मातृभाषा दिवसया लसताय् – बचं

न्ह्यखँ

अन्तर्राष्ट्रिय मातृभाषा दिवसया लसता पियाः युट्युबय् रिलिज याःगु छगू शर्ट मूभि खः बचं । शर्ट मुभी रिलिज यायेगु निंतिं नं बःचा हाकःगु सुभाय् देछाः ज्याझ्वः याना प्रिमियर यायेगु छगू न्हूगु चलन शुरु जुयाः वयाच्वंगु दु । थुकीं नेपालभासाया संकिपा ख्यलय् न्हुगु उत्साह ब्वलनि धकाः भलसा काये थाय् दु । अझ नेपालभासा ख्यःया दिग्गज कलाकारपिंत लिसें संकिपा ख्यः लिसे स्वाःपू दुपिंत थुकथं मुंकेगु ज्याखँनं तसकं हे च्वछायेबहजु । बचं संकिपाया प्रिमियर यायेत बागबजाः स्थीत सिटिम्याक्स हलय् प्रिमियर जूगु खःसा थुगु प्याखँ आः युट्युबय् नं अपलोड जुइ धुंकुगु दु ।

प्याखँ

बचं छगू शर्ट मूभि । नेपालभासाया दिग्गज कलाकार व प्राविधिक पिनिगु जमघट जुयाच्वंगु शर्ट मुभि । प्याखँया च्वमि, निर्देशक व निर्माता कथं आर्यम नकःमि दु । छायाँकन व सम्पादनय् सोहन मानन्धर, मेकअपय् सनम कुमार श्रेष्ठ, रिकर्डिगय् बालकृष्ण बंशी कलाकारय् नेपालभासाख्यःयां सुपरस्टार आशिष्मा नकःमि व राजु महर्जन दु । सकलें हे दिग्गज पिं ।

बचं प्याखँया बाखँ स्वयेगु खःसा थुकी छम्ह मचाया मनोबिज्ञानयात न्ह्यब्वयातःगु दु । थःगु मांभाय् मां अबुपिंसं छाय् मस्यना अतःमतः कंम्ह मचाया मनोबिज्ञानयात न्ह्यब्वयेगु कुतः याःगु दु ।

बचंयात छगू शर्ट मुभि कथं धयातःगु दु । थुगु शर्ट मुभिं मस्तय्त नेवाः भाय् स्यने माः मखुसा छन्हु इमिसं हे जिमित थःगु माँ भाय् छाय् मस्यना धकाः न्यन धाःसा मां अबुं छु लिसः बिइगु धैगु सन्देश ज्वना अन्तर्राष्ट्रिय मातृभासा दिवस हनेत बिस्कं हे परिकल्पना ज्वना ए एन इन्टरटेन्मेन्टं न्ह्यब्वःगु दु । अन्तर्राष्ट्रिय मातृभासा दिवसया नितिं थुगु प्याखँ तसकं हे पाय्छिगु संकिपा खः ।

मेगु खँ

बचं प्याखँ अन्तर्राष्ट्रिय मातृभाषा दिवसय् बाहेक मेगु दिनय् स्वःल धाःसा थुकी गज्योगु लिच्वः लाकी धकाः नं छक्वः वाःचायेके आवश्यक जु । शर्ट मुभि धायेवं हाकलं चिहाकः जुइवं मगाः । थुकीया तत्व पाना च्वनिं । झीसं समय् बजि नयेबलय् धौ तयेतुं भ्वय् जुइ मखु । भ्वये न्यायेकेत बजि घासा भ्mवलिं तयेमाः । भ्वयेया तत्व पाइ । भ्वय्या कवाफ तयाः समयबजि नइ मखु । अथे तुं प्याखँ चिहाकः दयेकतुं उकिं शर्ट मुभिया इल्मेन्टस् पानाच्वनिं । उकिइ ध्यान बी माः ।

