न्ह्यःखँ
नेपालभासाया संकिपाख्यलय् न्हू न्हूगु जनरया संकिपाः पिदनेगु क्रम न्ह्यानाच्वंगु दु । अकसर नेपालभासाया संकिपा लोकबाखं, उपन्यास वा थी थी कथंया कमर्सियल बाखंया आधारय् नं प्याखँ दयेकेगु याःसां छुं ई न्ह्यःतिनि हे रिलिज जूगु संकिपा जामनः गुभाजुं नेपालभासा ख्यलय् नं बायोपिक संकिपाया लुखा चायेकुगु दु । जामनः गुभाजु छम्ह लौकिक चरित्र हे खःसा अलौकीक शक्ति दुम्ह एतिहासिक पात्र धकाः झीसं न्यनावयाच्वनाम्ह खः । थज्योम्ह पात्रया जीवनय् जूगु घटना छगू लोकबाखं कथं हे लोकंह्वानाच्वंगु खः । जामनः गुभाजुया चरित्र नेवाः संकिपाः ख्यलय्नं उतिकं हे लोकंह्वाःम्ह चरित्र कथं नं खनेदु । थी थी नेवाः प्याखनय् नं जामनः गुभाजुयात कयाः संकिपाः हे दयेकातःगु दु । संकिपा तापलय्, शर्ट मुभि द मिथ जीरो लय्नं जामनं गभाजुया चरित्र दुथ्याकातःगु दु । थ्व हे ल्याखँ जामन गुभाजुयात हे मू पात्र दयेका संकिपाया रूपय् हे जामनं गुभाजु पिदंगु दु ।
संकिपा
जामनः गुभाजु छम्ह लौकिक चरित्र । जामना गुभाजुया आलौकिक शक्तिया बारे झीसं लोकबाखँ कथं न्यनाच्वना । थज्योगु हे टुक्रा टुक्रा लोक बाखँयात स्वाकाः जामन गुभाजु संकिपाः दयेकातःगु दु । जामनं गुभाजु १७औं शताव्दी पाखेया ईयाम्ह कथं न्ह्यब्वयातःगु दु । थथे धायेगु आधार जामना गुभाजु व प्रताप मल्ल लिसे प्याखनय् क्यनातःगु लिं क्वछिइ फु । जामनः गुभाजु मुसुं बाहायाम्ह गुर्जु धकाः क्यनातःगु दु । त्वालय् छुं नं समस्या वइगु इलय् जामनं गुभाजुं त्वाःबाहायापिं मनूतय्त वःगु समस्या ज्यंकाच्वंगु दइ । थथे हे अनेतने घटना क्रम कथं देशय् वाः मवयाः सुख्खा जुइगु इलय् जामनं गुभाजुं जुजु प्रताप मल्लयात थुकीया समाधान कंसें शान्तिपुर दुने दुहांवनां नागया हिं च्वयातःगु सफू निभाःयात क्यं धकाः खँ कनिं । जुजुं अथे हे याइ अले वाः नं वइ । थनं लिपा जामन गुभाजु समाधि वनी । अले थः तिरीमय्जुयात थः क्वथां पिहांमवतले पिने हे पियाच्वं धकाः धाइ । तर कलाम्ह मन माने मजुयाः दुने स्वः वनेगु इलय् धाःसा जामन गुभाजु सनी मखु अले जामनं गुभाजु सित धकाः अन्तिम संस्कार याना बी । तर अन्तिम संस्कारयाना लिहांवःपिंसं जामनः गुभाजु लँय् हे नापलाइ । थः समाधिइ च्वनाच्वंगु शरीर नष्ट जुइ धुंकाः जामनः गुभाजुं त्वालय् ख्वाँय् छम्ह, कां छम्ह व लाटा छम्ह दत्तले थः मिसीनी धैगु लुमंकाति धकाः थःगु लँपुइ वनिं ।
कलाकार
कलाकार कथं जामना गुभाजुया चरित्रय् शुशिल राजोपाध्याय दु । जामनः गुभाजुया तिरी मय्जु कथ सरस्वती मानन्धर दु । मु भुमिकाय् निम्ह हे खःसां मेमेपिं कलाकार कथं अन्नपूर्णेश्वरी श्रेष्ठ, पुस्कर माथेमा, उदेन न्हूसाय्मि, सुरज व्यंजनकारया बःचाहाकःगु भुमिका दु । प्याखनय् जामनः गुभाजुयात हे जक बः बियातःगु कारण मेमेपिं कलाकारया भुमिका उलि त्येल्ला मजु । मेमेपिं कलाकार कथं साकार पन्तया उपस्थीति खनेदु । चटके कथं साकारया अभिनय् बांलाजू । दक्व कलाकार बःचा धंगु भुमिकाय् खःसां अमिता जोशीया अभिनय्लं स्वकुमियात प्रभावित याः ।
