मगन इन्टरटेन्मेन्टया व वाइ जिजि युट्युब च्यानलया न्ह्यब्वया छन्त लुमंला म्येया प्रिमियर शो किर्तिपुर सिनेप्लेक्सय् जुल । वरिष्ठ म्ये च्वमि श्याम तमोटया च्वसां पिदनाच्वंगु थुगु म्ये लोकंह्वाःम्ह संगीतकार एवं संगीत संयोजक सुरेन्द्र श्रेष्ठया सलय् हालातःगु म्ये खः । म्येया संगीत व संगीत संयोजन नं सुरेन्द्र श्रेष्ठं हे यानातःगु दु ।
छन्त लुमंला छगू लुमन्ति म्ये खः । च्वमि श्याम तमोतया कथं न्हापा मचा इलय् छुं कथंया बन्धन मदु व गननं छुं कथंया भेदभाव मदुगु ईयात लुमंकाः थुगु म्ये च्वयातैगु धकाः वय्कलं न्ववानादील ।
संगीतकार एवं म्ये हालादिइम्ह सुरेन्द्र श्रेष्ठं थुगु म्ये १० १२ बर्ष न्ह्यः हे रेकर्ड जुइधुंकुगु खँ धयादीसें थुगु हे म्येया मिसा सलय् दिपा महर्जनं नं हालातःगु जानकारी बियादील ।
वरिष्ठ म्ये हालामि जुुजु काजी रंजितं, वरिष्ठ कलाकार आशाकाजी थकु व कलाकार मनोज महर्जनं थुगु म्येया बिषयलय् नुगः खँ तयादीगु खः । ज्याझ्वःया मू पाहाँ वरिष्ठ कलाकार एवं जन गायक रामेश श्रेष्ठं थौंकन्हे मतिनाया म्ये, यःत्यःया म्ये, अय्ला थ्वँया म्ये सिबें थज्योगु बिशिषतां जाःगु म्येया भिडियो पिदंगुलिं सुभाय् देछानादिल ।
थुगु म्येय् देवन्द्र महर्जन, अमिता महर्जन, लक्ष्मीकुमार महर्जन, राजी किपू, सुरेन्द्र तापाख्यःमि, विक्रम महर्जन व रमेश मालीया अभिनय दुथ्यानाच्वंगु दु । म्येया निर्देशन, छायाँकन व सम्पादन रजीन महर्जनं यानातःगु दु ।
