कीर्तिपुर सिनेप्लेक्सय् नेपालभाषाया न्हूगु म्यूजिक भिडियाे ‘गँसी’या प्रिमियर जुल । ज्याझ्वःलय् यल महानगर नगरपालिकाया १६ वडाया अध्यक्ष निर्मलरत्न शाक्य मू पाहाँ कथं व विशेष पाहाँ कथं राजेन्द्र खड्गीं ब्वति काःगु खः ।
मूपाहां शाक्यं ‘गंसी’ ईयात ल्वयेक दयेकातःगु म्यूजिक भिडियो जूगु खँ कनादिल । वय्कलं निर्देशक भूपेन्द्र बज्राचार्यया खुल्ला रुपं प्रशंसा यानादिसें वय्कःया प्रस्तुति, सः व सिर्जनायात तसकं च्वछायादिल । लिसें वय्कलं नेवाः कला ख्यलय् विशिष्ट छवि निर्माण यानादीम्ह मदनकृष्ण श्रेष्ठ लिपा भूपेन्द्र बज्राचार्य छम्ह शक्तिशाली सर्जकया रुपय् स्थापित जुइफइगु बिचाः नं प्वंकादिल ।
विशेष पाहां राजेन्द्र खड्गीं ‘गंसी’यात पूर्णकालीन संकिपाया रुपय् विस्तार यायेगु खःसा माःगु ग्वाहालि यायेगु प्रतिबद्धता प्वंकादीगु खः । वय्कलं भिडियोया बाखं व प्रस्तुति प्रभावशाली जूगु टिप्पणी यानादिल ।
‘गंसी’या म्ये अमर चित्रकार व सरिता महर्जन हालातःगु खः । थुगु म्येया बोल व संगीत संयोजन भूपेन्द्र बज्राचार्यं यानातःगु दु । रेकर्डिङ व मिक्सिंग फिर्जोज बज्राचार्यं यानातःगु दु ।
थुगु भिडियाेस अमर चित्रकार, आराध्य लक्ष्मी खड्गी, भूपेन्द्र बज्राचार्य, भेष महर्जन, सुनेश शाक्य, राम चित्रकार, रविन्द्र शाक्य, चिरिबाबु महर्जन, राजेन्द्र श्रेष्ठ, राजेश श्रेष्ठ, नीरज प्रधान, मोहिराम खड्गी पिंसं अभिनय यानातःगु दु सा राजेन्द्र खड्गीयात गेष्ट अपेरियन्स नं दु ।
अमर चित्रकारं छायांकन यानादीगु दुसा क्यामेरा पुचलय् सुनिल भण्डारी, राम चित्रकार व सुबरीना चित्रकार दु ।
सहायक निर्देशक मञ्जिल शाक्य व भेष महर्जन, कोरियोग्राफी आराध्या लक्ष्मी खड्गीं यानादीगु दुसा ड्रोन संचालक व सहायक सम्पादक सुबरीना चित्रकारं यानादीगु दु ।
सम्पादन व कलरया ज्या अमर चित्रकारं यानादीगु दुसा पोष्ट प्रोडक्सनया ज्या एएम क्रिएशन नेपालं यानादीगु दु । म्येया परिकल्पना व निर्देशन भूपेन्द्र बज्राचार्यं यानातःगु दु ।
कीर्तिपुरया कीर्तिपुर सिनेप्लेक्सय् जूगु सांगीतिक चिबाखं ‘गंसी’या रिलिज ज्याझ्वलय् नायः लिसें म्येहालामि सरिता महर्जनं ज्याझ्वः ताःलाकेत सकल पुचःयात ग्वाहालि याःगुलिं सुभाय् देछानादीगु खः ।
