नेपालभाषा संकिपाः, म्ये व म्यूजिक भिडियो क्षेत्रय् सर्जकपिन्त हनेगु आज्जुं पेजथ्री पिपल्स च्वाइस अवार्ड ११४६ (न्याक्वःगु संस्करण)या घोषणा ज्याझ्वः चाैलागा दुतिया, ११४६ ( चैत्र २१, २०८२) खुन्हु येँया सिटी सेन्टरय् जुल । थुगु सिरपाःया न्हापांगु संस्करण नेसं ११३०य् जूगु खःसा नेसं ११३३, नेसं ११३७, नेसं ११४२य् प्यक्वःगु संस्करण जुइधुंकुगु खः । थुगुसी घोषणा जूगु न्याक्वःगु संस्करण नेपालभाषाया मनोरञ्जन ख्यलय् कलाकार व सर्जकपिनिगु योगदानयात निरन्तर सम्मान यायेगु आज्जु तयातःगु दु ।
ज्याझ्वःया मू उद्देश्य सिरपाःया नितिं प्रविष्टि आह्वान यायेगु व पारदर्शी कथं न्ह्याकेगु ग्वसाःखलकं धाःगु दु । ग्वसाः खलकं ब्यूगु जानकारी कथं विधिवत रूपं हे नेपालभाषाया संकिपा, म्ये व म्यूजिक भिडियोपाखें ब्वति कायेफइगु व नाेमिनेशन ज्याझ्वः अनं लिपा मू ज्याझ्वः जुइगु जानकारी नं ब्यूगु दु । थुकिया निंतिं अवार्ड घाेषणा जूगु मिति चैत्र २१ गते निसें २०८३ बैशाख ५ गते तक्क नेपालभाषाया कृतित नेसं ११४२ काैलागा चाैथी निसें नेसं ११४६ बछलागा पारू तक्क पिदंगु कृतित नालेगु जुइ । ज्याझ्वलय् सिरपाःया थीथी विधा सार्वजनिक जूसां नं वःगु प्रविष्टिया आधारय् गुलिखे विधाय् परिमार्जन जुइफुगु खँ ग्वसाःखलकं धाःगु दु ।
ज्याझ्वलय् विशेष पाहाँ कथं चलचित्र विकास बोर्ड नेपालया नायः दिनेश डि.सी. ज्याझ्वलय् दर्शन वीर शाक्य (महोत्सवया निर्देशक), विजयरत्न असंबरे (वरिष्ठ सिने पत्रकार) व नरेश वीर शाक्यं (प्रबन्ध निर्देशक, ईलोहं प्रकाशन) नुगः खँ तयादीगु खः । पेजथ्री बाःछिपाैया व्यवस्थापक दुजः अर्वीन्द्रमान सिंहं सिरपाःया नियमावली व कार्यविधि न्ह्यब्वयादीगु खः ।
थःगु न्वचुया झ्वलय् महोत्सवया निर्देशक दर्शन वीर शाक्यं नेपालभाषा मौलिक भाय् जूगुलिं थुगु भासं सिर्जना याइपिं कलाकार व सर्जकपिन्त प्रोत्साहित यायेत थुज्वःगु ज्याझ्वः महत्वपूर्ण जूगु धयादिल । वय् कलं थःगु सिर्जनाया प्रचारप्रसार व प्रचारप्रसारय् सर्जकपिं नं सक्रिय जुइमाःगु खँ प्वंकादिल ।
विशेष पाहाँ दिनेश डिसीं नैतिकता व पारदर्शिताया लिधंसाय् सिरपाः ज्याझ्वः न्ह्याकेमाःगु खँ कनादिल । वय्कलं सामाजिक संजालय् भ्यूजया ल्याः जक स्वयाः निर्णय यायेगु पाय्छि मजूगु विचाः प्वंकादिल ।
अथे हे वरिष्ठ पत्रकार विजयरत्न असंबरें थुज्वःगु अवार्ड ज्याझ्वः नियमित व चीहाकःगु अन्तरालय् ग्वसाः ग्वयेमाःगु खँ कनादिल । वय्कलं प्यदँ न्यादँया अन्तराल ताःहाकः जूगु धासें वइगु दिनय् अझ नियमित रुपं ज्याझ्वः ग्वसाः ग्वयेगु सुझाव बियादिल ।
ईलोहं प्रकाशनया प्रबन्ध निर्देशक नरेशवीर शाक्यं इलोहं प्रकाशन नेपालभाषा साहित्य व मनोरञ्जन ख्यःया विकासय् योगदान बीत सदां प्रतिबद्ध जूगु खँ कनादिल । वय्कलं नेपालभाषाया मनोरञ्जन ख्यलय् सक्रिय जुयाच्वंपिं नेवाः श्रष्टापिनिगु योगदानयात सम्मान यायेगु थुगु छगू महत्वपूर्ण ज्याझ्वः जूगु खँ न्ह्यथनादिल ।
मूल्यांकन प्रणालीइ ६० प्रतिशत निर्णायक मण्डलया निर्णय व ४० प्रतिशत सार्वजनिक मतदानया आधारय् अवार्डया लिच्वः क्वःछीगु जूगु दु । संकिपाः, म्यूजिक भिडियो व म्येया थीथी विधाय् सिरपाः बिइगु नापं थुगु ख्यलय् बिशेष याेगदान ब्यूम्ह श्रष्टायात लाइफटाइम एचिभमेन्ट अवार्ड नं लःल्हाइगु जूगु दु ।
घोषणा ज्याझ्वलय् कलाकार, सञ्चारकःमि व स्वकुमिपिनिगु आपलं उपस्थीति दुगु खः । आः जुइत्यंगु सिरपाः ज्याझ्वःया निंतिं सहभागीपिन्सं उत्साह प्वंकूगु दु । थुगु सिरपाःया माध्यमं नेपालभाषाया संकिपाः व संगीत ख्यलं थप हौसला कायेखनीगुलिइ ग्वसाःखलः विश्वस्त दु । ज्याझ्वः पेजथ्री बाःछिपाैया ग्वसालय् जूगु खः । थुगु पत्रिकाया प्रकाशक ईलोहं प्रकाशन प्रा.लि. खः । ज्याझ्वः पेजथ्री बाःछिपाैया मेम्ह व्यवस्थापक दुजः सर्जु बज्राचार्यं न्ह्याकादीगु खः ।
