कोरोना भाइरस विरुद्ध नेवाः मनामनोरंजन ख्यः

कोरोना भाइरस विरुद्ध नेवाः कलाकारतय्गु कुतः सामाजिक संजालय् खने दत । नेवाः कलाकारपिं मनोरंजनया निंति जक जायाच्वंपिं मखुसे सामाजिक दायित्व नं उलि हे कुबियाच्वनागु दु धैगु भावना नेवाः कलाकार ख्यलं क्यंगु दु । सामाजिक संजालय् दकलय् न्हापां नेवाः कलाकार रूपेन्द्र श्रेष्ठ लिसें वय्कःया परिवारं थुगु इलय् गुकथं सतर्क जुइमाः धैगु खँयात ध्वाथुका भिडियो दयेका भाइरल यानादीगु खः । उकथं हे नेवाः कलाकार भिंतुना जोशीं, आराध्या लक्ष्मी खड्गी, सुरेन्द्र मानन्धरपिंसं नं कोरोनाभाइरस विरुद्ध गुकथं सचेत जुइगु धकाः सन्देश ब्यूगु दु । लिसें नेवाः युट्युब च्यानल पाखें नं थी थी कलाकारपिन्त मुना सामाजिक सन्देश ब्यूगु दु । कलाकार सुरज व्यंजनकार, सरिता बज्राचार्य, रोजिना सुवाल पिन्सं थुगु च्यानल मार्फत हे छगू सामाजिक अभियान नं न्ह्याकुगु दु ।

कलाकार रूपेन्द्र श्रेष्ठं कोरोना भाइरसया संक्रमण पाखें गुकथं बचे जुइगु व रोगया बारे नं थीथी भिडियो दयेका तःगु दु । कलाकार भिंतुना थन मदुसां नेवाः कला क्षत्रयात लुमंकुसें भिंतुनां सकसितं मास्क छ्यलेगु व ल्हा सिलेगु खँय् बः ब्युगु दु । अथे हे कलाकर आराध्या लक्ष्मी खड्गीं धाःसा लकडाउनया अवधिइ पिहां मवनेत इनाप याःसें थी थी टिकटक भिडियोनं अपलोड यानाच्वंगु दु । विशेषत मय्जु आराध्यां धाःसा थःगु छेँ न्ह्योने च्वंगु चौरय् मनूत मुनाच्वंगु व पुलिसं इमित ख्यानाछ्वःगु लाइभ याना मनूतय्त कोरोनापाखें बचे जुइत छेँ पिने मवनेत इनाप यानाच्वंगु दु ।

कलाकार सुरेन्द्र मानन्धरं झीसं लकडाउनया अवधियात त्वाथला पिहांवन धाःसा तसकं भयावह स्थीति ब्वलने फु धकाः स्थीति बोध यानादीगु दु । वरिष्ठ सिने पत्रकार विजयरत्न असंवरे लकडाउनया सरकारी नियमयात पालना यायेत इनाप यानादीगु दु । वय्कःया तिरीमय्जु एवं संचारकःमि मीना बज्राचार्यंनं थुगु खँय् समर्थन बियादीगु दु ।

नेवाः युट्युबया कुतलय् कलाकार सुरज व्यंजनकारं धाःसा थुगु भाइरस खना झी ग्यानाच्वने मज्यु थुकीयात गुकथं निर्मूल याये फइ धैगु खँय् ध्यान बीमाःगु धकाः जोड बियादीगु दु । कलाकार रोजीना सुवालं कोरोनापाखें बचे जुइगु थीथी कथंया उपाय कंगु दु । सरीता बज्राचार्यं कारोनाया बारे यक्व म्वाः मदुगु हल्लाया ल्यू ल्यू मवनेत इनाप याःगु दु ।

मेम्ह नांजाम्ह कलाकार सुनिता श्रेष्ठ (सुनिता ठाकुरं) थुगु ईयात सदुपयोग याये माः धाःसें छेँ ज्या फुक्कं बांलाक्क याः धकाः सन्देश ब्यूगु दु । भिंतुनाया तता लसता जोशींनं छगू सन्देश प्रवाह याःसें थःत योगु ज्याखँ याना मन बल्लाका ति धकाः सल्लाहा सुझाव ब्यूगु दु ।

सरकारं न्ह्याकुगु थुगु लकडाउनया पलाः गुलि तक्क न्ह्याइ धैगु खँय् निश्चितता मदु । आकाझाकां जूगु थुगु लकडाउनय् थथे नेवाः मनोरंजन ख्यःया कलाकार वयाः नेवाः स्वकुमिपिन्त थुकथं मनोरंजनया माध्यमं कोरोना बारे थुइकेगु व सावधानीया लँपू लिसें पनेगु उपाय कनेगु लिसें मनोरंजन बीगु कुतः तसकं च्वछायेबहगु पलाः खः । नेवाः ख्यलय् थथे मन क्वसाःगु कारणं हे थुगु ख्यः थौं तक्क नं अझं झः झः धायाच्वंगु दु।