भाजु सुजीव बज्राचार्य, नेवाः ख्यलय् थुगु नां मन्यंपिं सु हे दइ धकाः । विशेष यानाः थौंकन्हय् नेवाः आन्दोलन ख्यलय् थुगु नां निरन्तर वयाच्वनी । छम्ह सामाजिक राजनीतिया अभियन्ता कथं वय्कःयात थौंकन्हय् म्हस्यू । तर वय्कः छम्ह पुलांम्ह संचारकर्मी, पत्रकार नं खः धइगु खँ न्हापायापिन्सं ला बांलाक हे स्यूगु खँ खः । लिसें थौंकन्हय्या विकसित प्रविधीयात लिनाः नेवाः अनलाईन न्यूज नामं नेवाः न्यूज पोर्टल नं न्ह्याकाः युवा पुस्ता दथुइ नं अनलाईन पत्रकारिताया न्ह्यलुवा कथं वय्कःयात म्हस्यू । ई कथं ल्वय्कः नेवाः संचार ख्यःयात न्ह्यज्याकाच्वनादीम्ह भाजु सुजीवयात नेवाः संचार ख्यलय् छम्ह स्यल्लाःम्ह संचार उद्यमी कथं नं कायेफइ ।
सुजीव बज्राचार्यं पत्रकारिता ख्यलय् थःगु पलाः न्ह्याकादीगु थनिं ३०दँ न्ह्यः खः । थम्हं पत्रकारिता ख्यलय् औपचारिक रूपं पलाः तयागु दिं वय्कःयात बांलाक हे लुमंनि, ‘२०४५ पुष १ गते’ । थुगु हे दिं खः, वय्कलं नेपालभाषाया न्हिपौ विश्वभूमि ज्वाइन यानाद्यूगु । तर उगु हे दिंया पत्रिका धाःसा बजारय् मवंगु जुयाच्वन । छाय्कि व उगु हे दिं खः, गुकुन्हु जुजुं कू यात । विश्वभुमिइ आवद्ध जूगु उगु इलंनिसें वय्कः फिल्डय् वनाः रिपोर्टिङ यायेगु, न्यूज च्वयेगु, च्वसु च्वयेगुपाखे न्ह्यज्यानादिल । वय्कःया शैक्षिक पृष्ठभूमि नं पत्रकारिता हे खः । क्याम्पसय् पत्रकारिता व नेपालभाषा कयाः ब्वनाच्वनादीम्ह वय्कलं थःगु शैक्षिक पृष्ठभूमिया ल्याखं हे लजगाः यायेगु बिचाः यानाः पत्रकारिता ख्यलय् पलाः तयादिल । उगु ईयात लुमंकेबलय् वय्कलं विशेष यानाः अशोक श्रेष्ठया नां लुमंकादी । उगु इलय् विश्वभूमिया सम्पादक अशोक श्रेष्ठं सुजीवयात विषयवस्तु बीगु अले व हे ल्याखं बुखँ, च्वसुत च्वयेगु यायेगु खँ वय्कलं न्ह्यथनादिल ।
थम्हं पत्रकारिता न्ह्याकागु इलय् दक्कले न्हापां बुखँ च्वयागु ला वय्कःयात लुमं, तर गुगु बुखँ धइगु जक त्याजिक लुमं मजू धयादी वय्कलं । तर छगू बुखँ धाःसा वय्कःयात आःतक्क लुमं । अस्कल क्याम्पसय् विद्यार्थी आन्दोलन जूगु, वय्कः अन रिपोर्टिङ यायेत थ्यन । अले अनं लाठि चार्ज जूगु, टियर ग्याँसं कयेकूगु बुखँ वय्कलं च्वयादिल । तर उगु बुखँ पिदंबलय् सम्पादक अशोक श्रेष्ठं अस्कल क्याम्पसय् विद्यार्थीयात प्रहरीं वांछ्वयाबिल धकाः पिथनादिल खनी । ‘आः मस्यु, अशोक दाई नं अथे छाय् यानादिल । पंचायती व्यवस्थाया इलय् पंचायत विरुद्ध जनताय् सेन्टिमेन्ट डेभलप याये धकाः खः कि छु खः मस्यु । अथे छकः जूगु दु । व हे बुखँयात कयाः अशोक दाइयात ज्वना नं यंकल, १४न्हु, १५न्हु कुनाहल । तर अशोक दाइ नं अथे छाय् याना धा नं मधाः, जिं थौंतक्क मस्यूनि । व छगू ल्वःमंके हे मफइगु घटना जुयाच्वंगु दु ।’
