शर्ट फिल्म धइगु छु खः धइगुबारे इलय् ब्यलय् चर्चा जुया च्वं । फिचर फिल्म धका धयातःगु फिल्मसिबें चिहाकःगु फिल्म जुल की शर्ट फिल्म जुइगु की शर्ट फिल्म जुइत मेगु हे विशेष तत्व मा धइगु न्ह्यःसः नं न्हूगु मखु । विश्व विख्यात फिल्मविज्ञ रशेल सिम्पसनया धापु कथं पीगु मिनेटसिबें ताहाकःगु फिल्मयात फिचर फिल्म धका धाइगु खनेदुसाः व सिबें चिहाकःगु दक्वं फिल्म शर्ट फिल्मया दर्जाय् लाइगु खनेदु । एकेडेमी अफ मोशन पिक्चर्स आर्ट्स एण्ड साइन्सेज(ओस्कार एकेडेमी) या धापु नं थ्वहे ज्वला । थ्व ल्याखँ स्वयेबले नेपालभाषाया न्हापांगु शर्ट फिल्म “मुद्दा” खः धइगु खनेदु । थ्यंमथ्यं नीगु मिनेटया थ्व फिल्मया निर्देशक रत्नकाजी लुनिभा खः ।
नेपालभाषाया न्हापांगु शर्ट फिल्म
थःगु मांभाय् बाहेक मेगु अदालती भाय् मसया थःगु पैतृक सम्पत्तीया मुद्दाय् अदालतं बुका हःम्ह छम्ह नेवाः मिसाया बाखं ज्वनातःगु थ्व फिल्मयात नेवाः भाय्या छगु बांलागु फिल्मया रूपय् कयातःगु दुसाः थुके नारायणदेवी प्रधान व रवि डंगोलया अभिनययात नं आपासिनं तारीफ हे याःगु खः । भाय् मथुगुया हुनिं थःगु आदिभुमिं वञ्चित जुयाच्वने माःपिनिगु बाखं कःघाना तःगु थ्व छगु च्वछाये बहगु फिल्म खः ।
थ्व सिबें न्हापा “पःखाः”यात नेपालभाषाया न्हापांगु शर्ट फिल्मया रूपय् कयातःगु ख । नांजाम्ह ख्यालिम्वः , कलाकार व फिल्म निर्देशक रामशेखर नकःमिया ग्वाहालिं तयार जूगु “पःखाः” या निर्देशक रोशन नवीन ताम्राकार खःसा थ्व फिल्म नांजाम्ह साहित्यकार पूर्ण पथिकया निपु बाखं “अन्धकार” व “पःखाः” या लिधंसा कया दयेका तःगु खः । थ्व फिल्म मूक्कं ४८ मिनेट व ३० सेकेण्ड दुगुलिं याना थुकियात शर्ट फिल्म धका धाये मछीं ।
शर्ट फिल्मया यात्रा
थुकथं शुरु जूगु नेपालभाषाया शर्ट फिल्मया यात्रा उलि सुथां लाक्क न्ह्याना च्वंगुु धाःसा खनेमदु । विशेष याना शर्ट फिल्म धालकी राष्ट्रिय वा अन्तर्राष्ट्रिय फिल्म फेस्टिभलय् ब्वति कायेगु ताःतया दयेकीगु खःसा आः वया युट्युब नं शर्ट फिल्मया निंतिं स्वकुमि नापलायेगु थाय्या रूपय् विकास जुया वया च्वंगु दु ।
राष्ट्रिय वा अन्तर्राष्ट्रिय फिल्म फेस्टिभलया खँ ल्हायेगु खःसा नेवाः शर्ट फिल्मया पलाः उखपाखे न्ह्याःगु उलि खनेमदुनि । नेपालय् दुने जुइगु छुं छुं अन्तर्राष्ट्रिय फिल्म फेस्टिभलय् नेवाः फिल्म काःगु दसु लुया वःगु दु । अज्यागु शर्ट फिल्मय् फिल्म निर्देशक मय्जु सुनिता राजभण्डारीं दयेकुगु “१२ दिन” छगु नं खःसा मेम्ह निर्देशक मय्जु लुनिभा तुलाधरं दयेकुगु “ब्वयेगु मन्तुना” छगु नं खः । “१२ दिन” विशेष याना नेवाः तजिलजि कथंया मिसा मचायात बा¥हा तयेगु संस्कार व परम्परायात दयेका तःगु खःसा थुकियात शर्ट फिल्म सिबें डकुमेण्ट्री कथं कायेमा । थज्यागु नेवाः तजिलजियात कःघाना दयेका तःगु “समिलु” छगु कथंया डकुमेण्ट्री ल्वाकज्यागु ड्रामा खः यानि की डकुड्रामा खः । थुकिया निर्देशक नं लुनिभा तुलाधर हे खः । थन न्ह्यथनागु स्वंगुलिं छगु ईलय् आइफा नांयागु संस्थां ग्वसाः ग्वइगु नेपाल ईण्टरनेशनल ईण्डिजिनस फिल्म फेस्टिभलय् ब्वति काःगु शर्ट फिल्म खः ।
