स्वाना मच्वंगु स्वापू

न्ह्य खँ

नेवाः युट्युबया न्ह्यब्वया नेवाः शर्ट मुभि स्वापूया प्रिमियर जुगु दु । नेवाः युट्युब च्यानल पाखें शर्ट मुभि दयेकेगु ज्याखँ न्ह्यावनाच्वंगु तसकं हे बांलागु व च्वछाय् बहःगु खँ खः । खय्तला हरेक वाःलय् छगू शर्ट मुभि दयेके धकाः नेवाः युट्युबया उलेज्या ज्याझ्वलय् घोषणा नं जुगु खः । थथे धोषणा यायेगु नं तःधंगु हे खँ खः । धोषणा कथं प्याखँ दयेकेगु ज्या न्ह्याकाच्वंगु बांलागु हे खँ खः । थुगु कुतःयात सकस्यां च्वछायानं बिइ माः । प्याखँया टाइटलय् हे छगु हरर संकिपाः धकाः छगू बिधा नं छुटेयाना तःगु जुल । नेवाः प्याखनय् थथे हरर जनरया प्याखँ तसकं हे म्हो तिनि । थुगु प्याखनं हरर विधाया नेवाः प्याखँ दयेकेत मेमेपिं फिल्म मेकरयात यक्व हे हःपाः बिइगु नं खनेदु ।

स्वापू प्याखँ

स्वापू प्याखँया बाखँ लिभ इन रिलेशनयात केन्द्रित याना दयेकातःगु दु । निम्ह पात्र जेनी व योवनया स्वापू ब्रेकअप जुइगु पाखें प्याखँ शुरु जुइ । जेनी योवनयात छेँ नं पिहां हुँ धकाः पितना छ्वइ । तर गाडी दुर्घटना जुइ । अनं छुं ई लिपा हे जेनीया छेँय् थी थी रहश्यात्मक घटना जुइ । प्याखँ अनंतुं क्वचाइ ।

प्याखँया बाखँ छगू शर्ट मुभिया निंतिं तसकं हे उपयुक्त जू । छगू शर्टमुभिया सवाः बाखँया रूपय् प्याखँनय् दु । पात्र माःगु कथं थनातःगु दु । अनावश्यक पात्र मदु । तर अथे खःसां पात्रतय्त जबर्जस्ति संवाद न्ववाकातःगु दु । प्याखँया माग कथं संवाद दु तर दृष्यया माग धाःसा मदु ।

कलाकार कथं सरीता बज्राचार्यया थ्व न्हापांगु शर्टमुभि खः । चरित्र कथं जेनीया भुमिकाय् सरीताया अभिनय बांला जू । योवनया चरित्र प्याखनय् गुलि माःगु खः उलि हे जक दु गुगु बांलागु पक्ष खः । सरीताया मांया भुमिकाय् प्रेमा शाक्य दु । प्रेमा शाक्या अभिनयलय् कुतः खनेदु । बाखँया माग कथं प्रेमाया भुमिकायात न्याय् याःगु दु । जेनीया दाजुया भुमिकाय् धर्मदेव महर्जन दु । अभिनय्या सवालय् मेमेपिं पात्रसिबें भचा कमजोर खनेदु ।

स्वापूया बाखँ कथं थौंया परिवेशय् लिभ इन रिशेलनया लिच्वः गथे जुइफु धैगु खँय् केन्द्रित दु । परिवारया स्वीकृति बिपरीत थःम्ह ययेकातइम्ह लिसे व्याहा मयासे जीवन हनाच्वनेगु इलय् ल्वापू जुइवं छक्वलं म्हगसया संसार गुलि याकनं ध्वष्ट जुइफु धैगु छगू मूर्त सन्देश थुगु प्याखनय् लुयाःवइ । तर अथे खःसां थुगु प्याखनय् हाकनं मेगु छगू मोड दनिं । शर्ट मुभिया ल्याखँ थुगु मोड गुलि आवश्यक जु धैगु खँय् धाःसा दक्वसिया छगू हे धारणा मजुइ फु ।

मेगु खँ

नेवाः शर्ट मुभियात छगू हरर मुभि धकाः क्याटागोराइज याइगु इलय् अवश्य नं छगू पूर्व उत्साह दैगु हे जुल । तर प्याखँ स्वस्वं वनिगु इलय् धाःसा प्याखनय् हररया तत्व धाःसा गुलि सशक्त जुइ माःगु खः उलि मजू । तसकं हे सामान्य व प्रचलित मान्यताया हरर तत्व दुथ्याकातःगु दु गुकीं थौंया जमानाय् सुयातं ख्याये फइ मखु । प्याखँया मेगु कमजोर पक्ष धैगु थुकीया सम्पादन पक्ष खः । म्वाःसां म्वाःसां दृष्य ताः हाकःयाना सुटिंग यानातःगु छेँया दृष्य ब्वयेगु ज्या जुयाच्वंगु दु । वाइन त्वंगु छगू दृष्यया निंतिं क्वथाय् वनां वाइन माला वाइन कयाः मेगु क्वथाय् वनां वाइन टेबलय् दिकाः अले हाकनं त्वनेगु दृष्य तसकं हे ताः हाकः । स्कृप्ट कथं जेनी थःगु स्वापू स्यनां दुःखि जुइगुलिं वाइन त्वनिगु छगू दृष्य जक हे खः । शर्ट मुभि थुलिमछि विवरण स्कृप्ट कथं आवश्यक मजू ।

