मोहनीया फुलपाति खुन्हु अशोक हलय् तःजिक प्रिमियर जूगु नेपालभाषाया न्हूगु म्ये माखायात ग्वंगः माः .. निवाः दुने हे १० लख भ्यूज पुवंगु लसताय् म्युजिक भिडियो पुचः पाखें छगू लसता हना ज्याझ्वः यात । केक् कटिंग सेरेमोनी धकाः हरिसिद्धि स्थीत थांसी नेवाः कटेजय् छगू विशेष ज्याझ्वः जुल। ज्याझ्वलय् लोक गाय्क एवं वरिष्ठ म्येहालामि रत्न बेहोसी, वरिष्ठ सिनेपत्रकार बिजयरत्न असंबरे, संसार्स अनलाइनया निर्देशक स्वतन्त्र संसार महर्जन, इ बुखंया सम्पादक विराजकाजी राजोपाध्याय् लगायत अन्य मिडिया कर्मिया उपस्थीति दुगु खः ।
केक् तानाः लसता हंगु थुगु ज्याझ्वःस वरिष्ठ सिनेपत्रकार बिजयरत्न असंबरें नेपालभासा ख्यः सकसियां सहकार्य न्ह्यानाच्वंगु खँ कुलादीसें थुगु म्येया भ्यूज अझं थहांवनीगु खँ कनादील । पेजथ्री बाःछिपौया सम्पादक दर्शनवीर शाक्यं थुगु बर्षं निसें नेपालभाषा मनोरंजन ख्यःलय् न्हूगु भ्यूजया मानाङ्क कथं १ एम बुलुहुँ स्थापित जुयाःवनाच्वंगुलिं नेपालभाषाया मनोरंजन ख्यः चकनां वनाच्वंगु खँ कुलादील । संसार्स अनलाइनया निर्देशक स्वतन्त्र संसार महर्जनं भिंतुसें कलाकारपिंसं वय्कःयात ग्वहालि यानाच्वंगु व थःम्हं फःतले नेवाः ज्याझ्वःयात तिबः बियाःच्वनेगु खँ धयादिल। ज्याझ्वलय् संचारकःमि बिराजकाजी राजोपाध्याय्लं नेपालभाषा ख्यलय् युट्युय् नेवाः म्ये स्वयेगु प्रचलन अप्वयाः वयाःच्वंगु खँ न्ह्यथनादिल । नेपाः टिभिया निर्देशक रामकृष्ण खड्गीं म्येया सफलताया निंतिं भिंतुना देछानादिल ।
थुगु म्येय् कृष्णभक्त महर्जन व बानिका प्रधानं हालातःगु खःसा म्येया च्वसा व लय कृष्णभक्त महर्जनं चिनातःगु खः । म्येया संयोजन हरि शरण साय्मिं यानातःगु दु । थुगु म्येय् आराध्या लक्ष्मी खड्गी व किरण जोशीया जोडी दु । म्येया निर्देशन बाल मुकुन्द प्रजापतिं यानातःगु दु अले छायाँकन व सम्पादन शैलेस श्रेष्ठ लुभुं यानातःगु दु । थुगु म्येया पिरकल्पना व प्राेडक्शन म्यानेजर केविएस लुभु प्राेडक्शन हाउसं यानातःगु खः ।
