म्ये च्वमि सत्यनारायण कर्माचार्यया च्वसाय् नेपालभाषाया न्हूगु म्ये यलय् मंगलय् अंगलय् गं बोलया म्ये प्रिमियर रंजना सिनेप्लेक्सय् जूगु दु । थुगु म्येय् किशोर कुमार शाही व देव कुमारी खड्गीया सलय् हालातःगु खःसा म्ये किशोर कुमार शाहीं हे लसय् हनातःगु दु अले संगीत संयोजन सुमन कपालिं यानातःगु दु ।
ज्याझ्वलय् वरिष्ठ लोक कलाकार रत्न बेहोसी मू पाहाँ कथं झायादीगु खः सा म्ये च्वमि सत्यनारायण कर्माचार्यया सभापतित्वय् जूगु खः । पाहाँ कथं ज्याझ्वलय् वरिष्ठ निर्देशक पवन जोशी, निर्देशक सुरेन्द्र तुलाधर, भिडियो कमल केशरी कर्माचार्य, म्ये हालमि किशोर कुमार शाही व देवकुमारी खड्गी, वरिष्ठ संगीतकार अमर राज शर्मा, ख्यालि जुजु मदन कृष्ण श्रेष्ठया उपस्थीति दुगु खः ।
म्यूजिक भिडियोया हे कलाकार एवं साहित्यकार शशिकला मानन्धरं लसकुस यानादीगु खःसा म्येहालामि किशोर कुमार शाहिं थुगु म्येया बिषयलय् नुगः खँ तयाःदीगु खः। म्यूजिक भिडियोया बिषयलय् पवन जोशी, रामकृष्ण खड्गी, संगीतकार गोविन्द ह्युमत समिक्षा यानादील ।
म्यूजिक भिडियोस आर्शु महर्जन व आराध्या लक्ष्मी खड्गीया जोडी दु सा थुगु भिडियोया निर्देशन नं किशोर कुमार शाहीं हे यानादीगु खः । म्येया छायाँकन व सम्पादन सोहन मानन्धरं यानातःगु दु अले नित्य निर्देशन रविता बाकें यानातःगु दु ।