अथे तुं जेनी छथाय् च्वना ख्वयाच्वनिगु दृष्य नं माःगु सिबें आपाः हे क्यना तःगु दु । खः, जेनीयात दुःख जुयाच्वंगु दु । व ख्वयाच्वंगु दु । अथे ला व चच्छि नं ख्वयाच्वने फु तर अथे धायेवं व हे ख्वयाच्वंगु जक क्यना प्याखँ ताः हाकःयायेगु सम्पादन पक्षया कमजोरी खः।

जेनीयात केन्द्रीत याना प्याखँ दयेकाःतःगुलिं जेनीया चरित्रयात सुक्ष्म रूपं न्ह्यब्वयातःगु पाय्छि खः । तर जेनी ग्याइगु इलय् जेनीया ख्वालय् चःति भुसुभुसु वःगु क्यनातःगु तसकं हे अस्वभाविक खनेदु । मेकअपय् चःति भचा म्हो क्यने माःगु खः ।

जेनी आकाझाकां गायब जुइगु दृष्य प्याखँया सप्र्राइज प्लत खः । तर थुगु प्लतयात निर्देशक योवनं जस्टिफाइ याये मफु । छाय् गायब जुल धैगु खँ झन हे अस्पष्ट । गाडी दुर्धटना जुइवं गाडी चालक सित धैगु स्पस्ट मजू छाय्की मनूया लाश मक्यं । गाडी दुर्धटना जुइवं हे मनू सिइ माः धैगु छगू पूर्वनिर्धारित मुल्य व मान्यताय् न्ह्याःगु दु । दुर्धटनाय् लाय्वं जेनी त्वनेत्यंगु चुरोट धाःसा कुचाकुचा जुयाः स्यंका बिइ तर वं त्वनेत्यंगु वाइन धाःसा छुं हे जुइ मखु । छु चुरोट जक त्वने मज्यु वाइन त्वंसां ज्यु धकाः प्याखनं सन्देश बिइत्यंगु खःला छाय्की योवनया मृत्युला वाइन त्वने २ घौ न्ह्यः हे जुइ धुंकुगु दु ।

अथे हे अपाय्धंगु छेँय् जेनी याकःचा च्वनाच्वंगु दु । जेनी गाय्ब जुइवं हे जेनीया मां व दाजु थ्यंक वइ । छेँय् दुहांवयेत जेनीं न्हापा हे लुखा चायेकातःगु खनेदु गुगु खँ थौं कन्हेया स्थीतिइ संभव मदु छाय्की सुनानं थौंकन्हे लुखा चायेका च्वनिं मखु व नं बहनी ।

प्याखँया दकलय् कमजोर पक्ष धैगु थुगु प्याखँया ट्विस्ट खः । गुगु अदृष्य शक्ति वा योवनया भुतं जेनीयात चुरोट त्वनी धकाः चुरोट स्यंकाः बिइ व हे शक्तिं धाःसा जेनीयात हाकनं टिभिइ कैद याइ । थःम्हं योम्हेसित वा ययेकाम्हेसित छाय् हाकनं स्याइ धैगु खँ थुगु प्याखँलं लिसः बिइ मफु । उकिं थुगु प्याखँया मेगु कमजोर पक्ष धैगु हे प्याखँया बाखँ नं खः ।

लिखँ

नेवाः प्याखनय् हरर जनरया प्याखँया शुरुवात जुइगु खँय् शंकाः मदु । थुगु प्याखनं मेमेगु यक्व हे नेवाः शर्ट हरर प्याखँयात तिबःबिइगु आश कायेछिं । थुगु प्याखँया अभिनय् पक्ष तसकं हे क्वातु लिसें क्यामरा पक्ष नं बांला । बाखँलय् न्हूगु सवाः दु लिसें छगू शर्ट फिल्मया फर्माय्टय् दु । नेपालभासाया प्याखँ थुलि मार्गय् न्ह्यानाच्वंगु धैगु लसताया खँ खः । थुगु प्याखँ लिपा नेपालभासा ख्यलय् छम्ह न्हूम्ह कलाकार कथं सरिता बज्राचार्य थःगु आगमनया सुचं ब्युवःगु दु । बःचा हाकःगु संकिपा स्वापूपाखें थुलि उपलब्धी दुगु धैगु तसकं हे बांलागु खँ खः ।

https://www.youtube.com/watch?v=8Zalq0w7FAE