ईलाेहं इन्टरटेन्टमेन्टंया न्ह्यब्वयाय् नेपालभाषाया न्हापांगु ओटीटी प्लेटफर्म ‘नेवाः–फ्लिक्स्’या घोषणा ज्याझ्वः कीर्तिपुर सिनेप्लेक्सय् जुल । ज्याझ्वलय् मूपाहाँ कथं नेपाल चलचित्र विकास बोर्डया नायः दिनेश डि.सी. झायादीगु खः ।
ज्याझ्वलय् ईलाेहं प्रकाशनया प्रबन्ध निर्देशक नरेशवीर शाक्यं लसकुस यानादीगु खः । २६ दँ न्ह्यःनिसें ईलाेहं प्रकाशन निरन्तर रुपं संचालन यानाच्वंगु व थाैं या प्रविधिलिसे न्ह्यां वनेगु कथं ईलाेहं इन्टरटेनमेन्टं संचालनय् वःगु खँ वय्कलं धयादिल ।
कीर्तिपुर सिनेप्लेक्सया संचालक नरेन्द्र महर्जनं नेपालभाषाया संकिपा क्यनेगु ज्याय् छुं समस्या वःसा स्वापू तयेत इनाप यानादीगु दु । नेपालभाषाया संकिपाः विकास यानाः यंकेगु निंतिं सकलें छधि छप्पं जुयाः न्ह्याये माःगु खँ न्ह्यथनादिल ।
पाहाँ कथं वरिष्ठ फोटोग्राफर राजभाई सुवालं कीर्तिपुर छगू ऐतिहासिक थाय् जूगु धासें थःम्हं छायांकन यात्रानं थ्व थासं चरित्र संकिपाः पाखें शुरू यानाःगु खँ लुमंकादिल । वय्कलं सिनेमाया विकास क्रमय् न्हापा न्हापा संकिपा त हल अनुसार जक दइगुलिं येँया हलया संख्याः कथं रील दइगु तर भारतीय संकिपा धाःसा द्वलंद्वःसिबें अप्वः रील दइगु खँयात न्ह्यथनादिल तर ओटीटी प्लेटफर्म ‘नेवाः–फ्लिक्स्’या कारण आः छुं नं नेवाः प्याखँ संसारय् ग्वःगः माेबाइल दु उलि हे संख्याय् दइगु खँ वय्कलं न्ह्यथना दिल । वय्कलं न्हूगु सोच व पहलया निंतिं ग्वसाःखलःयात सुभाय् देछानादील ।
मूपाहां दिनेश डिसीं नेवाः खँ ल्हाये मसःसां न्हापा विद्यार्थी जीवनय् पम्प्लेट छापे यानाः “पद्मरत्न यात त्याका दिसं, प्रतिगमी तत्व यात बुका दिसं” धकाः ४२ साल पाखे अान्दाेलनया इयात लुमंकाः दिल । ईलाेहं प्रकाशनया सीओओ दर्शनवीर शाक्यया प्रशंसा यासें सम्पदा व संस्कृतिया नितिं ज्या यायेगु धयागु तःधंगु खँ खः धयादिल । ‘म्वायेगु जक तःधंगु खँ मखु’ धासें वय्कलं नेवाः प्याखं ‘सिलु’ व ‘राजमति’ थेंज्याःगु कृतियात डिजिटलाइज यायेमाःगु खँय् बः बियादिल । लिसें वय्कलं नेपालभाषाया सामग्री प्रवद्र्धनया नितिं ‘नेवा–फ्लिक्स’ छगू उपयुक्त दबू जुइगु विश्वास प्वंकादिल ।
नेपालभाषाया नितिं न्हापांगु ओटीटी प्लेटफर्म ‘नेवा–फ्लिक्स’या घोषणा ज्याझ्वलय् ईलाेहं इन्टरटेन्मेन्टया सिओओ दर्शनवीर शाक्यं थुगु पहलयात नेपालभाषा ख्यलय् छगू न्हूगु आयाम कथं कनादिल । थः मचांनिसें नेपालभाषा ख्यलय् ब्वलंम्ह व थुगु ख्यलय् निरन्तर योगदान बियाच्वनागु खँ लुमंकादिल । निदँया मेहनत लिपा ‘नेवा–फ्लिक्स’ सफलतापूर्वक न्ह्याःगु धासें वय्कलं नेपालभाषाया फुक्क संकिपा व म्यूजिक भिडियो इन्टरनेट मार्फत स्वयेफइगु जानकारी बियादीगु खः । वयेकलं स्वकुमिपिनिगु ग्वाहालि व सुझावया निंतिं इनाप यानादील । सिनेमा हलय् थ्यंके मफयाच्वंगु स्वकुमिपिनिगु निंतिं थ्व दबू छगू उपयुक्त माध्यम जुइगु विश्वास प्वंकादिसें वय्कलं डिजिटल प्रविधिं पहुँच विस्तार जुइगु बिचाः प्वंकादिल । २०२२ या जःखः नेपालभाषाय् प्रतिबन्ध दुगु लुमंकादिसें वय्कलं आः ई हिलेधुंकूगु लिं झी नं आः व्यवसायिक माेडं जुयाः वनेमाःगु खँ तयादिल ।
ज्याझ्वः ईलाेहं इन्टरटेन्टमेन्टंया हामा प्रज्ञादेवी शाक्यया सभापतित्वय् जूगु खःसा वय्कलं पाहांपिन्त मतिनाया चिं लःल्हानादीगु खः । नेपालभाषाया संकिपा, संस्कृति व सम्पदायात डिजिटल माध्यमपाखें हलिंया स्वकुमिपिनिगु न्ह्यःने थ्यंकेगु लक्ष्य ज्वनाः वय्कलं ‘नेवा–फ्लिक्स’या औपचारिक घोषणा यानादीगु खः ।
ज्याझ्वः कल्पना बज्राचार्यं न्ह्याकादीगु खः ।
