ताःहाकःगु हाकुगु पौ

न्ह्यखँ

नेवाः युट्युबया न्ह्यब्वयाय् बछलाथ्व षष्ठी खुन्हु प्रिमियर जूगु शर्ट मुभि खः हाकुगु पौ अ टर्निंग प्वइन्ट । योवन शाक्यया निर्देशन व छायांकन अले सम्पादनय् तयार जूगु थुगु शर्टमूभिइ मुक्कं ४म्ह कलाकार दु । थ्व सिबें न्ह्यों नेवाः युट्युबय् शर्टमूभि स्वापू पिदंगुु खः । स्वापू छगू हरर थ्रिल सस्पेन्स प्याखँ कथं दयेकुगु खःसा न्हूगु शर्टमुभियात क्राइम ड्रामाया बाखँ न्ह्यथनेत स्वःगु दु ।

हाकुगु पौया बाखँ

छम्ह अय्लागुलु साहु (रूपेन श्रेष्ठ) दइ । वया कलाम्ह (रोजीना सुवाल) दथुइ उलि बांलागु स्वापू मदु । कायेम्हेसिया अय्लात्वनेगु बानीं याना अबुम्हेस्यां थः सिइधुंकाः थःगु सम्पति फुक्कं छय्या नामय् व केयरटेकर कान्छी (सरीता बज्राचार्य)या नामय् च्वयावंगु दइ । थुगु खँ कान्छीं सिइ मखु । तर जब अय्लागुलु साहुया हाकनं पिने मेम्ह मिसा दुगु व थः हे मचा व कलायात स्यायेगु ग्वसाः ग्वयाच्वंगु कान्छीं सिइका काइ, वं मचा ज्वना बिस्युंवनिं तर बिस्युंवने न्ह्यों साहुया अय्लाखय् बिष तयाः वनिं ।

साहुया कलाया फोन छेँ हे चार्ज याना वंगुलिं कान्छीं फोन याःगु साहुनं ल्ह्वनिं । साहुं मचा ज्वनां छेँ मवःसा साहुनीयात स्यानाबी धकाः ख्याइ । ग्याग्यां हे कान्छी छेँ लिहांवइ । साहुया कलाःम्हं पिनेमेम्ह कला दु धकाः सिइका निम्ह दथुइ ल्वापू जुइ । थ्व हे दौरान अय्लागुलु साहुं थः कलायात स्यानाबी तर बिष दुगु अय्ला त्वने धुंकाः साहु नं सिइ अले कान्छीं मचा लिसें सम्पत्ति नं नयेदयाः कान्छीया मेगु टर्निंग प्वाइन्टं प्याखँ क्वचाइ ।

प्याखँया बांलागु पक्ष

शर्टमूभि जुइगु निंतिं बाखं नं व हे कथं जुइमाः । हाकुगु पौ छगू मर्डर व क्राइम ड्रामा कथं नेपालभाषा ख्यलय् छगू न्हूगु सवाः ज्वनाः वःगु दु । नेवाः प्याखँ सदां छगू हे जक धारय् न्ह्यानाच्वने म्वाः व बिस्कं बिस्कं न्हू न्हूगु धारय् न्ह्याकेयंके ज्यु धकाः नेवाः युट्युबं थुगु प्याखँ निर्माण याःगु दु गुगु च्वछायेबहःगु खँ खः । लिसें थुगु शर्टमूभिया बाखँ नं शर्टमूभिया हे फम्र्याटय् दु गुकीं याना थ्व छगू शर्ट मुभि स्वयाच्वनागु थें ताइ ।

मेगु खँ

हाकुगु पौया हाकः मुक्कं ई १७ः४८ दु । प्याखँया घटनाक्रम सरसरति वनेगु इलय् थ्व ई तसकं हे आपाः । प्याखँया प्रस्तुति छगू शर्ट फिल्म सिबें छगू टेलिसिरियल कथं खने दु । माःगु सिबें ताः हाकःगु दृष्य अले रियाक्शन व हाकनं फ्लाय्श ब्याकया कारण थ्व शर्टमुभि सिबें टेलिसिरियल थें खनेदु , यद्यपि थुकीया बाखँ धाःसा शर्टमुभीया हे खः ।

शर्टमुभिइ पात्र छनौटय् समस्या दु । रूपेन छम्ह तसकं ल्याम्ह मनू खने दुसा छम्ह अय्लागुलु थें खनेमदु । थ्व भुमिकाय् रूपेन सिबें भचा बाज्यः वनेधुंकुम्ह मनूतःसा पाय्छि अथेहे तुं हे सरीताया चरित्रनं तसकं हे ल्यासे खनेदु । थुपिं निम्ह मध्य छम्ह बाज्यः वंगु जुसाः प्याखँया कास्टिंग यक्व हे जस्टीफाइ याइगु खः तर दक्व हे ल्यासे ल्याम्ह खनेदुगु इलय् थुगु प्याखँया बिषय बस्तु गुगु गम्भीर्यता न्ह्यब्वयेत स्वःगु खः व उलि सेल्ला मजूल ।

