ट्याटुयाबारे चर्चा यायेबले थ्वयात पश्चिमि संस्कृति कथं काइपिं यक्वः दु । वास्तवय् थ्व सत्य मखु । नेवाःतय्सं नं यक्वःहे न्हापां निसें ट्याटुयात नाला वया च्वंगु दु । ट्याटुयात नेवाः तजिलजि कथं व्याख्या याइबले “ला च्वयेगु” धाइ । नेवाः फिल्मख्यःया तसकं लोकंह्वाम्ह हिरोइन आशिष्मा नकःमियाके थुकियाबारे न्ह्यसः छुनाबले वय्कः मय्जुं नं ट्याटुयात नेवाःतसें न्हापांनिसें ला च्वयेगु धका नाला वयाच्वंगु खँया चर्चा यानादिलसा मेम्ह छम्ह नेवाःस्टार रोजिना सुवालं ख्वप भासं थुकियात “लाङ च्वइगु” धाइ धका धयादिल । मेम्ह छम्ह हिरोइन रजनी खडगीं नं थ्वहे खँयात लिसा कया दिल ।
झी अजाअजिपिन्सं थःगु ल्हाः वा तुतिइ थथे ला च्वयातःगु झीसं खँके फइ । गुम्हेसिन द्यःया नां कियातःगु दइसा गुम्हेसिनं सुद्र्य,तिमिला वा मेमेपिं द्यःनं कियातःगु झीसं खनावया च्वनागु दु । थथे झीसं यक्वः न्हापांनिसें खनावया च्वनागु ला च्वयेगु परम्परा हे वास्तवय् थौंया युगया लोकंह्वानाच्वंगु फेशन कथंया ट्याटु खः । संसारय् न्यंकंभनंया सेलिब्रिटीतयेसं थःगु म्हया थीथी ब्वय् थुकथं ट्याटु कियातःगु झीसं खंके फइसा नेपालय् आपालं सेलिब्रिटीतयेसं थथे ट्याटु किया तःगु नं खना वया च्वनागु दु । थन विशेष याना थःगु म्हय् ट्याटु कियातःपिं छुं छुं नेवाः फिल्मकःमिपिंके ट्याटुयात कया छुनागु न्ह्यःसःया लिसःया आधारय् ट्याटुयात कया चर्चा यायेगु कुतः याये ।
आशिष्मा नकःमि
“ला च्वयेगु”धइगु झीगु नेवाः परम्परा खः । थौंकन्हे वया थुकियात ट्याटु धका धायेगु यानाहःगु दु । जिं न्यनातया कथं झी म्वातले झी नाप दइगु झीगु शरीर हे खःसा झी मदयेधुंका झीगु शरीर नं दइ मखु । थथे झीगु शरीर मदया वंसां झीसं झीगु म्हय् च्वया तयागु ट्याटु दया च्वनि धइगु झीगु मान्यता दु । झी मदय् धुंका झीसं स्वर्गलोकय् वनेबले थःगु म्हय् च्वयातःगु “ला किपा” यानिकी ट्याटु मिया नये दइ धका जिं न्यना तयागु दु । आः वया थ्व फेशन अप्वःया वःगु खः, अले लाथेपाथे ट्याटु च्वकीपिं नं अप्वया वःगु दु तर जिं स्वयेबले थथे च्वकिगु ट्याटुया छगु अर्थ दइकथं जुइमा ।
जिं सन् २०१० पाखे दकले न्हापां थःगु म्हय् ला च्वकाःगु खःसा दकले न्हापां जिं ओम मणि पेमे हुँ दुगु पलेस्वांया ला च्वकाःगु खः । थ्व छगु पवित्र बौद्ध मन्त्र खः । लिपा सन् २०१८ पाखे जिगु म्हया जवःपाखे “भवतु सब्ब मंगल”धका ला च्वकाःगु खः । थ्व नं छगु पवित्र बुद्ध वचन हे खः । जित मचाबलेनिसें बुद्ध धर्म प्रति आस्था दुगुलिं जिं थथे बौद्ध मन्त्रया ला च्वकाःगु खः । मेपिनिगु ट्याटुया चर्चा यायेगु खःसा बुद्ध कालिन बाखनय् दयेका च्वंगु “कर्म” फिल्मया शुटिंगया इलय् थ्व फिल्मया हिरो कर्मा शाक्यया म्हय् खनागु बज्रया ट्याटु नं जित यः ताल । छाय्धाःसां बज्रया नं बौद्ध धर्मलिसे हे स्वापु दु ।
भिन्तुना जोशी
ट्याटु धइगु सुयांगु म्हय् च्वइगु छगु कथंया किपा खः । थौंकन्हे थ्व फेशनया रूप नं जुया वया च्वंगु दु । जिं जिगु जन्हुफाःया च्वय् गःपःया लिउने गणेद्यःया किपा च्वकातयाःगु दु । मेपिनि च्वयातःगु किपाय् जित जिम्ह छम्ह पासाया जन्हुफातय् कियातःगु काल भैरवया ट्याटु साप हे यः ताल । जिम्ह व पासाया नां निमेष खः ।
आराध्यलक्ष्मी खडगी
