सामजिक संजाल युट्युबय् न्हू न्हूगु नियम न्हिंया न्हिथं वयेवं आः युट्युब पाखे कन्टेन्ट क्रियटरतय्गु ध्यान बुलुहुँ म्हो जुयाः वनाच्वंगु दु । युट्युबं हःगु न्हूगु नीति कथं रियुज्ड कन्टेन्ट अले कपिराइटस्या नियमं युट्युबय् यक्व हे पंगः ब्वलना वयाच्वंगु दु । न्हूगु नीति कथं आः कपिराइटस्या नियम कथं भिजुअल सामाग्री दयेकिपिंसं थःम्हं दयेकूगु वा छ्यलेत उजं बियातःगु भिडियो जक अपलोड यायेमाः । अथे धइगु सुनानं आः थःम्हं मदयेकूगु भिडियो अपलोड यायेमज्यू वा थःगु भिडियोलय् मेम्हसिया प्रतिलिपि अधिकार दुगु सामग्री गथेकि म्यूजिक ट्रयाक, प्रतिलिपि अधिकार दुगु ज्याझ्वःया स्निपेट वा मेपिं प्रयोगकर्तातय्सं दयेकूगु भिडियोयात माःगु अनुमति मकासे छ्यलेमज्यू । नेपालभाषाया आपलं हे सामाग्री युट्युबय् उपलब्ध दु । थुगु हे खँ यानां नेवाः सामाग्रीइ यक्व हे असर लानानं च्वंगु दु ।
यक्वसित थ्व खँ जायज थें हे ताइ । मेपिंसं याःगु भिडियो थःपिंसं छाय् अपलोड यायेमाःगु ? तर युट्युबय् स्वल धाःसा नेपालभाषाया आपलं हे भिडियोत मेपिनिगु निर्माण जुसां सम्बन्धित मखुपिं मनूतय्सं अपलोड यानातःगु दु । गुकिं छम्ह श्रष्टाया मेहनत व आर्थिक उपार्जनय् असर यानाच्वंगु दु । थुकी युट्युबय् वनां कपिराइट क्लेम याये ज्यु अले याये नं माः ।
तर थ्व बाहेक मेगु अलमलया खँ नं दनिं । युट्युबय् नेवाः प्याखँ व नेवाः म्येत अपलोड जुयाःच्वंगु दु गुकी प्याखँयात माःगु ध्वनी, ब्याक्ग्राउण्ड साउण्ड तकं कपिराइटय् लानाच्वनी । अझ युट्युबं हे उजं बियातःगु सः नं उकिया म्याद फुइवं हे हाकनं कपिराइटया जंजालय् लाइगु जुयाच्वंगु दु । थुकिं यानां च्यानल हे ब्लक जुइगु व उकिं जुइगु आम्दानी नं असर जुइगु याः । थज्योगु तनाव जक मखुसे नं युट्युब पाखें जुइगु आम्दानी नं तसकं हे म्हो जक जुइगु याः । नेपालभाषाया प्याखँ स्वयेगु खँय् अथें स्वकुमि म्हो जुइगु इलय् आम्दानी झन हे असर याः । थज्योगु अवस्थाय् आः नेपालभाषाया सकल संकिपा निर्मातापिं छथाय् वयाः झीगु हे छगू बिस्कं ओटीटी प्लाय्टफर्म दयेकेमाःगु अवस्था दु । थुकीं यानाः छगू स्वकुमिपिंत दक्वं हे नेपालभाषाया संकिपाः छथाय् हे स्वये दइगु अवस्था जुइ सा आर्थिक रूपं नं झीसं युट्युब सिबें आःपाः हे आर्जन याये फइगु अवस्था जुइ । तर थुकी दकलय् महत्व पूर्ण खँ धैगु झीगु एकता हे जुइ ।
युट्युबय् कपिराइटया कारण आपलं हे प्याखँ बिच बिचय् संवाद वा ब्याकग्राउण्ड साउण्ड हे बन्द जुइगु याः । सुख मदयेक प्याखँ स्वयेगु सिबें थुकीयात गुगुकथं व्यवस्थीत यायेगु पाखे पलाः न्ह्याके माः । युट्युबय् प्याखँ स्वयाः १००,००० भ्यूज वनकि बल्ल तल्ल १०,००० निसें २०,००० तक ध्येबा वइगु खःसा ओटीटी च्यानल पाखें ग्राहक यानाः हे ध्येबा नं काये फइसा छगू प्याखँ जक स्वयेगु याःसां प्याखँ कथं ध्येबा नं काये फइ। थौंकन्हे थी थी ओटीटी प्लाय्टफर्मय् नेपाली प्याखँ स्वयेत नं २०० दां मू तयाःतःगु दुसा नेवाः प्याखँ स्वयेत नं थथे हे रकम तर छुं भचा म्हो यानाः तये फइ ।
नेवाः प्याखँयात व्यवस्थीत यायेगु निंतिं थ्व दकलय् महत्वपूर्ण पलाः खः छाय्धाःसां थुकीं यानाः हे नेवाः प्याखँया प्रड्युसर म्वाये फइ । प्रड्युसर म्वाल कि तिनिं हे वं मेमेगु प्याखँ दयेकाः यंकी अले कलकार त नं व्यवसायिक जुइ फइ । झीगु सोच तब्या यानाः यंके फुसा हे जक झीसं नेपालभाषा ख्यलय् छुं यानाः यंके फइ । मखुसा प्याखँ दयेकाः युट्युबय् तयाः झीत सिबें मेमेपिंत हे जक लवः दइ ।
