नेपालभाषाया ख्यलय् छगू न्हूगु पलाः कथं ईलोहं इन्टरटेन्मेन्टया न्ह्यब्वयाय् नेवाः फ्लिक्स् या घोषणा थौं किर्तिपुर सिनेप्लेक्सय् जुइत्यंगु दु । थुगु घोषणा लिपा नेपालभाषाया थी थी संकिपाः ओटीटी प्लाय्टफर्मय् ध्येबा पुलाः स्वये दइगु जुइ । थुकि नेपालभाषाया संकिपा, शर्ट फिल्म, डक्युमेन्टरी, वेभ सिरिज व म्यूजिक भिडियो स्वये दइ । लिसें नेपालभासां डब यानातःगु व नेवाः प्याखँ मेमेगु भासं डब यानातःगु नं स्वये दइ ।
नेवाः फ्लिक्स् या मू उद्देश्य हे नेवाः संकिपाः ख्यःया प्रचार व प्रवर्द्धन खः । थुगु प्लाय्टफर्मया प्रारम्भीक उद्देश्य कथं थी थी नेवाः प्याखँ छथाय् मुनाः स्वकुमिपिंत सुविधा बिइगु निं खः । उकथं हे नेवाः प्याखँ पाखें जुइगु आम्दानीं नेवाः निर्मातापिंत मेगु प्याखँ दयेकेत हौसला बिइगु खः।
ईलोहं इन्टरटेन्मेन्टया हामा मय्जु प्रज्ञा देवी शाक्य खःसा दर्शन वीर शाक्य थुकीया सिओओ जुयाःदी ।
