न्ह्यखँ
थुगु पालय् थःगु हे व्यक्तिगत अनुभव पाठकपिनि दथुइ इनेत्यना । नेवाः कला ख्यलय् छगू न्हूगु अनुभव याना । पत्रकारिता याना वयाच्वनाम्ह, संकिपाय् अभिनय नं यानास्वया । खतुं न्हापा अन्तरक्याम्पस ख्यालः कासा जूबलय् ख्यालकय् अभिनय यानागु दुगु खः तर, संकिपाय् धाःसा दक्कले न्हापां खः । दर्शनवीर शाक्यया निर्देशनय् पेज थ्रीया ब्यानरय् निर्माण जूगु चीहाकःगु संकिपा ‘द मिथ ०’य् छगू भूमिका म्हिता । छम्ह ऐतिहासिक जुजुया पात्र जूगुलिं नं थुकी मन क्वसाःवनाः संकिपाय् अभिनयया अनुभव नं कया हे स्वया ।
गुकथं संकिपातक्क थ्यन
थौंकन्हय् नेवाः पत्रकारिता क्षेत्रय् छगू न्हूगु वहस न्ह्याःगु दु – ‘नेवाः भासं पत्रकारिता यायेगु खः अथवा नेवाः पत्रकारिता ख्यः धयागु भाषिक अनुराग जक प्वंकाच्वनेगु खः ?’ जिं थःगु व्यक्तिगत खँ धायेमाल धाःसा पत्रकारिता ख्यलय् पलाः न्ह्याःवंगु धइगु हे भाषिक अनुरागं हे खः । थःगु मांभाय्या नितिं छुं याये धइगु ल्याखं च्वसा न्ह्याकायंका । थौं वयाः पेशा हे नेवाः पत्रकारिता ख्यः जूवन । नेवाः पत्रकारिता ख्यलय् आः भाषिक अनुरागं जक मखु, व्यावसायिकताया विकास यायेमाः नं धया ला च्वना थौंकन्हय् । तर भाषिक अनुराग मदुगु हे नं ला मखु । व हे भाषिक अनुरागया कारणं नेवाः ख्यलय् थीथी क्षेत्रय् फुकथं चाःकथं सनाच्वना ।
नेवाः ख्यलय् पलाः न्ह्याकाच्वनेगु हे झ्वलय् गबलें गबलें संकिपा ख्यलय् नं पलाः न्ह्याःवं । थ्वयां न्ह्यः प्यंगू न्यागू, वृत्तचित्र नं दयेकेधुन । उलि जक मखु, बाराःसी संकिपायात नेवाः भासं डबिङ याःबलय् हिरोया नितिं सः नं बियाः डब नं याये धुन । नेपाल टेलिभिजनय् हसना ज्याझ्वः न्ह्याकागु इलय् प्यपु न्यापु म्यूजिक भिडियो निर्देशन नं यायेधुन । थ्व दक्वं ज्याखँत क्यामेरा ल्यून अथवा धाये धकिं ल्यूनेया ज्याखँत जुल । क्यामेरा ल्यूने च्वनाः निर्देशन ला यायेधुन तर, धकिं न्ह्यःनेया खँ ल्हात धाःसा छगू दबू ख्यालः बाहेक मेगु छुं मयानानि । व हे झ्वलय् द मिथ ० या खँ वल । जिगु नितिं थ्व छगू न्हूगु हे खँ ला पक्कां खत, क्यामेरा न्ह्यःने एक्टिङ यायेगु । उकिया लिसें मेपिनिगु निर्देशनय् ज्या यायेगु नं न्हूगु हे ज्या जुल जिगु नितिं ।
छु खः मिथया विषयवस्तु
द मिथ ० दुने थःगु खँ ल्हाये स्वयां न्ह्यः द मिथ ० या विषयवस्तु छकः सीके । सकतां बाखं थन हे कन धाःसा संकिपा स्वयेबलय् मजा हे वइमखुत । बाखंया सार धायेबलय् झीगु पुलांगु ग्रन्थ संरक्षण यायेमाल धइगु हसना ज्वनाच्वंगु बाखं खः थ्व । झीके आपालं पुलां पुलांगु ग्रन्थत दु । गुलिखे धार्मिक ग्रन्थत ला गुगुं कालखण्डय् च्याका नं छ्वःगु दुसा गुलिखे विविध कारणं नष्ट जुयावन । गुलिखे ग्रन्थ ला थौंतक्क नं विदेशय् म्यूजियमय् च्वनाः झीत हिस्यानाच्वंगु दनि ।