पत्रकारिता ख्यलय् सुकि सुरेश किरण मानन्धर वय्कःया अतिकं सतीम्ह पासा खः । विश्वभुमिइ ज्या न्ह्याकाद्यूगु इलय् हे सुजीव व सुरेश पासा जूगु जुयाच्वन । रिपोर्टिङय् नापनापं वनेगु, च्वसुया विषयवस्तुइ सहलह यानाः च्वयेगुलिसें अफिसय् ज्या यायां थय्क्क रिफ्रेश जुइत नापं च्या त्वंवनेगु आदि जुजुं वय्कःपिं निम्ह सतीपिं पासापिं जुल । पंचायत विरुद्ध आन्दोलन जुयाच्वंगु इलय्या रिपोर्टिङया घटना छगू वय्कःपिं निम्हेसियां नं गलबें हे ल्वःमंके मफइगु घटना कथं कयादी । पंचायत विरुद्ध आन्दोलन न्ह्यात, उकीया बुखँ च्वयेमाःगु जुल । उगु इलय् सर्वमान्य नेता गणेशमान सिंहयात वीर अस्पतालय् तयातःगु, वय्कःया अन्तर्वार्ता काःवनेमाःगु जुयाच्वन । वय्कःपिं निम्हं अस्पतालय् वनाः म्हस्यूम्ह छम्हेसित ह्ययेकाः डाक्टरया लँ फिनाः डाक्टर जुयावनाः फिल्मी स्टाइलं गणेशमान सिंहजुयात नापलानाः वय्कःया खँ कयाहःगु जुयाच्वन । खँ न्यनेबलय् फिल्मी पहः वः । तर थ्व धात्थेंया घटना खः । ४६ सालया पंचायत विरुद्धया आन्दोलन सफल जुइधुंकाः गोरखापत्रय् जन आन्दोलन विशेषाङ्क पिदंबलय् थुगु हे घटनायात कयाः तत्कालीन विश्वभूमिया सम्पादक अशोक श्रेष्ठं च्वयादीगु च्वसु पिदंगु नं दु ।
थौंकन्हय् संचार ख्यलय्या भाजु सुजीव बज्राचार्यया गतिविधिया खँ ल्हायेगु खःसा वय्कलं थौंकन्हय् नेवाः अनलाईन न्यूज नांया न्यूज पोर्टल न्ह्याकाच्वनादीगु दु । उकिया नापं अप्सरा वाःपौ नं पिथना च्वनादीगु दु । अप्सरा हरेक बुधबाः पिदनाच्वंगु दु । नापं खस भासाया सन्ध्याकालीन न्हिपौ साँझको सिटि टाइम्स सन्ध्याकालीन नं पिथना च्वनादीगु दु । थ्वयां न्ह्यः वय्कलं नेपालभाषाया न्हिपौ नेवाः पोष्ट नं पिथनादीगु दुगु खः । दच्छिं मयाक्क उगु पत्रिका निरन्तर पिदंगु नं खः । तर लिपा वनाः वय्कलं उगु न्हिपौ दिकादिल । ‘उगु इलय् सन्ध्या टाइम्स न्हिपौ नं पिदनाच्वंगु खः । सन्ध्या टाइम्स धाःसां नं झीगु हे पत्रिका खः । चीधंगु बजारया दुने नं हाकनं छाय् थःथः दथुइ हे धेंधें बल्लाः यानाच्वने धइथें इलय्ब्यलय् मतिइ लुइगु, व हे ल्याखं जिं नेवाः पोष्ट दिकाछ्वया’ नेवाः पोष्ट दिकागु कारण भाजु सुजीवं कनादिल ।