थथे नेपालय् जुगु अन्तर्राष्ट्रिय फिल्म फेस्टिभलय् ब्वति काःगु नेवाः फिल्मय् त्वफिके मज्युगु नां धइगु निर्देशक राकेश महर्जनया “कल्ली” खः । थ्व फिल्म धरानय् जुगु छगु अज्यागु हे फिल्म फेस्टिभलय् ब्वति काःगु जक मखसे सिरपा तकं त्याकेत ताःलागु खः । थ्व “कल्ली” फिल्मं नेपालं पिने फिल्म फेस्टिभलय् ब्वति कया सिरपा त्याकुगु खँ लुमंकेमा । नेपालय् दुने किम्फ धका काठमाण्डौं ईण्टरनेशनल माउण्टेनियरींग फिल्म फेस्टिभल , निफ धका नेपाल ईण्टरनेशनल फिल्म फेस्टिभल लगायतया आपालं अन्तर्राष्ट्रिय फिल्म फेस्टिभलय् नं नेवाः शर्ट फिल्म दुथ्याना च्वंगु दु । थुगुसी जुगु निफ य् निगु नेवाः फिल्म दुथ्यागु दु । उकी मध्ये छगु निर्देशक रामकृष्ण खडगीया “अस्तित्व” खःसा मेगु निर्देशक दर्शनवीर शाक्यया “द मिथ जिरो” नं खः ।
द मिथया प्रिक्वेल
द मिथ जिरो नांयागु शर्ट फिल्म धइगु छुं ई न्ह्यः जूगु नेपालभाषा चिसंकिपा कासा ११३८ य् ब्वति कया लिउ सिरपा त्याकेत ताःलागु फिल्म खः । “द मिथ जिरो” दयेकेसिबें न्ह्यः दर्शनवीरं “द मिथ” नांयागु शर्ट फिल्म दयेकुगु खः । थुगु फिल्मय् सतक बिस्तारया नामय् नेवाः पहिचायात हुया यंका च्वंगुयात क्यनातःगु खःसा नेवाःतसें विरोधया सः थ्वयेके मफुगु खँयात सांकेतिक रूप कुला तःगु खः । थुकथं थ्व छगु बिस्कं सवाःया फिल्म जुया पिदंगु खः । अले छगु संजोग हे धायेमालि की थ्व “द मिथ” नं प्यदँति न्ह्यः मच्छिन्द्र क्लबया ग्वसालय् जुगु नेवाः शर्ट फिल्म कासाय् ब्वति कया न्हाप सिरपा त्याकेत ताःलागु खः ।
न्हापांगु शर्ट फिल्म कासाया देन
नेपालभाषाया शर्ट फिल्मया विकासया निंतिं मच्छिन्द्र क्लबं याःगु शर्ट फिल्म कासाया तःधंगु ल्हाः दु धका धायेमा । थ्व कासाय् थीथी विषय कःघाना दयेका तःगु १७ गु नेवाः शर्ट फिल्म ब्वति काःगु खः । उगु कासाय् “अंगु” नांयागु हरर जनराया फिल्म नं पिहाँ वःगु खःसा सामाजिक समस्यायात “लिधंसा” नांयागु फिल्म कःघाना क्यंगु खः । अथेहेतुं नेवाःतयेत सीत्यंगु मतःया रूपय् न्ह्यब्वया तःगु “पियाच्वना” शर्ट फिल्मय् उगु मतःयात च्याकातयेत सकसिनं थःथःथु ल्हातिं पनेमा धका संकेत बिया तःगु खः । थुकथं थीथी विषय कःघाना न्ह्यब्वःगु उगु ईया शर्ट फिल्मत धाःसा अनं लिपा अनवंथनवं मदयेका तनाच्वंगु दु ।
अनंलिपा
अनंलिपा नेवाः शर्ट फिल्मया ख्यलय् थगुने छगु नं कासा जुल । नेपालं पिने च्वना च्वपिं नेवाः मध्ये प्रवीण ताम्रकार व नेपाः दुनेयापिं सुमन श्रेष्ठ,पवित्र कसाः व सुरेशकिरण मानन्धर जाना ग्वसाः ग्वःगु न्हापांगु नेपालभाषा चिसंकिपा कासाया नामं जुगु थ्व कासा धाःसा मेमेगु फिल्म कासा व फिल्म महोत्सव सिबें भचा पाःगु खनेदत । भाषा म्वासाः जाति म्वाइ लगायत थीथी मूचु ज्वना फिल्म