न्ह्यः खँ
हलिमय् न्यंक च्वनाच्वंपिं नेवाःतय् मंकाः संस्था धकाः वल्र्ड नेवाः अर्गनाइजेशनया न्हय्क्वःगु हलिं नेवाः दिवस मार्च ३०या लसताय् हलिं नेवाः म्ये पिथंगु दु । हलिं नेवाः दिवस इस्वी संवत् मार्च ३० धकाः धोषणा यानातःगु दु । थ्व हे झ्वलय् छपू नेवाः म्ये जक मखुसे वल्र्ड नेवाः एन्थेम धकाः नां नं छुनातःगु दु ।
म्ये
लोक कवि राजभाइ जकःमिया च्वसा, लय व बाजं जुगल डंगोल अले थुगु म्येय् जुजुकाजी रंजित, पवित्र कसा, सतीश महर्जन, रीता महर्जन, दीपा महर्जन व रत्नशोभा महर्जनया सः दुथ्यानाच्वंगु पु्चः म्ये खः ।
भिडियो
थुगु भिडियोस समीर महर्जन – अमेरिका, महिन्द्र प्रधान – अमेरिका, बिगेन तुलाधर – नेपाल, हिसिला महर्जन – नेपाल, जुजुकाजि रंजित – नेपाल, पवित्र कसाः – नेपाल, सतीश महर्जन – नेपाल, रीता महर्जन – नेपाल, दीपा महर्जन – नेपाल, रत्नशोभा महर्जन – नेपाल, मनोहर श्रेष्ठ – अमेरिका, नरेश शाक्य – अमेरिका, तुलसी चित्रकार – अमेरिका, अनित श्रेष्ठ – अमेरिका, महेन्द्र बीर बज्राचार्य – अमेरिका, सोहम सैंजु – अमेरिका जीवन प्रधानाङ्ग – अमेरिका, राजीब बताजू – अमेरिका, सबिता महर्जन – अमेरिका, भगवती महर्जन – नेपाल, अशिष्मा नकर्मी – अमेरिका, शान्ती महर्जन – अमेरिका, राजभाइ जकःमि – नेपाल, धर्म देव महर्जन – नेपाल, बिजय मान सिंह – अमेरिका, सुरेन्द्रभक्त श्रेष्ठ – नेपाल, भिंतुना जोशी – नेपाल, यमन श्रेष्ठ – नेपाल, कृष्ण चंखु – जर्जिया, गणेश राम लाछि – नेपाल, केशरमान ताम्राकार – अमेरिका , सीजन श्रेष्ठ – अमेरिका, बाल गोपाल श्रेष्ठ – नेदरल्याण्ड, दया रत्न शाक्य – अमेरिका, संयुक्त श्रेष्ठ – बेलायत, रुक्मणी मानन्धर – बेलायत, मदन कृष्ण श्रेष्ठ – नेपाल, दीपक डंगोल – अमेरिका, रमेश मुनिकार – नेपाल, लसता जोशी – नेपाल, मनोज तुलाधर –अमेरिका अभिनय् याःनातःगु दु ।
भिडियोया परिकल्पनाकार कथं संयुक्त श्रेष्ठ दु अले भिडियोया छायाँकन कथं रोशन लाल श्रेष्ठ – अमेरिका, बिगेन तुलाधर – नेपाल, राजेन्द्र रंजित – नेपाल, सुरेश ‘दर्पण’ पोखरेल – अमेरिका, एंजेलो भियरा – बेलायत व पासापिं दु ।
विश्लेषण
हलिं नेवाः दिंया लसताय् हलिं नेवाः दबूया म्ये, वल्र्ड नेवाः एन्थम् पिदंगु दु । विश्वन्यं च्वनाच्वंपिं नेवाःतय्गु प्रतिनिधित्व याइगु थुगु म्ये कथं कायेमाः । म्ये ग्वः कथं हलिं नेवाः दबूयात नेपाःया सगरमाथा संसारया गजु थें हलिं नेवाः दबू नं अथे हे गौरव खः धकाः धयाच्वंगु दु । मांभाय् कलाकृति संस्कृतिया स्वां ह्वयेके धैगु आशय म्यें धयाःच्वंगु दु । संसारया न्ह्याथाय् च्वंसां नेपालस्वां ह्वयेके धकाः म्यें धयाःच्वंगु दु। जन्मभूमि, कर्मभूमि ज्यान खः झीगु हलिं नेवाः दबू धकाः धयाच्वंगु दु । पुर्खापिन्सं थें झीसं थःगु तुतिइ चुयाः हे म्वाये, मनमन स्वाना न्हूगु युगय् हे न्ह्याये धकाः धयाःच्वंगु दु ।
आलोचना
लोककवि राजभाइ जकःमि च्वयादीगु थुगु म्ये हलिं नेवाः दबूया तुलना देय्या सगरमाथा संसारया हे गजू कथं यानातःगु दु । तुलनात्मक रुप हलिं नेवाः दबू संसारया च्वकाय् लानाच्वंगु धयातःगु दु तर नेवाःतय्गु तुलना सगरमाथा लिसे पाय्छि जुइ वा नेवाः समुदाय् दुने च्वंगु छुं बिस्कं प्रतिकय् मिखा ब्वये माःगु खः की धैगु न्ह्यसः चिं दने फु । नेवाःत दुने अनेकौं विविधता दु । विविधतां अनेकताय् एकता ब्वलनाच्वंगु प्रतिक नेवाः जुयाःच्वंगु खँयात लोककविं नालामकाःसे च्वकाया प्रतिक अथवा दकलय् च्वये लानाच्वंगु प्रतिक नालातःगु दु । थुकिं हलिं नेवाः दबू दकलय् च्वये व मेमेगु संघसंस्था त क्वये धैगु सन्देश बियाःच्वं । नेपालभाषा मंकाः खल, नेवाः देय् दबू थें जाःगु नेवाःतय्गु संघर्षं म्वानाच्वंगु संस्थात सिबें नं न्ह्येक्वःगु नेवाः दिवस हंपिं च्वये धैगु सन्देश वनाच्वंगु वाःचायेकेमाः ।