जामन गुभाजु संकिपाया बांलागु पक्षकथं स्वयेगु खःसा थुकी प्याखँ क्वचायेके धुंकाः कलरग्रेडिंगयाना प्याखँयात अझं मनमोहक दयेकुगु दु । थी थी थासय् भिएफएक्स छ्यलाः नेवाः प्याखँनं आः कल्पनशीलताया उडानय् ब्वयेत तयार दु धकाः न्ह्यांवःगु खनेदु । भुखाय् ब्वयाः मदयेधुंकुगु काष्ठमण्डप भिएफएक्स छ्यला दयेकुगु दु । दालाय् लः फःगु, इमाः जुयाः ब्वया वंगु इत्यादी फुक्कं तारिफ यायेबहःगु कुतः खः । प्याखनय् थी थी पुलांगु बसःजा व अय्ला कायेगु प्रविधि दक्युमेन्ट्रीथें याना क्यनातःगु दु ।
निर्देशक रवि साय्मिया थ्व न्हापांगु कुतः मखुः । थ्व सिबें न्ह्यः रवि साय्मि छगू चिहाः संकिपाः वाःचाः दयेके धुंकुगु दु । थुगु संकिपाय् नं सुशिल राजोपाध्याय् व सरस्वति मानन्धरया हे जोडी दु । ताःहाकगु संकिपाय् रवि साय्मिया अवश्यनं न्हपांगु कुतः खः । थःगु कुतल रवि साय्मि छम्ह क्षमतावान निर्देशकया रूपय् खनेदु तर नं रवि साय्मिं थःगु निर्देशन क्षमता पुवंक स्वये ल्यंदनिं । जामन गुभाजु संकिपाया बाखँ छुं खास मखु । थुकी क्यने माःगु जामनं गुभाजुया थी थी घटना सुक्ष्म रूपं क्यनेमाःगु खः । तर प्याखनय् मज्जिमगागु दुष्य मक्यंसे सामान्य जनजीवनया दृष्य जक केन्द्रित जूगु खनेदु । थुगु प्याखँया मू दृष्य धैगु शान्तिपुर दुने दुहांवनेगु दृष्य खः तर जामनः गुभाजु दुहांवंगु नं ड्रिम सिक्वेन्स जक थे खने दुसा प्रताप मल्ल दुहांवंगु धाःसा विस्तृत रूपं छुं नं मक्यं । इतिहासया दस्तावेज कथं प्रताप मल्ल शान्तिपुरय् दुहांवंगु अभिलेख दु तर थुकीयात टाइमल्याप्स क्यनातःगु यक्व हे चित्तबुझे मजुइफु छाय्घाःसा थुगु प्याखँया दकलय् मूल दृष्य हे थ्व हे जुइमाःगु खः ।
आलोचना
प्याखँया म्हाइपुगु पक्ष धैगु थुकी क्यनेमाःगु दृष्यत न्ववाना सिधयेका तःगु दु अले न्ववायेमाःथाय्नं कनां सिधयेकातःगु दु । जामनः गुभाजुं प्रतापमल्ल व लमकर्ण भट्ट सर्पजुयाः यलय् होम याःथासयं बचेयाना हल धकाः म्हुतुं न्वाना सिधेकेगु प्याखँया धर्मं मब्यु । प्याखनय् थुगु दृष्यया आवश्यक मजू तर जुसां न्ववायेगु सिबें एक्शनय् क्यने हे माः । अथे हे जुजु व प्रजाया संवादयात हाउभाउ जक क्यनेगु सिबें न्ववाये माःगु खनेदु । थज्योगु दृष्य आवश्यक जु । प्याखँया मेगु आलोचना याये बहगु पक्ष धैगु जामनः गुभाजुया छेँ खः । १७औं शताव्दीया इलय् नेपाःया काष्ठकला उत्कृष्ट जुयाच्वंगु ई खः । जामनः गुभाजुया छेँ क्यनातःगु तसकं हे पाय्छि मजू कारण खः न्हापाया छेँ वास्तुकलाया उत्कृष्ट नमुना जुइमाःगु खःसा मुसुंबहाःनं बाहाःया स्वरूपय् दयेमाःगु खः । प्रताप मल्लया पालय् आपलं हे कलाकृति निर्माण याःगु ई खः ।
लिखँ
तर न्ह्याक्व हे खँ दुसां जामनः गुभाजु संकिपा तसकं हे मेहेनत याना दयेकातःगु खने दु । प्याखँनं झीसं न्यनातैगु बाखँयात हूबहु उतार यायेगु कुतः जूगु दु । नेवाः प्याखँ निर्माण जुयाः नं पिहांवये मफयाच्वंगु इलय् प्याखँया पिदंगु इलय् नेवाः संकिपा ख्यलं सन्तुष्टीया सासः ल्हायेगु थाय् दु । परम्परागत लोकबाखँयात थथे चित्रण याये धुंकाः आ अझं मेमेगु थज्योगु लोकबाखँ व लोकचरित्र हाकनं मेमेपिंसं नं संकिपाया रूपय् न्ह्यब्वइगु निश्चित दु ।