दयेकेब्युगु उगु कासाय् मुक्कं झिगु नेवाः शर्ट फिल्मं ब्वति काल । उगु कासाय् मय्जु सुनिता राजभण्डारीं दयेकुगु “हाःसःमदुगु सः” शर्ट फिल्मं न्हाप सिरपा त्याकलसा दर्शनवीरया “द मिथ जिरो” यात लिउ सिरपा वःगु खः । अथेहेतुं निर्देशक रामकृष्ण खडगीया “अस्तित्व” व पोखराया यादव भोछिभोयया “भकुंग्वारा ख्याः” शर्ट फिल्मं हःपाः सिरपा त्याकल । थुकथं नेवाः शर्ट फिल्मया पलाः न्ह्याकेत थ्व कासा नं तधंगु ग्वाहाली सिद्द जुगु दुसाः थ्व कासाया ग्वसामिपिन्सं आः निक्वखुशीया चिसंकिपा कासाया निंतिं नेवाः साहित्ययात मू विषय यायेमाः धका क्वछिउगु दु ।
युट्युब
शर्ट फिल्म व म्युजिक भिडियोया निंतिं युट्युब छगु तधंगु प्लेटफर्मया रूपय् विकास जुया वया च्वंगु दु । मेमेगु भाषा व देशया शर्ट फिल्मत थौंकन्हे युट्युबय् आपालं स्वयेदया च्वंगु दुसाः नेपालय् खँय् भाय्या शर्ट फिल्मत युट्युबय् आपालं पिहाँ वया च्वंगु दु । नेवाः शर्ट फिल्मया ख्यलय् धाःसा थज्यागु पलाः न्यालाखुलाति न्ह्यःतिनि न्ह्याःगु दु । नेवाः युट्युब नांयागु छगु बिस्कं युट्युव च्यानल शुरु जूसांनिसें थुखे पाखेया पलाः न्ह्याःगु खः । थ्व च्यानलया निंतिं शर्ट फिल्म दयेकेगु भाला युवा फिल्ममेकर योवन शाक्य व उमेश स्थापित जाना न्ह्याका च्वंगु दु । थ्व च्यानलय् आः तक पिदंगु शर्ट फिल्मय् “नेवाः म्युजियम”यात आपासिनं येकुगु दुसाः साइलेण्ट मुभिया रूपय् दयेकुगु “स्वन्हु”या नं तारीफ हे जुगु दु । अथेहेतुं “स्वापु” व “हाकुगु पौ”यात येकुपिं आपालं हे दु । भ्युअर्सया ल्याखं चर्चा यायेगु खःसा “स्वापु”या भ्युअर्सया ल्याः थ्व ध्वःकियाच्वनाबलेतक ५६२९ थ्यंगु दु ।
नेवाः शर्टफिल्मया निंतिं आःतकया छगुयां छगु हे जक युट्युब च्यानलया रूपय् न्ह्यःनेवःगु नेवाः युट्युबय् मेमेपिनिगु नं शर्ट फिल्म क्यना यंकुसाः बांलाइ धका धाइपिं नं अप्वःया वया च्वंगु दुसाः थुखेपाखे थ्व च्यानलं छक्वः मिखा ब्वयेगु बांहेलाइगु खनेदु , छाय्धाःसां थ्व च्यानलय् थुगुसी अन्तर्राष्ट्रिय मातृभाषा दिवसया लसताय् अपलोड याःगु “बचं” नांयागु शर्ट फिल्मयात आपासिनं येकुगु दु । थुकिया भ्युअर्सया ल्या थ्व ध्व किया च्वनाबलेतकया दुने ७१२४ थ्यना च्वंगु धइगु थ्व च्यानलया आःतकया दकले अप्वः स्वकुमिल्याः खः ।
बचंया खँ
थ्व “बचं”या सर्जक आर्यम नकःमि खः । आर्यम धइम्ह नेवाः फिल्म ख्यःया छगः धिसिलाःगुथां खः । लोकंह्वाम्ह फिल्ममेकरं दयेकुगु थ्व शर्ट फिल्मय् नेवाः फिल्मया तसकं हे लोकंह्वाम्ह हिरोइन आशिष्मा नकःमि व नेवाः फिल्मया नांजाम्ह हिरो राजु महर्जनपिन्सं मेन रोल म्हितातःगु दु । उलिजक मखसे थ्व फिल्मय् अभिभावक थःम्हेसिनं हे मस्तयेत थःगु मांभाय्पाखे तापाका यंका च्वंगु खः धइगु खँयात स्याचुक्क न्ह्यब्वःया तःगु दु ।
शर्ट फिल्म धइगु हे छुं नं स्याचुक्क अले नुगलय् थिइक्क न्ह्यब्वयेगु माध्यम खः धइगु खँ नं थ्व “बचं”फिल्म याउँक हे क्यना बिउगु दु ।
