येँ महानगरपालिकां स्वन्हुन्यंक मंसिर २७ निसें २९ तक्क महानगर दिवस हनेत्यंगु दु । येँ पत्रकार सम्मेलन याःसें महानगरपालिकाया मेयर विद्यासुन्दर शाक्यं पत्रकार सम्मेलनय् जानकारी बियादीगु दु।
वि.सं. १९७६ पुष २ गते स्थापना याःगु सफाइ अड्डाया संस्थागत संरचना विकास जुसें २०५२ सालय् येँ महानगरपालिका घोषणा याःसां निसें हरेक वर्ष मंसिर २९ गतेयात महानगर दिवसया रुपय् हनावयाच्वंगु दु । न्हूगु संविधान जारी यायेधुंकाः स्थानीय तहया न्हापांगु निर्वाचित जनप्रतिनिधी, २०७२ सालया महाभूकम्पं ध्वस्त याःगु भाैतिक संरचना लिसें उगू इलय् जूगु नाकाबन्दी व काेराेनायाआक्रान्तया इया हाथ्याया सामना महानगरं थःगु स्राेत व जनशक्तिया अधिकतम उपयाेग यासें महानगरवासीया नितिं समर्पित जुयाःगु खँ कनादील ।
पत्रकार सम्मेलनय् येँ महानगरपालिकाया प्रवक्ता ईश्वरमान डंगोलं २७ औँ महानगर दिवसय्, सेवाग्राही सर्वेक्षण, ज्येष्ठ नागरिकयात निमोनियाया निःशुल्क खोप शुरुवात व स्वास्थ्य शिविर, विशेष सरसफाइ, खेलकुद, सांस्कृतिक ज्याझ्वः याइगु नं जानकारी बियादील ।
२७ औँ महानगर दिवसय् मंसीर २६ गते वाकथान, जनप्रतिनिधि व कर्मचारी दथुइ मैत्री फुटबल, वक्तृत्व कला व निबन्ध कासा नं यायेत्यंगु दु सा मूल समाराेह कथं मंसीर २९ गते परम्परागत बाजं गुरूपिनिगु सम्मान, उत्कृष्ट वडा कार्यालय घाेषणा, जनकमान श्रेष्ठ सुशासन पुरस्कार, स्थानीय सेवा गाैरव पदक, करदाता सम्मान, कर्मचारी सम्मान व सुशासन पत्रकारीता सिरपा नं लःल्हायेत्यंगु दु ।
