न्ह्यखँ
संकिपा निर्माणय् न्हापांखुशी स्वनिगलं पिनं पोखरां नेवाः संकिपाः लमिया निर्माण जूगुु दु । नेपालभासा संकिपा ख्यलय् थ्व छगू तसकं हे सकारात्मक एवं प्रोत्साहानया खँ खः । संकिपा लमि एभिसिडि पोखराया निर्माणय् तयार जूगु संकिपा खः । संकिपाया निर्देशक यादवदास भोछिभोया खः । सरल बाखनय् दयेकातःगु थुगु प्याखँ पारम्परिक व नेवाःतय्सं भोगेयानाच्वंगु बाखँ खः ।
लमिया बाखं
नेवाः समाजय् निगु परिवार स्वाकेगु निंतिं लमिया भुमिका दइ । नेवाः समाजय् मिसा मचायात मिजंमचा चुलाका बिइम्ह हे छम्ह लमि खः । लमि झीगु समाजया छम्ह महत्वपूर्ण मनू खः । प्याखँया बाखं स्वयेगु खःसा निगु बिस्कं परिवार हेरामैंया परिवार बाग्लुंगय् च्वनाच्वंगु दइ सा रत्नया परिवार पोखराय् दइ । लमि वयाः निगु निगु परिवारयात स्वाका बी । लमिं मिजंया बखान याना मिजं बांला धकाः धाइ तर मिजं धाःसा पाकःम्ह लाइ । मिसाम्ह व्याहा याना वनिं तर स्वन्हु दइबलय् हे मिजं पाकः धकाः सिइकाः हेरामैं थः छेँ लिहां वइ । थुगु परिस्थीतिइ लमियात दोष वनिं । लमिं मिजं बांलाम्ह खः । भिंम्ह खः धकाः तर्क बिइ । लिसें नापं च्वच्वं वनकि म्हसियाः वइ मतिना जुइ धकाः खँ तइ । तर मिसा माने जुइ मखु । मिजं पक्ष वनां हयेकः वनिं । मिसा अय्नं माने जुइमखु । अले अन्तय् रत्न हे वनां हयेकः वनिं । सुखान्त अन्त जुइ ।
लमि प्याखँया बाखनय् झीगु हे समाजय् न्यने दुगु स्वये दुगु बाखँ खः । प्याखँ स्वइबलय् थः हे जःखः वा थः पिंनिगु हे सुँ थःथितिया प्रसंग लुयाःवयाच्वंथें मन खुल्ल मिनीगु कथंया दु । कलाकार कथं सकल कलाकारपिंसं कुतः याःगु खने दु। स्वनिगलं पिने नं नेवाः कलाकारपिनिगु अभिनय बांला जु । हेरामैंया भुमिकाय् अन्जलि महर्जनया अभिनय् आश याये बह जू । रत्नया बौया भुमिकाय् उदय बहादुर अमात्य नं बांला हे जू । वय्क छम्ह पोखराय् नेपालभासाया गतिविधिइ तसकं हे सक्रिय नं जुयादी । हेरा मैंया बौया भुमिकाय् सुर्य महर्जन नं बांला जु । अन्य कलाकार सामान्य दु ।
प्याखनय् न्ववाइगु संवादय् स्वनिगलं पिने च्वंपिंसं गथे न्ववाइगु खः अथे हे न्ववानातःगु दु । प्याखँया बांलागु पक्ष थ्व नं खः। भासा संवादं स्वनिगः पिने गज्योगु भासाया प्रभाव दु धैगुनं क्यनाच्वंगु दु । थुकथं हे भासान्वाना प्याखँ दयेकल धाःसा स्वनिगः पिने नं नेवाः प्याखँयात लसकुस याइगु खनेदु ।
मेगु खँ
प्याखँया बाखँ तसकं हे ड्रामाटाइज याये ज्यूगु प्लट दु सां प्याखँयात सामान्य ढंगं जक हे न्ह्याकातःगु दु । थुकी प्याखँया स्क्रिनप्ले कमजोर जुयाच्वंगु दु ।
लमिया भुमिकाय् विक्रम उदास दु । छगू टाइटल रोलय् दुगु भुमिकायात धाःसा बाखनं न्याय याये मफुगु खने दु । गुलि भुमिका लमिया खने दयेमाःगु खः प्याखँया नां कथं उलि धाःसा खने मदु । प्याखँया नां कथं थुगु प्याखँया सुत्रधार हे लमि जुइ माःगु तर थथे जुयाः मब्यु । लमि छगू इलय् थःगु दायित्वं लिचिला वंगु तकं क्यनातःगु दु । लमिं न्ववाइबलय् गुलि आत्मविश्वासं न्वाइ अथे छुं खने मदु । लमि धैपिं गुलि चलाख जुइ वा गथे निगु परिवारयात छगू याइ व नं प्याखनं क्यने मफु । तर थथे खःसां प्याखनं धाःसा लमि धैम्ह इमान्दार जुइ धकाः सन्देश ब्वयातःगु दु अले लमिया ज्या धैगु निगु परिवार जक स्वाकाबीगु तर जीवन हनेत थः थःपिन्सं हे कुतः याये माः धकाः सन्देश बियाच्वंगु दु । थज्योगु सन्देशं धाःसा गलत अर्थ नं बिइ फु । न्हाथे जाम्ह मिजं जुसां मिसां थःगु भाग्य नालाः स्वीकार यायेमाः धैगु सन्देश बिइ गुगु सन्देश थौंया इलय् सान्दर्भिक मजू ।