म्येय् छथाय् झी पुर्खापिन्सं थें झी नं तुतिं चुयाः हे म्वाये धैगु खँ दु । थुगु खँया आधार मानेयायेगु खःसा झीपिं आ पुर्खापिन्सं थें तुतिं मचुसे म्वानाच्वंगु धैगु अर्थ वइ । विदेशय् च्वंपिं ला पु्ख्यौलि ज्या मयाः जुइ तर नं अझ नं थन आपलं नेवाःपरिवार पुर्खौलि ज्या यानाच्वंगु हे दनिं । द्यःकिपिं, बुँ ज्या याइपिं, सिँकःमि, कुम्हाः त आदि इत्यादी । हाकनं थुगु हे लाइन लिसें मनमन स्वाकाः झी सकलें न्हूगु युगय् जाये धकाः धयाःच्वंगु दु । न्हूगु युग व पारम्परिक ज्याखँ अखः दिशाय् न्ह्यानाच्वनीगु ज्याखँ खः । टेक्नोलोजी छ्यल धाःसा पारम्परिक आधुनिकीकरण व औद्योगिकरण पाखे न्ह्यानावनिं । म्येया भाव कन्ट्राय्डिक्ट जुयाःच्वंगु वाः चायेके माः ।
म्येया भिजुअल स्वयेगु अवस्थाय् तसकं हे दयनीय खनेदु । म्यें विश्वया च्वकाय् हलिंनेवाः दबू दु धकाः धयाःच्वंसां भिजुअलया क्वाय्लिटिं अथे धयाःमच्वं । क्यामराया न्ह्योने ल्हाः संकेवं म्ये पुरा जुइ धैगु मानसिकतां झी पिहांवने मफू । न्हापा न्हापा नेपाल टेलिभिजनय् फुलबारीइ वैगु नेवाः म्ये हे थ्व सिबें डाय्नामिक जु । म्यूजिक भिडियो दयेके तसकं अःपु धैगु धारणा निं दकलय् न्हापां देशबिदेशय् च्वंपिं नेवाःतय्सं हुयाःछ्वये मानि ।
निर्देशकया नां मदुगु भिडियो दिशाहीन जुयाःच्वंगु वाः चायेके फइ । सकलें सुटबुट न्ह्यानां ल्हाः संकाः च्वंगु दु । सकलें नेवाः धकाः दावी यानाच्वंगु दु । सकलें विश्वया च्वकाय् धकाः तायेकाच्वंगु दु । तर भिडियो धैगु थथे यानां दयेकी मखु ।
वर्ल्ड नेवाः अर्गनाइजेशनं म्ये धाःथे हे नेवाः संस्कृति म्वाकेगु, कला संस्कृति म्वाकेगु आज्जु खसा नेवाःत दुने नं अनेकौं बांलाःपिं निर्देशक पिं दु । वयेकःपिन्त जक एप्रोच याःसां थुगु भिडियो छगू स्वरुपय् वइगु खइ । थुगु भिडियोस आर्थिक ग्वाहलि याःपिं धकाः स्वम्हेसिया नां दु । लोचन मानन्धर, सुनिल कृष्ण श्रेष्ठ व जकःमि हःपा दबू । दातापिं दयाः नं भिडियोया क्वाय्लिटि थथे जुसा नेवाः म्ये ख्यः गुब्ले थहांवइ ? नेपालं पिनेच्वंपिं थुगु भिडियोलय् म्हीतुपिंके १०० वा ५० डलर जक काःसां छगू उत्कृष्ट भिडियो दयेकेगु बजट चुलाइगु खः । छगू फर्माय्लिटि कथं हे जक भिडियो दयेकातःगु खने दु ।
भिडियोस सम्पादनया तःधंगु हे कमि खने दु । म्ये हालाच्वंगु लिप्सिंग तकं नं मिले याये मफू । छगू हे पोजिशनय् च्वनां लिप्सीं तकं मिले याये मफूसां भिडियो या छु अर्थ दत ? केवल ख्वाः ब्वयेगु हे जक इच्छा खनेदु । भचा मेहनत यायेमाः धैगु खँ नं वाः चायेके माः सा कलाकार जुइगु वा धकिमय् अभिनय् याये अपु मजू धैगु नं थुल हे जुइ ।
लिखँ
छुं नं संस्थाया म्ये दयेकेगु बांलाःगु खँ खः । तर म्येयात न्याये याये फुपिं कलाकार निर्देशकपिं दयेक देयकं हरेक खँय् जिं हे याये सः, वा जिं हे याना बिइ धैगु सोचया लिच्वः खनेदु । म्येय् बजेट दुसां नेवाः प्राविधिक पिन्त ज्या मबिइगु अले क्षमतावान निर्देशक, कलाकारपिन्त ज्या मबिइगु हे थौं या प्रवृति जुयाच्वंगु दु । थुगु खँयात वाः चायेके । जय नेपालभाषा मनोरंजन ख्यः।
