द्वारिकालाल जोशीया सन्ततिपिं लसता जोशी व शरद लाल जोशी पाखें द्वारिकालाल जोशीया हे छगू लोकं ह्वाःगु म्ये, योवनया गाच्वःया आधिकारीक रेकर्डिंग पश्चात भिडियो पिदंगु दु । थुगु भिडियोस द्वारिकालाल जोशीया छय् लुमिला जोशीं अभिनय यानाच्वंगु दुसा द्वारिकालाल जोशीया मेम्ह म्ह्याय् भिंतुना जोशीं कोरियोग्राफ यानातःगु दु । थुगु म्येय् द्वारिकालाल जोशीया जहान नगिना जोशीं नं अभिनय यानतःगु दु ।
म्येया प्रिमियर सिडिसि मलय् जूगु खःसा म्येया बिषयलय् लसता जोशीं थः बाः द्वारिकालाल जोशीया पुन्य तिथिया अवसरय् हरेम वर्ष छुं नं छुं वय्कःया हे कृति न्ह्यब्वयेगु कुतः यानाच्वनागु खँ कुला दिल । थुकिया हे नितिं थः बाःया पुलांगु म्येत संकलन लिसें प्रवद्र्धन यानाच्वनागु नं खँ कुलादिल । भिडियोया बिषयय् वरिष्ठ समालोचक प्रकाश साय्मिं खँ कुलादिलसा थुगु म्ये नगिना जोशीया निंतिं हे दयेकुगु म्ये खः धकाः नं चर्चा यानादिल । बक्ता पिं जुजुकाजी रंजित व मू पाहाँ मल्ल के सुन्दरं द्वारिकालाल जोशीया स्मृतिइ खँ तयादीगु खः ।
थुगु म्येय् लुमिला जोशी लिसें निर्वाण महर्जनया भुमिका दु । भिडियोया निर्देशन विश्वास बज्राचार्यं यानातःगु दुसा भिडियो छायाँकन व सम्पादन सोहन मानन्धरं यानातःगु दु । थ्व लिसें हे जोशी परिवारया कुतः पाखें भिडियोया परिकल्पना लसता जोशीं यानातःगु दु । भिडियोया कला निर्देशन नगिना जोशीं यानातःगु दु अले भिडियोया स्टाइलिस्ट कथं लुमला जोशीं यानातःगु दु ।
