नेपाया प्याखँया इतिहास, कला व प्रविधियात भावी पुस्ताया नितिं संरक्षण यायेगु आज्जुं चलचित्र विकास बोर्डं नेपाली चलचित्र संग्रहालयया औपचारिक उलेज्या याःगु दु । बोर्डया सभागृहय् संचार तथा सूचना प्रविधि मन्त्रालयया कजि श्री लक्ष्मीकुमारी बस्नेतया मूपाहाँ कथं झायाः संग्रहालयया उलेज्या यानादीगु खः । ज्याझ्वलय् संकिपाकःमि व थीथी संघसंस्थां विगतया ऐतिहासिक क्यामरा, क्यासेट, टेप, पोस्टर, कलाकृति, लिपि व संग्रहणीय दस्तावेज लःल्हाःगु खः । उगु ज्याझ्वलय् सामग्री उपलब्ध याकूपिं व्यक्ति व संघसंस्थापिन्त हंगु खः ।
संग्रहालययात सिने फोकस प्रा. लिमिटेडं रेड क्यामेरा लःल्हाःगु खः । क्लासिक सिने युनिभर्स प्रा.लि. लिमिटेडं सोनी एक्स३ क्यामरा लःल्हाःगु खः । वरिष्ठ चलचित्र सम्पादक मानबहादुर थापां सन् १९८० या प्यानासोनिक एफ १० क्यामरा, सोनी कलर मनिटर (२००१), नेशनल प्यानासोनिक ५४३ क्यासेट टेप, साउण्ड/भिडियो उपकरण व अडियो मिक्सर लः ल्हाःगु खः ।
म्युजिक नेपाल प्रा. लिमिटेडया प्रबन्ध निर्देशक उत्तम थापां १५२ गू संकिपाया पोस्टर व कलाकृति उपलब्ध याःगु खः ।
रुपेन्द्र खड्गी, ओ.एस.आर. लिमिटेडं संकिपा कलाकृति उपलब्ध याःगु खः । कान्तिपुर रेडियों ३४४ संकिपाया क्यासेट व अडियो सिडि लःल्हाःगु खः ।
पेजथ्री बाःछिपाैया सम्पादक दर्शनवीर शाक्यं नेपालभाषाया ८० गू संकिपा पोस्टर उपलब्ध यानाब्युगु खः । हाइलाइट्स नेपाल प्रा.लि.या प्रबन्ध निर्देशक जनक तामाङं २०२ गू नेपाली संकिपाया कलाकृति उपलब्ध यानाब्यूगु खः । सुन्दरलाल श्रेष्ठ, आइडियल डिजाइनर्सं १४६ गू नेपाली संकिपाया पोस्टर उपलब्ध यानाब्यूगु खः । वरिष्ठ क्यामरा पसर्न गौरी शंकर धुँजु व वरिष्ठ संकिपाकःमि मण्डिल श्रेष्ठं क्पामरा व ट्राइपोड उपलब्ध यानाब्युगु खः । न्हापांगु संकिपा सिरपाःया संग्रहणीय दस्तावेज साहित्यकार व संकिपाकःमि नरेन्द्रबहादुर श्रेष्ठं उपलब्ध यानाबिल । वरिष्ठ सिनेमाटोग्राफर पुरुषोत्तम प्रधानं वय्कःलिसे स्वापू दुगु ६३ गू संकिपाया पटकथा उपलब्ध यानाब्यूगु दु । संकिपाह्यःमि खुमराज पौडेलं ७०४ गू संकिपाया पोस्टर लःल्हाःगु दु । नेपालभाषाया न्हापांगु संकिपाः सिलुया डिजिटाइज यायेगु निंतिं रिल क्यान नं नेपालभाषा संकिपाया न्हापांम्ह नायक जय श्रेष्ठं लःल्हानादीगु खः ।
ज्याझ्वलय् चलचित्र विकास बोर्डया नायः दिनेश डिसीं स्वदेशी चलचित्र संग्रहालय पलिस्था यायेगु थःगु दीर्घकालीन म्हगस जूगु खँ न्ह्यथनादिसें थुकियात नेपाःया संकिपाया आत्मा ल्यंकातयेगु अभियानया रुपय् स्पष्ट यानादिल । “नेपाःया संकिपाया इतिहासयात लुमन्तिइ जक सीमित मजुइमा, पुस्तां पुस्तां न्ह्याके फयेमा धकाः संस्थागत रुपं संरक्षण यायेमाः धैगु विचाः ज्वनाः थ्व पहल यानागु खः ।” धकाः वय्कलं धयादिल । विगतया संघर्ष, प्राविधिक विकास व रचनात्मक यात्रायात छगू हे थासय् दस्तावेजीकरण यायेगु थौंया आवश्यकता जूगु विचाः प्वंकादिल । वय्कलं वइगु दिनय् डिजिटल आर्काइभिङलिसे स्वानाः संग्रहालययात अनुसन्धानकर्ता, विद्यार्थी व चलचित्रप्रेमीया अध्ययन केन्द्रया रुपय् विकास यायेगु आज्जु दूगु जानकारी बियादिल । वय्कलं बचं बियादिसें धयादी, “थ्व सुरुवात जक खः, थुकियात राष्ट्रिय गौरवया परियोजना कथं विस्तार यायेगु जुइ ।”
बोर्ड दुजः गणेश सुवेदीं लसकुस याना दिगु ज्याझ्वलय् सेन्सर बोर्डया नायः उदयबहादुर राणा मगर व बोर्ड दुजःपिं राजु प्याकुरेल व वीरेन्द भट्टया नं उपस्थिति दूगु खः ।
