येँया ऐतिहासिक मरु सतः पुनर्निर्माण सिधयेकाः राष्ट्रपति विद्यादेवी भण्डारीपाखें थाैं लाेकार्पण यायेत्यंगु दु । थाैंया ज्याझ्वः कथं न्हिनसिया १ ताः इलय् राष्ट्रपति विद्यादेवी भण्डारी मरू सतःलय् वयाः लाेकापर्ण यायेत्यंगु खः ।
२०७२ सालया तःभुखाचं क्षतिग्रस्त जूगु येँ महानगरपालिकाया पहलय् थुकिया पुनर्निर्माण सम्पन्न याःगु खः । पुनर्निर्माणया निंतिं काष्ठमण्डप पुनर्निर्माण समिति गठन याना ज्या न्ह्याकुगु खःसा स्वदँ व च्याला बिकाः पुनर्निर्माणया ज्या क्वचायेकुगु खः ।
उलेज्या बारे छन्हु न्ह्यः पुनर्निर्माण समितिपाखें पत्रकार सम्मेलनय् समितिया नायः एवं सांसद राजेश शाक्यं देगः पुनर्निर्माणया बिषय खँ तःसें पत्रकार पिनिगु न्ह्यसःया लिसः नं बियादीगु खः । मरु सतः सम्बन्धी किंवदन्तीकथं गबलय् तक चि व चिकंया भाः छगू हे जुइ मखु अबलय् तक मरु सतःया निर्माण पूर्ण जुइ मखु धइगु मान्यता दुगु जुयाः आः पुनर्निर्माण लिपा नं थ्व ज्या अझं अपूर्ण हे धइगु जनविश्वास न्ह्यब्वयादिल ।
मरु सतःदुने पलिस्था याःगु गोरखनाथ व प्यम्ह गणेद्यःया मूर्ति बिषयलय् थुगु मुद्दा काष्ठमण्डप बारे मखुसे मूर्तिया बारे जक जूगु व थुकियाबारे सर्वोच्च अदालतं भदौ ५ गते फैसला बीगु खँ न्ह्यथंगु दु ।अबलय् सर्वोच्चपाखें छु फैसला वइ, वहे कथं ज्या याना वनेगु प्रतिवद्धता नं प्वंकादीगु दु ।
