विश्वया न्ह्यागु कुनाय् थ्यंसां नेपालभाषाया मतिना सदां ल्यनाः च्वनिं धैगु दसु न्ह्यब्वये कथं जापान निवासी सुनिल कुमार शाक्यं थः म्ह्याय् क्यारेन शाक्ययात नेवाः भाय् स्येनेगु जक मखुसे नेवाः म्ये हे हायेकाच्वंगु दु । नकतिनि हे जक क्यारेन शाक्यया सलय् चुलबुल चंचल बोलया म्यूजिक भिडियोया प्रिमियर किर्तिपुर सिनेप्लेक्सय् याःगु दु । थुगु म्ये क्यारेन शाक्यया निपुगु म्ये खः । थ्व सिबें न्ह्यः नं क्यारेन शाक्यया सलय् समाःया सँझ्याः बोलया म्ये थनिं निदँ न्ह्यः हे पिदने धुंकुगु दु ।
जनकवि दुर्गालाल श्रेष्ठया च्वसा अले संगीतकार न्ह्यु बज्राचार्यया संगीतय् चुलबुल चखुंचा तयार जूगु खःसा क्यारेन शाक्यं थुगु म्येया निंतिं जापानय् च्वनाः हे म्येया अभ्यास यानाः हाःगु खः । थुगु हे म्येयात ज्योति म्यूजिकया पुचलं म्यूजिक भिडियो निर्माण याःगु खःसा म्यूजिक भिडियो म्हितेगु निंतिं म्ये हालामि क्यारेन शाक्य लिसें वय्कःया निम्ह पासापिं नं नेपालय् वःगु खः ।
थुगु म्येया कोरियोग्राफि रोहिया महर्जनं याःगु खःसा म्येया छायाँकन सोहन मानन्धरं यानातःगु दु । म्येया निर्देशन विश्वास बज्राचार्यं यानातःगु दु । थुगु म्ये म्हा म्हा इन्टरटेन्मेन्टया युट्युब च्यानलय् अपलोड जुयाःच्वंगु दु ।