थुगु प्याखँया कमजोर पक्ष धैगु प्याखँया निर्देशन खने दु । प्याखनय् बाखँया बहावय् यक्व हे सब प्लट दुसां निर्देशकं छ्यले मफुगु खनेदु । बाखँ न्ह्याकेत यक्व हे कन्फिल्क्ट वा द्वन्दया स्थीति तयार जु तर छुं नं कथंया ज्याखँ छ्यला काःगु मदु । ग्वाःज्यःम्ह मिजं गथेयाना सद्दे जुल धकाः प्याखनय् यक्व थाय् क्यने छिं । रत्नया पासाम्हेस्यां स्यना बिइगु, वाः फय् वःथाय् पियाच्वनेगु, हेरा मैंयात छुं कथंया समस्या वइबलय् ग्वाहलि याइगु आदी इत्यादी तर रत्नया पासां म्ये छपू हाः धायेवं ग्वाज्यःम्ह मिजंनं धाःसा याउँक हे म्ये हाली । लिपा अथें ययाः वइ । थज्योगु दृष्य धैगु लेखकं थः यत्थें कलाकारयात थथे याः अथे याः धकाः धाःथे जक हे जुल ।
अझ प्याखंया मू कलाकार हेरामैंया चरित्रनं उलि स्पष्ट मजू । प्याखँया शुरुवातय् छम्ह तसकं हे चंचलम्ह मचा थें याना क्यनातःसां व्याहाया स्वन्हु लिपा हे भात त्वता वइगु । थथे क्यनेत प्याखँया शुरुवातय् हे भचा सःस्युम्ह वा खँ थुम्ह थें जाःगु चरित्र क्यने माःगु खः ।
प्याखँया मेगु कमजोर पक्ष प्याखँ न्ह्याइगु गति खः । प्याखँया बाखँ सामन्य छगू ध्वः थें खः सां प्याखँयात छगू आर्ट फिल्म थें याना तसकं हे ताः हाकःयाना क्यनाःगु दु । छगू हे संवाद लिसा लिसा कयाः ताः हाकः यानातःगु दु । दृष्यया माग मदुसां कमेडी दृष्य जबर्जस्ती दुथ्याकातःगु दु गुकींयाना प्याखँया सवाः स्यनाच्वंगु नं दु । छगू मार्मिक प्याखँया रूपय् दयेके ज्यूगु खःसां निर्देशकं नेवाः प्याखँ धालकी न्हिके माः धकाः पूर्वाग्रहतयाः प्याखँ दयेकुगु खनेदु गुगु थौंया इलय् आवश्यक मजू ।
प्याखँया मेगु अलमल पक्ष धैगु थुगु प्याखँ छु ईया खः धकाः स्पष्ट मजू । प्याखँया बाखँ स्वःसा ५० ६० बर्ष न्ह्यःया थें खनेदु । तर पात्रतय्सं धाःसा थौंया ईया घडि लाकां न्याना तःगु दु । अथेतुं ध्यबा पुलेगु इलय धाःसा फसि छगःया स्वीतका धकाः धाः । खाः छम्हेसिया ४०० तकाः धकाः थौंया चलन चल्तिया नोट ध्यबा पुलाच्वंगु दु अले बाजि तइबलय् धाःसा न्यातका झितकाया बाजितइ । थुकीं यक्व हे कन्फिल्क्ट क्यं ।
प्याखँया तारिफ याये बहगु पक्षधाःसा थुकीया छायांकन पक्ष खः । तसकं हे चटक्क च्वंक हरेक फ्रेम कयातःगु दु । यादवदास भोछिभोया निर्देशन लेखन व छायांकन स्वतां छम्ह हे जुगुलिं प्याखन् निर्देशन पक्ष भचा कमजोर जुयाच्वंगु खनेदु । थुगु खँय् सकारात्मक रूपं छक्व बिचाःनं यायेमाली ।
लिखँ
नेपालभासाया संकिपाया न्हापांगु कुतः पोखरा पाखें जूगु धैगु तसकं हे बांलागु खँ खः । न्हापांगु कुतलय् थुलि याये फुगु धैगु थन स्वनिगलय् च्वना कुतः याःपिंसं नं यायेफू । थुगु प्याखँ धुंका आ थुगु हे टिमं मेगु गज्योगु प्याखँ दयेकी धकाः स्वये ल्यं हे दनिं तर थुगु कुतःयात सकस्यां हे तिबः बिइ आवश्यक जू । प्याखँ सल्ल न्ह्याना वं । सकस्यां थुगु प्याखँ स्वयाः तिबः बिइ हे माः ।