शर्ट मुभिया ओपनिंग शटय् छेँ दु । मचा दु । प्याखँ मचाया धकाः पुष्टि याइ । तर शर्ट मुभि सिबें छगू लंग मुभि कथं शट्स न्ह्यां वनाच्वंगु दु । डाइलगत म्युटयाना फास्ट फर्वाड याना टाइम ल्याप्स क्यनातःगु दु । ७ मिनेटया प्याखनय् १ २ मिनेट मेगु डाइलग थप याना छु हे पाइगु खः तर निर्देशकं धाःसा चिहाकःगु प्याखँ दयेकेगु निंति थुकथं न्ह्यब्वःगु जक खःला धैथे मत्तिइ वनिं । उकथं हे सम्पादनया ज्याखँ धैगु दृष्य जक स्वाकेगु मखुसे म्वाःमदुगु दृष्य प्याखँ लिसे स्वापू दुगु दृष्य जक तयेमाःगु खः । स्वयंभुइ चाःह्युवनिगु इलय् स्वयंभुया हे डक्युमेन्टरी दयेके थें याना अनावश्यक फुटेज मुंकातःगु दुसा राजु व आशिष्मा लिसे नापलाःम्ह मनू वने धाये धुंकाः हाकनं बाया वनेत वने न्हिं धायेगु शट प्याखँया डिमाण्ड मखु । अथे हे तुं थुगु प्याखँ छेँ नं शुरु मयाःसे तप्यंक स्वयंभुं शुरु याना मचाया फ्लाय्स ब्यायकय् वने दुसाः गाः । न्ह्योनेया दृष्य प्याखँया निंतिं आवश्यक मजू ।

प्याखँयात छुं भचा ओभर ड्रामाटिक यायेगु निंतिं मचायात ख्वयेकातःगु दु । मचाया मनोबिज्ञाान क्यनेगु निंतिं भगवान बुद्ध छन्हु नगर चाह्युवंगु इलय् दुःखि मनूत खना अजू चाः थें क्यन । शर्ट मुभिं थथे क्यनेत नं छाय् व मचां न्हापा लिपा गनं नेवाः भाय् हे मलाःगु जुइ धकाः परिवेश क्यने फयेमाः ।  थुगु परिवेश नेपालं पिने जुसा हाकनं पाय्छि जुइ । तर नेपालय् च्वनां गुब्लें नेवाः भाय् हे मन्यंम्ह मचा धकाः पत्याः याये थाकुगु परिवेश क्येनातःगु दु । थज्योगु परिवेशं प्याखँयात छखें हास्यास्पद नं दयेका बी ।

आर्यम नकःमिं थ्व सिबें न्ह्यो नं मिखा दुम्ह कां धकाः छगू संकिपा दयेकुगु ख । उगु प्याखँया थिम नं थथे हे मांअबुं अंग्रेजि खँ ल्हयेमाः धकाः मस्त लिसे अंग्रेजि बच्छि भाय् ल्वाकछ्याना खँ ल्हाना जुइ । छगू हे थीमय् हाकनं रिपिट याःगु खनेदुगु थ्व फिल्मयात भचाः अःपुक्क हे न्हापांगु दृष्य स्वयेवं हे गथे क्वचाइ धकाः अनुमान याये छिं ।

अथे हे तुं प्याखँया छगू कमजोर पक्ष मेगु छु धाःसां सकल मू कलाकारं अंग्रेजी न्ववाइ । राजु महर्जनं न्ववाइगु अंग्रेजी टोनय् नेवाः पह दु । आशिष्मा छगू ई अमेरिकाय् च्वनावःगुलिं वैगु टोन अमेरिकन वः जबकी इमि मचां न्ववाइगु टोन धाःसा ब्रिटिस पह दु । कलाकारया प्रभाव धैगु हे संवादं बिइ । थथे टोन पाक्क न्ववाइगु इलय् थुगु परिवारया केमेस्ट्री गुलि क्वातुइ माःगु खः उलि क्वातुनाच्वंगु मदु ।

https://www.youtube.com/watch?v=9OMNT0f4CXc&t=57s

लिखँ

प्याखनय् बालकलाकारया रूपय् क्रिजा श्रेष्ठया अभिनय् तसकं हे बांला जु । अथे तुं कलाकार राजु व आशिष्मा अले प्रकाश श्रेष्ठ नं गनं धायेथाय् मदयेक अभिनय यानातःगु दु । क्यामरा, समा व ध्वनिं नं तसकं हे बांला । सकलसिया मेहेनत खनेदु । प्याखँया सन्देशयात सकस्यां सकारात्मक रूपं नाले माः । थुगु प्याखँया सन्देशात्मक पक्ष बांला जु ।