प्याखँया मेगु कमजोर पक्ष थुगु प्याखँया सम्पाद खनेदु । म्वाःसां म्वाःसां ताःहाकःगु दृष्यत दुथ्याकेगु व हिन्दी टेलिसिरियल पह वयेक सम्पादन यानातःगु कारण थ्व शर्टमुभीया सवाःबिइत भचा चुकेजूगु खनेदु । अभिनय्या ल्याखं रूपेन्द्र छम्ह अय्लागुलु व छम्ह तंगुलु कथं उलि कन्भिन्सिंग खनेमदु । कारण खः रूपनेया थ्व हे लुक्स यक्व हे प्याखनय् कमेडी व रोम्यान्टिक भुमिकाय् खने दयेधुंकल । रोजिनाया भुमिका बांलाजु । रोल कथं न्याये याःगु दु । सरीताया हाउभाउ छम्ह ज्या याइम्ह कान्छी थें सिबें रोजीनाया क्येँह थें खने दु ।

प्याखँया निर्देशनया खँल्हायेगु खःसा योवनया मेहनत थुकी खनेदु तर बाखँया कारण थुकी अस्वभाविकता नं खनेदु । छम्ह अय्लागुलु धायेतुं थःम्हं ययेका व्याहा यानातःम्ह मनुखं थः हे कलायात स्यायेगु ग्वसाः ग्वयाः सफल नं जुइ । थुकी स्वभाविकता खनेदयेकेगु निंतिं कास्तिंगय् ध्यान बी माःगु हे जक बिकल्प खः ।

प्याखँया मेगु कमजोर पक्ष धैगु थुगु प्याखँ छगू मडर व क्राइम ड्रामा जुसां हत्या थें जाःगु प्याखँया तत्वयात गुलि तनावया सृजना यायेमाःगु खः वा गुलि थ्रिलिंग फ्याकटर क्यनेमाःगु खः उलि क्येने फुगु मदु । शर्टमूभिया दकल अहम खँ धैगु हे ट्विस्ट व सप्र्राइजया प्लट खः । प्याखनय् थुकथंया प्लट दुसां थुकीयात प्रभावकारी ढंग छ्यले मफुत । गुगु प्लटयात सप्राइज कथं छ्यलेमाःगु खः व फुक्क हे प्लट कलाकारं हे न्ववाना बिइ । शर्टमुभी थज्योगु खः दुथ्याकाच्वने मज्यु ।

https://www.youtube.com/watch?v=PB9qd4nM4-8&t=1s

लिखँ

शर्टमूभि निर्माणय् नेपालभाषाया प्याखँ न्ह्योने वयाच्वंगु छगू सकारात्मक संकेत खः । शर्टमुभिइ नं न्हू न्हूगु सवाः व जनरया प्याखँ दुथ्यानाच्वंगुयात सकारात्मक रूपं कायेछिं । मेकिंग कथं योवनया निर्देशनय् हाकुगु पौ स्वापू सिबें बांला जु । मेहनत नं यक्व यानातःगु खनेदु । नाइट सीन लिसें बहनीया आउटडोर सीन प्याखँया मेगु बांलागु पक्ष खः । मुल खँ धायेगु खःसा नेपालभाषाया शर्ट मुभिया बाखँ आ नेपालभाषाया हे समाज, साहित्य व परिवेशय् लिकुनेमाःगु खनेदु । पत्याःयाये थाकुगु कथंया बाखँ सिबें सहज रूपं नेवाःतय्सं नाले अःपूगु बाखँत ल्यःसा नेवाः शर्ट मुभीया बजार चकना वनीगु खनेदु । लिसें शर्टमुभी कलाकारया छनौटय् बिषेश ध्यान बी माःगु नं खनेदु । ५ ÷ १० मिनेटया शर्ट मूभीया निंतिं हे चरित्र कथं झीसं कलाकार ल्ये मफूत धाःसा व आ नेपालभाषा शर्ट मूभिया निंतिं दुर्भाग्य जुयाःवनिं ।

नेपालभाषा ख्यलय् नेवाः युट्युब च्यानलं मद्दिक्क शर्टमूभी दयेका छगू गतिशीलता बियाच्वंगु दु । थुगु गतिशीलतायात निरन्तरता बियाच्वनेमाः । भिंतुना ।