उकथंया पुलां पुलांगु ग्रन्थ दुने दुग्यंगु ज्ञान सुलाच्वंगु दइ । उकिया उचित संरक्षण यायेमाःगु, उकिया दुग्यंगु अध्ययन यायेमाःगु खः । झीगु पुलांगु ग्रन्थं हे झीगु समाजयात सुमार्गय् वनेगु ज्ञान लिसें लँपु क्यनाच्वंगु दइ । उगु ज्ञानयात खःकथं लानाकयाः न्ह्याःवंसां उकिं भिंगु लँपु क्यनी, आज्जुतक्क याउँक थ्यंकाबी । तर व हे ज्ञानयात मखुकथं थुइकाः मखु कथं न्ह्याकायंकेत स्वल कि उकिया परिणाम भिंगु जुइमखु । थुकथंया हे सन्देश द मिथ ० चिप्याखं दुने बीत स्वयाच्वंगु दइ ।
थुकथंया हे साउथ इन्डियन संकिपा छगू लुमंसे वल, ‘चेन्नइ भर्सेज चाइना’ । थुकी नं पुलांगु ग्रन्थया अध्ययनया आधारय् छगू प्राचीन अद्भुत शक्तियात म्हसीकाः फिल्मया हिरोयात व हे शक्ति बी अले हिरो नं व हे शक्तिया बलं लोकया कल्याण याइ । प्राचीन शक्ति व आधुनिकताया फ्यूजन कथं न्ह्यब्वयातःगु दु थुकी । द मिथ ० या थिम धाःसा छुं छुं भचा थथे हे खः । थुकी नं प्राचीन ज्ञान व आधुनिकताया फ्यूजन थें हे बाखं न्ह्यब्वयातःगु दु । तर चेन्नइ भर्सेज चाइना व द मिथ ० या बाखंनिसें प्रस्तुति सकतां यक्व हे पाः ।
नेवाः ख्यलय् चिप्याखं अले चिप्याखंया प्रस्तुतिकरण
नेवाः कला ख्यलय् फिचर संकिपा ला आपालं दु । चिप्याखं धाःसा ल्याखय् यक्व हे म्ह्वः जक दु । छुं दँ न्ह्यः मच्छिन्द्र क्लबं ग्वसाः ग्वःगु नेवाः संकिपा नखतय् चिप्याखं धेंधें बल्लाः कासा जूबलय् छुं चिप्याखंया निर्माण जूगु खःसा आः थुगुसी हाकनं चिप्याखं कासा जुयाच्वंगु इलय् नं चिप्याखंत निर्माण जूगु दु ।
चिप्याखं दयेके उलि अःपूगु खँ धाःसा मखु । स्वयेबलय् झिगू, झिंन्यागू मिनेटया संकिपा खः, छन्हुं हे सुटिङ सिधइ, छन्हु हे एडिटिङ सिधइ, छु तःधंगु खँ खः धइथें च्वनी । तर फिचर प्याखं दयेके स्वयां नं चिप्याखं दयेके झन थाकु । म्ह्वः ई दुने, संकिपाया सन्देश स्वकुमियात थुइकाबीमाःगु, छुं नं कथंया कन्फ्यूजन मदयेक, व नं न्ह्यइपूगु कथं । संकिपालिसे सम्बन्धित हरेक पक्षयात छगू हाथ्या जुयाच्वनी चिप्याखं धयागु ।
