नेपालभाषाया मनोरंजन ख्यः अतःमतः कनाच्वंगु दु । म्हिगःया ई तक्क नेपालभाषा मनोरंजन ख्यः आन्दोलनया छगू माध्यमया रूपय् न्ह्यानाच्वंगु खः । दबू प्याखँया माध्यमं नाटक क्यनाः भाषिक अधिकारया नितिं आन्दोलन यायेगु, त्वाःत्वालय् जागरणया म्ये हालाः मनूतय्त जागृत यायेगु, पत्रपत्रिका पिथना नेवाः आन्दोलनयात तिबः बियाच्वंगु खः । तर थौंया ई पाये धुंकूगु दु । राजनैतिक ह्यूपाः लिसें देय्या हे शासन प्रणाली हिले धुंकूगु दु । संविधानं यक्व हे अधिकार न्हापा स्वयां अप्वः बिइ धुंकल । उकिं नेपालभाषाया मनोरंजन ख्यः नं आः व्यवसायिक जुइमाःगु मूल्य व मान्यता बिकास जुइ धुंकूगु दु ।
नेपालभाषाया मनोरंजन ख्यः व्यवसायिक रूपं न्ह्याकेमाःगु न्हूगु पुस्ताया चिन्तन दु । न्हूपुस्तां नं नेपालभाषाय् ब्यवसायिक रूपं ज्या न्ह्याकेगु पाखे वनाच्वंगु दु तर नं पुलांगु पुस्ताया बिचाःकथं नेपालभाषायात अझं नं भाषिक अधिकारया हे छगू ब्वः नालाच्वंगु दु । म्हिगःया शैली वा म्हिगःया सोच अनुरूप थौं नेपालभाषाया मनोरंजन ख्यः न्ह्यां वनेफइगु अवस्था मदये धुंकल छाय्धाःसां थौं म्यूजिक भिडियोया छगू शो यायेगु निंतिं नं सिनेप्लेक्स हे बुकिंग यायेमाः । नेपालभाषाया म्यूजिक भिडियो सिनेप्लेक्सय् क्यनाः छुं फाइदा मदुगु खँ नं यक्वःस्यां थु तर थुगु ज्याखँय् दिपाः वयाच्वंगु मदु । छगू लाखया म्यूजिक भिडियो दयेकाः बागु लाख धेबा ला सिनेप्लेक्सय् हे खर्च जुइ तर नं थुकीया लिच्वः सामाजिक संजालय् अपलोड यायेगु भिडियोयात छुं जुयाच्वंगु मदु । नेवाः प्याखं वा म्यूजिक भिडियो प्रिमियर यायेमाः धैगु बिचाः म्हिगःया आन्दोलनया हे छगू ब्वःकथं थुइकेमाः । नेपालभाषाया म्ये प्रचार यायेत दबू हे ग्वयेमाः धैगु सोच म्हिगःया हे आन्दोलनया लिच्वः खः । तर थौंया ई धाःसा थथे भौतिक दबू दयेकाः म्यूजिक भिडियो ब्वयेगु सिबें डिजिटल प्लाय्टफर्मय् वनां बुस्ट यायेगु हे दकलय् तःजिगु उपाय् खः ।
दबुलिइ खर्च जुइगु धेबा डिजिटल बुस्ट यायेगु खःसा थुकिया लिच्वः नं सिइदयेक वइ अले सिनेप्लेक्सय् वनेगु सिबें गनं डिजिटल प्लाय्टफर्म कथं पडकास्ट वा मिडिया इन्टरभ्यू वंसा उकिया लिच्वः सार्थक जुया पिदनी । हिलावंगु ई कथं झी न्ह्याना मवन धाःसा युट्युबया जमानाय् झीसं बसन्तपुरय् च्वना सिडि मिइगु ज्या थें जुइ । झी न्ह्याबलें छपलाः ल्यू लानाच्वंगु कारण हे बजारयात थुइके मफया खःसा न्ह्यलुवाःपिंसं नं थुकी छुं लँपुक्यने मफयाच्वंगु खँ आः वाः चायेकेमाः ।
थुगु दँ निसें झीसं झीगु म्यूजिक भिडियो गुगु कथं लक्षित पुचलय् थ्यंकेगु खँय् केन्द्रीत जुइमाःगु दु । वंगु दँय् जकं नं नेपालभाषाया १३१ पू म्यूजिक भिडियो पिदंगु दु । पेजथ्री पत्रिकां फयांफत्तले थुगु म्यूजिक भिडियोया ल्याः मुंकाः छगू डाटाबेस दयेकाः पिथनेगु कुतः यानाच्वनागु दु। यदि छपू म्येया औसतय् छगू लाख जक खर्च तःसां १३१ पू म्येया निंतिं एक करोड ३१ लाखया बजेट खने दये धुंकल अझ थुकी मध्ये गुलि म्ये ला भव्य प्रिमियर नं जूगु दु । थुकियात हे वाः चायेका आः नेपालभाषाया मनोरंजन ख्यःयात नं औद्योगिकरण पाखे न्ह्याके माःगु खने दु । न्हूगु मौकाय् नेवाःत नंअभ्यस्त जुइमाःगु दु ।