थौंकन्हय् पिदनाच्वंगु अप्सरा वाःपौया नं पुलांगु हे ईतिहास दु । थुगु पत्रिका न्हापा लय्पौ कथं म्यागेजिनया रूपय् पिदंगु खः । उगु इलय् भारतं पिदनीगु मायापुरी पत्रिका अतिकं लोकं व्हानाच्वंगु ई । ४६ सालया आन्दोलनय् नं भारतं नेपालयात नाकाबन्दी तयाबिल । इन्डियन सिनेमाया विषयवस्तु कःघानाः पिदनीगु भारतीय पत्रिका मायापुरी नं थन मवल । मायापुरी नेपालय् मवःबलय् थन मनूतय् मायापुरीया बारे खुब खँ जुयाच्वनीगु जुयाच्वन । मायापुरीया उकथंया चर्चां सुजीव बज्राचार्ययात बिचाः यायेत बाध्य दयेकल, ‘थुकथंया हे मनोरन्जन क्षेत्रया चर्चा परिचर्चा कःघानाः नेवाः पत्रिका छाय् पिमथनेगु ?’ थ्व हे बिचाः लिसें नेपालभाषाया सिने पत्रिका अप्सरा नं वय्कलं पिथनादिल । उगु इलय् अप्सराया विमोचन ब्लु स्टार होटलय् तत्कालीन संचारमन्त्री कमल थापा अले मदनकृष्ण श्रेष्ठ, हरिवंश आचार्यं याःगु खः । उगु इलय् पत्रिका ७ अंक पिदनाः दिनावन । आः वयाः उगु पत्रिका नेवाः समसामयिक च्वसु, बुखँ मुनाः वाःपौया रूपय् निरन्तर जुयाच्वंगु दु । उकिया लिसें वय्कलं नरेशबीर शाक्यलिसे जानाः यज्यु लय्पौ नं पिथनादीगु दुगु खः । नरेशबीर शाक्यलिसे हे जानाः लिपि पौ नं पिथनादीगु दुगु खः । यज्यु पत्रिका निरन्तर जुइमफुत सा लिपि पौ ई ल्वहं पब्लिकेशनं निरन्तर जुयाच्वंगु दु ।
पत्रकारिताया यात्राय् वय्कःया जीवनय् यक्व हे थथ्याःक्वथ्याः वल । विश्वभुमिइ आवद्ध जुयाः ज्या यानाच्वँच्वं सन्ध्या टाइम्सया जन्म । हाकनं वयां लिपा सन्ध्या टाइम्स धुंकाः वय्कः अनं नं पिहां वयाः साँझको सिटि टाइम्स सन्ध्याकालीन, उकिया नापं लिपा वयाः नेवाः पोष्ट, व नं लिपा दिनावन, यज्यू नं दिनावन । विश्वभुमिया तत्कालीन सम्पादक अनं पिहांवयाः न्हूगु विश्वभुमि पिथनादिल । थुकथं छगू पत्रिका निरन्तर जुइमफूगु वा छगू संचार गृह धिसिलाक्क निरन्तर दनाच्वने मफूगु कथंया लू खनेदत । थुकिया कारण सुजीवं व्यवस्थापनया कमजोरी खंकादी । व्यक्तिगत रूपं सुं व्यवस्थापकया खँ मखसें समष्टिगत प्रवृत्तीयात दुवालेबलय् नेवाः संचार ख्यलय् धिसिलाःगु व्यवस्थापन मदयाः थथे जुयाच्वंगु वय्कलं धयादी ।
