, हि थें ह्याउँसें म्हुतुसि दुम्ह, क्वःया पपू थें हाकुगु सं दुम्हं पचिनांङ्गा दनाच्वम्ह हिउँपरि थःगु न्ह्यःने खनाः मय्जु काउण्टेसया मनय् थः भाःत थःनापं मदुगु व मेपिं मिसातय्गु इच्छा यागु खनां घृणा ब्वलन ।
उगु लँ वनेगु झ्वलय् गुगु झाकाः जुल थुकिं मय्जु काउण्टेसया नुगलय् भालां सू थें स्याः चायेकाच्वन ।
व पचिनांङ्गाम्ह हिउँपरियात लँया सिथसं दनाच्वंगु खनां मय्जु काउण्टेसं धृणाया मिखां स्वसें थुकलं बियाच्वन ।
तर थुखें काउण्टं थःगु इच्छा पूर्णम्ह हिउँपरियात थःगु सलय् तयाः मुलय् तल । थ्व लू खनेवं न्ह्याइपुगु च्वापुया लकस न म्हाइपुसें च्वंकाः व पचिनाङ्गाम्ह हिउँपरि पाखें थ भाःतयात गथें याना ब्यागलं याये फइ धकाः उपाय सोचे यानाच्वन । थथे व हिउँपरिपाखें ब्याग्लं यायेगु न्हापागु उपाय छ्यल । वं थःगु पञ्जा च्वंय् च्वंगु च्वापुधिलय् चाय्क चाय्कं वांछ्वल अले छुं जुम्ह थें चिल्लाय् दना हाल ।
“अय् न्यना दिसं सा ! जिगु पञ्जा कुतुंवन, आम्ह हिउँपरियात क्वय् क्वकया छकः कया हजि धयादिसँ ले । ”
मय्जु काउण्टेसं मति तः थें मजुल । वयागु इनापयात वास्ता मयासें काउण्ट धाल, “हे…., त्वताः छ्व, जिं छन्त अजागु हे मेगु पञ्जा न्याना बी । ”
व हे इलय् तंया झ्वकय् मयजु काउण्टेसं थःगु वस त्वतल अले हथासं थः नाङ्गा जुंसा वं हिउँपरियात व मूल्यवान वसतं पुंका वयागु पचिनाङ्का म्ह त्वपुना विल ।
यात्रा न्ह्यानाच्वन। सलया टक्टक् सः लिसें तुं ।
मय्जु काउण्टसें थः भाःतयात न्हू न्हूगु खँ न्यंका च्वन। थःत येकेगु अले हिउँपरियात धृणा यायेगु अनेक खँत पिकाना च्वन तर मय्जु काउण्टेसया कुतः सितिं वनाच्वन ।
न्ह्याथे याःसां न्ह्यागु खँ ल्हाःसां थः भाःतया मन धाःसा व हे हिउँपरि पाखें हे जक मन क्वसाया च्वंगु खनां मय्जु काउण्टेसं थः भाःत खना दिक्क नं चाल अले व हिउँपरि खना डाहा नं जुल। तं न वल ।
ता ई तक न थः भाःतया मनय् छुं हे ह्युपाः मवगुलिं काउण्टेसं मेगु उपाय छ्यल। थःगु पर्सिइ तयातगु हिराया पिन लिकात अले भचा च्वय् च्वापुधिया पुखुलिइ थ्यंक वां छवया बिल । अले व हिउँपरियात व काउण्टेसं धाल “ए हिउँपरि ! हुँ सा हुँ पुखुलिइ वना जिगु हिराया पिन कयाः हजि ।” थुगु पटकय् न काउण्टेस बुत – थः भाःत पाखें । व हिउँपरिपाखें । न्हापा थें हे लिस विल काउण्टं “थःजागु ख्वाउँसे च्वँगु लखय् लाल कया वनेत व छु न्या खला ?”
थ्व खं न्यना मयजु काउण्टेसं थःगु हाकुसें च्वंगु तल्के जुगु बुंट व… वहे हिउँपरियात न्हयाकल । खः थः नाङ्गा जुयाः हे व हिउँपरियात थःगु बुंट व वसतं पुंका विल । थथे यागु खना काउण्ट भचा दुःख ला ताय्कल तर छु हे न्वंमवा ।
यात्रा न्हयाना हे च्वन । थ्व यात्राया झ्वलय् इपिं छगू गुलाफ स्वांया क्यवय् थ्यन । मात्र गुलाफै गुलाफ जक स्वां ह्वया च्वंगु छगू क्यब ।
थ्व स्वांया मनमोहक दृष्य स्वस्वं काउण्टेसं मेगु छगू उपाय लुइकल थः भाःत यात हिउँपरि पाखें ब्याग्लं तयेगु – अले धाल “ए हिउँपरि !, हुँसा जित व क्यबय् वनाः व गुलाफ स्वां छफ्वः थ्वया हजि !”
आः धासा थ्व ज्या छगु चिधंगु ज्या तायेका खला काउण्टं हिउँपरियात स्वां थ्व वनेत लँ मपन ।
व हिउँपरि झ्वाम्म ह्वया च्वंगु स्वांया न्ह्यःनें वना छफ्वः स्वां छु थ्वल वयागु पतिंचाय् गुलाफया कं नं सुल । अले हि बाः बाः वल । कंथं सूगु स्याना हिउँपरि ख्वल–अले यक्व हि बा वगुं हुनिं खला बेहोस जुयाः हे ग्वतुल ।
थ्व खनेवं काउण्ट सलं कुहाँ वल अले थःगु वसः त्वता हिउँपरिया न्ह्यःने वन, लिसें मनय् सुलाच्वंगु प्याचाः लंकल । उब्ले तक व हिउँपरि मदय धुंकूगु जुयाच्वन । तर व काउण्ट धाःसा अन हे च्वनाच्वन। मयजु काउण्टेस सलं कुहां मवसे हे धैर्य यानाः काउण्टया व कुकर्म स्वयाच्वन । अन हिउँपरि लः जुयाः नायाःवन । पलख लिपा अन वयागु छुं हे अस्तित्व मन्त ।
अन छुं ल्यं दनिगु खःसा हाकुम्ह क्वःया पपु, ह्याउँहिया फुति, छम्ह सिम्ह ध्वंचा जक ल्यनाच्वन। अन छफ्व गुलाफ स्वां नं दु गुगु व छु ई न्हयः जक थ्वयाकाःगु खः । व हिउँपरि गुम्हेस्यां काउण्टेसया मनय् शंका व इष्र्या अले काउण्टया मनय् उमंग भरे याना ब्युगुखः, हिउँपरि नाया मदये धुसेंलि आ काउण्टेसया मन कपाय् थें याउसें च्वंगु दु ।
वं छुँ ई न्ह्यः त्वःगु थःगु वस हान पुन । काउण्टं थः कला काउण्टेसया इच्छा पूवंकेत बँय् लाना च्वंगु गुलाफस्वां कया वयात हे बीत स्वगु खः । वं थी थें याना व स्वांया कचा मज्वंसें हे धाल “म्वाल, काउण्ट थ्व स्वांया कथं ला सुइ यः ।” वं व गुलाफ स्वां मज्वं, स्वां कुतुवन अले शायद न्हुल जुइ, काच्याक् कुचिक्क जुल जुइ, मेगु यक्व स्वां थें हे ।
अनुवादक बद्री बेदना।