चिप्याखं वा सर्ट फिल्म धयागु छुं कथंया सन्देशमूलक जुइमाः । विना सन्देश सर्ट फिल्मया महत्व हे दइमखु । थुकी चीहाकःगु इलं हे यक्व खँत कनाच्वनेमाली, स्वकुमियात थुइकाबी मालच्वनी । म्ह्वः डायलग दुने आपाः प्रस्तुति जुइधुंकेमालाच्वनी । प्रस्तुति नं प्रभावकारी प्रस्तुति जुइमाःगु । गुलिखे प्रस्तुति तप्यंक मधाःसे सांकेतिक रूपं क्यनाच्वनेमाली । फक्व संकेत अथवा सिम्बोलया पाय्छि छ्यलां प्रभावकारी प्रस्तुतिं समाजया चित्रण यायेमाःगु । थुज्वःगु यक्व हे खँय् ध्यान बीमाः शर्ट फिल्मय् । बाखं च्वइम्हेसिनं, स्क्रीप्ट च्वइम्हेसिनं व हे कथं बाखं, स्क्रीप्ट च्वयाबीमाल । निर्देशकं नं चिहाकःगु ई दुने गुकथंया प्रस्तुति प्रभावकारी जुइ, व बिचाः यानाः पृष्ठभूमि, कलाकारया एक्सप्रेरसन, डायलग डेलिभरी सकतां बिचाः यानाः निर्देशन यायेमाल । कलाकारतय्सं नं व हे कथं चीहाकःगु सीन दुने प्रभावकारी ढंगं एक्टिङ यायेमाल, एक्सप्रेसन बीमाल, डायलग न्वःवायेमाल ।
चिप्याखनय् कलाकारयात हाथ्या
थुगु शर्ट फिल्मय् जिगु भूमिका छम्ह जुजुयागु खः । जुजु धायेबलय् ख्वालय् छगू आत्मविश्वासं जाःगु, थः दक्कले च्वय् च्वंम्ह धइगु अहम् नं दुम्ह, व हे कथंया साहसी, प्रभावशाली व्यक्तित्व दुम्ह मनू । थज्याःगु सकतां खँत डायलगं न्वःवानाः मखु, न्वःमवासे ख्वालं क्यनेमाःगु । उलि अःपूगु धाःसा मखु । कलाकारं अभिनयया झ्वलय् ध्यान बीमाःगु च्वय् न्ह्यब्वयागु सकतां खँत न्हापा ब्वनातयागु खः, न्यनातयागु खः । अले म्यूजिक भिडियो निर्देशनया दौरानय् मेपिन्त धया नं च्वनागु खः । तर आः थुगु ज्या थम्हं हे यायेमाःगु जुल ।
द मिथ ० या मेमेपिं कलाकार धयापिं सु सु ले धायेबलय् वरिष्ठ कलाकार राजेन्द्रमान शाक्य, थौंकन्हय्या लोकंह्वाःम्ह कलाकार रूपेन्द्र श्रेष्ठ थक्वाः, आराध्यालक्ष्मी खड्गी आदि । सहायक निर्देशन व एक्शन थ्रील यानाच्वंम्ह राजन शाहि कलाकारिता ख्यलय् नांजाःम्ह कलाकार, कोरियोग्राफर । क्यामेरा व दृश्य सम्पादनय् मनोजरत्न शाहि, अवार्ड हे त्याकेधुंकूम्ह । निर्देशक दर्शनबीर शाक्य, न्हापाया शर्ट फिल्म कासाय् मिथ प्याखनं हे न्हाप सिरपाः त्याकेधुंकूम्ह । थुज्वःगु टिमय् जि नं छम्ह दुजः जुयाः, कलाकार जुयाः ज्या यायेगु जिगु नितिं नं छगू व्हःताः हे तायेका । छुं भचा टेक नयाः थःगु सीन पूवंका ।
लिखँ
संकिपाया निर्माण जुइधुंकल । न्हापा क्वचाःगु संकिपा नखःया चिप्याखं धेंधें बल्लाः कासाय् दर्शनबीर शाक्यं निर्देशन यानाः दयेकूगु मिथ संकिपा न्हाप सिरपाः त्याकूगु खः । व ल्याखं आःयागु मिथ ० संकिपाय् नं सकसिया ध्यान केन्द्रीत जुयाच्वंगु दु । गुकथंया संकिपा निर्माण जुल, थुगु संकिपा गथे च्वं धकाः निर्माण पक्ष धायेगु खँ मखुत आः । थुकिया निर्णय ला स्वकुमिं हे याइ ।