विश्वभूमि धुंकाः छाय् सन्ध्या टाइम्स, सन्ध्या टाइम्स धुंकाः हाकनं छाय् साँझको सिटि टाइम्स सन्ध्याकालीन धकाः न्यनागु न्ह्यसलय् वय्कलं उगु ईया ईतिहासया पौ पुइकादिल । विश्वभुमिइ मेमेपिनिगु नं शेयर दुगु जुयाच्वन । व्यवस्थापन पक्ष छगू जुल, मेपिं स्लिपिङ पार्टनर थें । छुं दँ थुकथं न्ह्यानाच्वन, लवः इनेगु ज्या नं जुल । भचा लिपा वनाः शेयर होल्डरपिन्सं विश्वभूमियात व्यवस्थित यायेमाःगु खँ तल । अकाउन्टेन्ट नं तयेगु, सकतां आर्थिक कारोबार अकाउन्टेन्टं स्वयेगु व वं हे तलब इनेगु खँ तल । उगु खँ अशोक श्रेष्ठजुयात लुमधन । थःत अविश्वास याःगु खःला धइथें वय्कःया मनय् वन । वयां लिपा वय्कः अनं पिहांवनाः न्हूगु विश्वभुमि पिकयादिल ।
वयांलिपा विश्वभूमिया शेयर बी धकाः व्यवस्थापकं धयातःगु दुगु । व नं कन्हय् कन्हय् जुयाच्वंगु अवस्था । थुकिया दथुइ विश्वभूमि अफसेटय् वन । अफसेट मेसिन न्यायेगु नितिं सुजीवं थम्हं नं शेयर तल । मेमेपिनिगु नं शेयर वल । छुं ई ज्या न्ह्यानांतुंवन । लिपा वनाः उकी नं छुं समस्या पिहांवल । त्यासा कयाः शेयर तःम्ह शेयर होल्डरपाख्ें त्यासा पुलेत धकाः लय्पतिकं यक्व धेबा यंकेगु याःबलय् उकी कचवं पिदन । व कचवं धुंकाः सुजीवलिसें छगू पुचः हे अनं पिहांवयाः सन्ध्या टाइम्स पिदन । अझ छुं ई ला न्हापा विश्वभूमि पिदनाच्वंगु हे थाय् व अनं पिहांवःगु पुचः निथासं नं निगू निगू विश्वभूमि पिहांवयाः पाठक अलमल जूगु स्थिती नं जुल । तर लिपा वनाः अनं पिहांवःगु पुचलं पत्रिकाया नां सन्ध्या टाइम्स तयाः पिथन । सन्ध्या टाइम्स नं बांलाक हे न्ह्यानाच्वंगु खः । सन्ध्या टाइम्सय् सुजीवं विशेष यानाः व्यवस्थापन पक्षय् स्वयादिल । व्यवस्थापनया नितिं वय्कलं आवश्यक ताःकथं मनूत तयेगु, ज्या याकेगु यानाच्वनादीगु । स्लिपिङ पार्टनरपिनिगुपाखें उकी अथे मजिल थथे मजिल खँ वल । थ्व थुगु थुगु कारणं यायेमाःगु खः धाःसां खँ थुइकेमफूगु स्थिती पिदन । अथेजूबलय् वय्कलं असमझदारी दथुइ कचवं अप्वयेकेगु स्वयां पिहांवयेगु बांलाइ धकाः थः याकःचा अनं पिहांवयाः सन्ध्याकालीन पत्रिका पिथनादीगु जुयाच्वन । नेवाः पोष्टया खँ ला च्वय् हे न्ह्यथनेधुन । थुकथंया थीथी परिस्थीति थुकथं हे थीथी कथंया परिस्थीतिया पुला वयाः वय्कः थौंकन्हय् सामाजिक राजनीतिक अभियन्ता कथं न्ह्यज्यानाच्वनादीगु दु । उकिया नापं नेवाः अनलाईन न्यूजपाखें नेवाः गतिविधियात हलिंन्यंकया नेवाःतय् दथुइ नं थ्यंकाच्वनादीगु दु । भाजु सुजीवं धयादी, ‘थौंकन्हय् जि पत्रकारिताय् स्वयां नं नेवाः अधिकार, भाषिक, जातीय समानताया आन्दोलनय् आपाः जुयाच्वना । अथेसां जिगु जग हे पत्रकारिता खः, पत्रकारिता त्वःते ला जिं फइ हे मखु । आन्दोलनया ख्यलय् नं जिं पत्रकारिता नं नापनापं याना हे च्वनागु दु, याना नं च्वने ।’
बिराजकाजी राजोपाध्याय