ट्याटु थौंकन्हे विदेशं वःगु फेशन धका धाःसां वास्तवय् नेवाः समाजय् न्हापांनिसे दुगु लाय् च्वइगु परम्परा खः । जिगु जवः ल्हातिइ व खवः तुतिइ ट्याटु च्वकाःतयागु दु । जित नं थथे चित्र च्वकेयःगुलिं ट्याटु च्वकाःगु खःसा जित नेपाःया लोकंह्वाम्ह हिरोइन प्रियंका कार्कीं थःगु म्हय् च्वकातःगु छम्ह प्याखँ हुलाच्वंम्ह मिसाया ट्याटु तसकं हे यः ताल । छाय्धाःसा जि छम्ह हुलाप्याखंमि खःसा प्रियंका नं बांलाम्ह हे डान्सर खः । नृत्यपाखे नुगः क्वसापिन्सं थथे प्याखं हुला च्वंम्ह मिसाया किपा च्वकुगु धइगु च्वछाय् बहगु खँ खः ।
लसता जोशी
जिगु शरीर धइगु जिगु म्हसीका खः । वहे ख्वालँ जिगु म्हसीका न्ह्यब्वइ । उकीं जिं च्वकागु ट्याटु नं जिगु म्हसीकाया चिं जुइमा धका मति तया च्वकागु खः । यदी छम्ह मनू थः प्रति इमान्दार जूसा वं च्वकीगु ट्याटु उकीया लिच्वः जुया पिदनि । उकीं वयागु बाखं कना च्वनि । उकीं जिं जिगु जन्हूफातय् संगीतया सुरयात न्ह्यब्वयातयागु दु । अले खवःगु ल्हातिइ अंग्रेजी आखलं bold n beautiful धकाः च्वकातयागु दु । थःगु ज्या व शोखयात न्ह्यब्वयातःगु ट्याटु जक जित यः ।
इकृना बल्ल
ट्याटु धइगु मनूतयेगु शरीरय् च्वइगु छगु कथंया किपा खः । थ्व थाइरूपं नं च्वकेजिउ अले अस्थायी रूपं नं च्वकेजिउ । थथे च्वकिगु ट्याटु तसकं हे बांला जुइ तर जिं धाःसा आःतक थथे ट्याटु च्वकाःगु मदुनि । च्वकेगु मन नं मदु ।
शोभा महर्जन
ट्याटु धइगु म्हय्कीगु किपा खः । थुकिया स्वापु लुमन्तिलिसे दया च्वनि । छुं नं खं सदांया निंतिं लुमंकातयेया निंतिं हे थज्यागु ट्याटु च्वकी । हाकनं सीबले झीसं मेगु छुं यंकेदइमखु थ्वहे ट्याटुजक यंंकेदइधका पुलांपिं मनूतसें धयातःगु दु । तर जिं धाःसा आःतक थथे ट्याटु मच्वकानि । च्वके धका मति तयागुला मदु । अयसां च्वहे च्वकल धाःसा छुं कथंया लुमन्तिया चिं जुइ कथं हे च्वके । अले मेपिनिगु ट्याटुयाबारे उलि दुग्यंक्क बिचाः यानागु मदुनि ।
रजनी खडगी
न्हापा न्हापा अजाअजिपिन्सं कनातःकथं झी मनूत सीबले ज्वना वनेगु छुं मदु दक्व त्वता वनेमा । झीसं पुनातयागु वसःतकं त्वता वनेमा तर थःगु म्हय् कियातःगु किपा यानिकी ट्याटु धाःसा मनू नापंतुं वनि हं ! जिं जिगु ल्हातिइ अंग्रेजी आखलं चबवलष् धका च्वका तयाःगु दु । जिं थ्व छगु फेशनया रूपय् नं च्वकाःगु खःसा झीगु परम्परायात माने याना झी सी धुंका थ्व मियानये दइधका न्यनातयाःगुलिं च्वकाःगु खः । मेमेपिनिगु ट्याटु मध्ये जित आशिष्माया मण्डलाया ट्याटु साप हे यः ।
रोजिना सुवाल
ट्याटु धइगु छु खः धका ला जित धाय् मवः तर थ्व न्हापांनिसें हे नेवाः समुदाय दुने चले जुया वया च्वंगु परम्परा खः । ख्वपः भासं थुकियात लाङ च्वइगु धका धाइगु जिं न्यना तयागु दु । तर जिं धाःसा आःतक थथे लाङ च्वकाःगु मदुनि अले च्वकेगु मति नं मदु । बरु जित दुनि दकले न्हापांम्ह मिस नेपालया म्हय् च्वका तःगु छगु ट्याटु धाःसा तसकं यः ताल ।
निकी महर्जन
जिं जिगु ल्हातिइ जिमि किजाया नांया ट्याटु च्वका तयागु दु । छाय्धाःसां जित जिम्ह किजा तसकं हे यः । उकीं वयागु नांया ट्याटु च्वकातयाःगु खः । थथे वयागु नांया च्वका तयागुलिं जित जि न्ह्याथाय्वंसां जिम्ह किजा जि नापं हे दुगुथें महसुस जुया च्वनि ।
